Ko-lîm-to Chiân su/哥林多前書簡介 線上收聽:中文和合本 台語聖經 台語聖經(長老會傳播中心授權） 客語聖經 福州話聖經 粵語和合本 希臘文 下載檔案 關於語音聖經
2:1 Ki-tok Hông Tèng Si̍p-jī-kè ê Sìn-sit
Hiaⁿ-tī chí-mōe, góa í-chêng khì lín hia, pēng bô ēng súi ê giân-sû á-.sī tì-hūi lâi tùi lín thoân Siōng-tè ê ò-pì.
2:2 In-ūi góa koat-tēng, tī lín tiong-kan tû-liáu I-é-su Ki-tok kah I hông tèng si̍p-jī-kè ê sìn-sit í-gōa, bô beh thê-khí kî-tha ê tāichì.
2:3 Góa kah lín chò-hóe ê sî chin loán-jio̍k, iū-koh kiaⁿ kah phi̍h-phi̍h chhoah.
2:4 Góa só͘ kóng ê ōe kah só͘ thoân ê sìn-sit, lóng bô ēng khiáu-biāu tì-hūi ê giân-sû, sī khò Sèng Sîn ê koân-lêng lâi chèng-si̍t.
2:5 Góa ánne chò, sī beh hō͘ lín bô khò lâng ê tì-hūi lâi kiàn-li̍p sìn-gióng, sī khò Siōng-tè ê koân-lêng.
2:6 Siōng-tè ê Tì-hūi
Chóng-.sī, tùi hiahê lêng-sèng sêng-se̍k ê lâng, goán mā ū kóng tì-hūi. To̍k-to̍k m̄-sī chit sè-kan ê tì-hūi, mā m̄-sī chit sè-kan chù-tiāⁿ ē sit-sè ê chiáng-koân-chiá ê tì-hūi.
2:7 Goán só͘ kóng ê sī Siōng-tè ò-biāu ê tì-hūi, sī tùi lâng ún-ba̍t ê, to̍h-sī Siōng-tè tī chhòng-sè í-chêng to̍h tiāⁿ tio̍h beh hō͘ lán tit tio̍h êng-kng.
2:8 Chit sè-kan ê chiáng-koân-chiá, bô chi̍t-ê bat chit-ê tì-hūi; in nā bat, chiū bē kā êng-kng ê Chú tèng-sí tī si̍p-jī-kè.
2:9 Chiàu keng-tián só͘ kì-chài, Siōng-tè ūi tio̍h thiàⁿ I ê lâng só͘ chún-pī ê, sī ba̍k-chiu m̄ bat khòaⁿ-.tio̍h, hīⁿ-khang m̄ bat thiaⁿ-.tio̍h, lâng ê sim liāu-sióng bē kàu ê. (chù, ISI 64:4)
2:10 M̄ koh, Siōng-tè ū thong-kòe Sèng Sîn, kā chiahê tāichì kā lán khé-sī, in-ūi Sèng Sîn bān sū lóng chai kah chin thiat-té, liân Siōng-tè chhim-ò ê chí-ì mā lóng chai.
2:11 Lâng ê tāichì, chí ū i kakī ê sim-sîn chiah ē chai; chhin-chhiūⁿ ánne, Siōng-tè ê tāichì mā chí ū Siōng-tè ê Sèng Sîn chiah ē chai.
2:12 M̄ koh, lán só͘ niá-siū ê, m̄-sī tùi sè-kan ê lêng, sī tùi Siōng-tè lâi ê Sèng Sîn, beh hō͘ lán chai Siōng-tè pe̍h-pe̍h siúⁿ-sù hō͘ lán ê un-tián.
2:13 Só͘-í, goán tùi sio̍k-lêng ê lâng kái-soeh sio̍k-lêng ê tāichì, m̄-sī ēng lâng só͘ kà ê tì-hūi ê ōe, sī ēng Sèng Sîn só͘ kà-sī ê ōe.
2:14 M̄ koh, sio̍k hiat-khì ê lâng bē tàng niá-siū Siōng-tè ê Sèng Sîn ê un-sù. In kā chiahê un-sù khòaⁿ-chò sī gû-gōng, mā bô hoat-tō͘ liáu-kái, in-ūi kantaⁿ sio̍k-lêng ê lâng chiah ē-tàng hiáu-ngō͘.
2:15 To̍k-to̍k sio̍k-lêng ê lâng ē-tàng phòaⁿ-toàn bān-hāng sū, i kakī pún-sin ê tāichì mā bô lâng ē-tàng kā i phòaⁿ-toàn.
2:16 Keng-tián ū kì-chài, siáⁿ lâng chai Chú ê sim-ì? Siáⁿ lâng ē-tàng thè I chhut chú-ì? (chù, ISI 40:13) M̄ koh, lán sio̍k-lêng ê lâng ū Ki-tok ê sim-chì.
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。