| 章節 | 全民台語聖經全羅經文 | 註釋 |
| 26:1 | Joa̍h-thiⁿ lo̍h seh kah siu-koah ê sî lo̍h hō͘, lóng sī bô ha̍p-gî; gû-gōng ê lâng tit tio̍h êng-kng mā sī bô ha̍p-gî. | 註釋 串珠 盧導讀台 |
| 26:2 | Tú chhin-chhiūⁿ chhek-chiáu-á poe khí poe lo̍h, ìⁿ-á poe-lâi poe khì, bô-iân bô-kò͘ ê chiù-chó͘ mā bē èng-giām. | 註釋 串珠 盧導讀台 |
| 26:3 | Piⁿ sī ūi tio̍h bé, bé-kā-kiuⁿ sī ūi tio̍h gû; koái-á-.sī ūi tio̍h gōng lâng ê kha-chiah-phiaⁿ phiaⁿ. | 註釋 串珠 盧導讀台 |
| 26:4 | M̄-thang chiàu gōng lâng ê gōng ōe lâi kā i ìn-tap, khióng-kiaⁿ lí ē kah i sio-siâng. | 註釋 串珠 盧導讀台 |
| 26:5 | Tio̍h chiàu gōng lâng ê gōng ōe lâi kā i ìn-tap, khióng-kiaⁿ i ē kakī khòaⁿ-chò sī ū tì-sek. | 註釋 串珠 盧導讀台 |
| 26:6 | Thok gōng lâng pò siau-sit, tú chhin-chhiūⁿ kòng tn̄g kakī ê kha, hō͘ kakī chia̍h-khui. | 註釋 串珠 盧導讀台 |
| 26:7 | Chim-giân tī gōng lâng ê chhùi, tú chhin-chhiūⁿ pái-kha-.ê kha khang-khang teh hàiⁿ. | 註釋 串珠 盧導讀台 |
| 26:8 | Kā êng-kng hō͘ gû-gōng ê lâng, tú chhin-chhiūⁿ kā chi̍t pò͘-tē ê pó-chio̍h khǹg tī chio̍h-tui lāi-bīn. | 註釋 串珠 盧導讀台 |
| 26:9 | Chim-giân tī gōng lâng ê chhùi, tú chhin-chhiūⁿ chi̍t ki chhì chha̍k ji̍p-khì chùi-hàn ê chhiú. | 註釋 串珠 盧導讀台 |
| 26:10 | Chhiàⁿ gōng lâng á-.sī chhiàⁿ kòe-lō͘ lâng lâi chò tāichì, tú chhin-chhiūⁿ loān siā chìⁿ khì siong tio̍h kûn-chiòng. | 註釋 串珠 盧導讀台 |
| 26:11 | Gōng lâng koh-chài chò gōng tāichì, tú chhin-chhiūⁿ káu-á tò tńg-lâi chia̍h i só͘-thò͘ ê mi̍h-kiāⁿ. | 註釋 串珠 盧導讀台 |
| 26:12 | Lí ū khòaⁿ tio̍h kakī lia̍h-chò sī tì-sek ê lâng bô? Gōng lâng pí i iáu khah ū ǹg-bāng. | 註釋 串珠 盧導讀台 |
| 26:13 | Pîn-tōaⁿ ê lâng kóng, " Tī lō͘-.ni̍h ū béng sai, tī ke-lō͘-.ni̍h ū ióng sai. " | 註釋 串珠 盧導讀台 |
| 26:14 | Mn̂g tī mn̂g-khū teh tńg, pîntōaⁿ lâng tī bîn-chhn̂g téng mā sī ánne. | 註釋 串珠 盧導讀台 |
| 26:15 | Pîn-tōaⁿ lâng chhun chhiú tùi pôaⁿ-.ni̍h, the̍h-lâi-kàu chhùi mā hiâm sin-khó͘. | 註釋 串珠 盧導讀台 |
| 26:16 | Pîn-tōaⁿ lâng khòaⁿ kakī ū tì-hūi, iâⁿ-kòe chhit-ê gâu ìn-tap ê lâng. | 註釋 串珠 盧導讀台 |
| 26:17 | Kòe-lō͘ lâng khì chhap kah i bô koan-hē ê sio-cheⁿ, ná chhin-chhiūⁿ lâng khiú tio̍h káu ê hīⁿ-á. | 註釋 串珠 盧導讀台 |
| 26:18 | Lâng khi-phiàn i ê chhù-piⁿ, kóng, " Góa sī teh kún-chhiò ", | 註釋 串珠 盧導讀台 |
| 26:19 | Ná chhin-chhiūⁿ tian-kông ê lâng hiat hóe-pé kah lāi-chìⁿ í-ki̍p thâi lâng ê ke-si. | 註釋 串珠 盧導讀台 |
| 26:20 | Hóe nā bô kàu chhâ chiū ē hoa-khì; nā bô lâng o̍h-ōe, sio-cheⁿ chiū ē soah-.khì. | 註釋 串珠 盧導讀台 |
| 26:21 | Ài sio-cheⁿ ê lâng ē kek-tōng sio-cheⁿ, tú chhin-chhiūⁿ tī teh to̍h ê thòaⁿ-hóe tiong thiⁿ-chhâ. | 註釋 串珠 盧導讀台 |
| 26:22 | Pōe-āu ê êng-á-ōe chhin-chhiūⁿ hó chia̍h ê mi̍h, chi̍t ē ji̍p chhùi chiū thun lo̍h-khì pak-tó͘ lāi. | 註釋 串珠 盧導讀台 |
| 26:23 | Chhùi tiⁿ sim kan-chà ê lâng, tú chhin-chhiūⁿ hûi-khì an gîn ê che-tái. | 註釋 串珠 盧導讀台 |
| 26:24 | Oàn-hūn lâng ê, i chhùi kóng phô͘-tháⁿ ê ōe, chóng-.sī, sim-lāi khǹg kúi-chà. | 註釋 串珠 盧導讀台 |
| 26:25 | I kóng hó thiaⁿ ōe, lí m̄ thang siong-sìn, in-ūi i ê sim-lāi ū chhit-hāng ê khó-ò͘ⁿ. | 註釋 串珠 盧導讀台 |
| 26:26 | I sûi-jiân ēng kúi-chà am-khàm kakī ê oàn-hūn, I ê pháiⁿ ē tī hōe-chiòng ê bīn-chêng lō͘-hiān. | 註釋 串珠 盧導讀台 |
| 26:27 | Ku̍t hām-kheⁿ ê lâng kakī ē poa̍h lo̍h-khì hit lāi-bīn; kō chio̍h-thâu ê lâng ē hō͘ kō tò tńg-.lâi ê chio̍h-thâu teh tio̍h. | 註釋 串珠 盧導讀台 |
| 26:28 | Kóng pe̍h-chha̍t ê chi̍h ē siong-hāi lâng; phô͘-tháⁿ ê chhùi ē pāi-hoāi lâng. | 註釋 串珠 盧導讀台 |