| 章節 | 全民台語聖經全羅經文 | 註釋 |
| 6:1 | Te̍k-jîn Lâi Ûi-kong Ê-lú-sa-lèmBiān-iá-mín lâng, lín tio̍h cháu chhut Ê-lú-sa-lèm, tī The-ko-oah pûn sàu-kak, tī Bia̍t-ha-ke-lém pàng ian-hóe; in-ūi ū chai-hō kah tōa ê húi-bia̍t tùi pak-hong lo̍h-.lâi. | 註釋 串珠 盧導讀台 |
| 6:2 | Góa beh châu-bia̍t Si-óng ê chabó͘ gín'á, to̍h-sī hit-ê súi koh iù-siù ê. | 註釋 串珠 盧導讀台 |
| 6:3 | Bo̍k-chiá kah i ê iûⁿ-kûn ē kàu i hia, tī i ê sì-kho͘-ûi tah pò͘-pêⁿ, ta̍k-ê tī i só͘ chiàm ê tē, hō͘ iûⁿ chia̍h chháu. | 註釋 串珠 盧導讀台 |
| 6:4 | In ē bēng-lēng kóng, " Lín tio̍h chún-pī kau-chiàn kong siâⁿ; khí-.lâi! Lán tio̍h thàn tiong-tàu ê sî chiūⁿ-.khì. " Āu-lâi, in koh kóng, " Chhám ah! Ji̍t í-keng chhiâ sai, beh àm ê iáⁿ í-keng thoa tn̂g. | 註釋 串珠 盧導讀台 |
| 6:5 | Khí-.lâi! Lán tio̍h thàu-mê chiūⁿ-.khì, húi-hoāi i ê kiong-tiān. | 註釋 串珠 盧導讀台 |
| 6:6 | In-ūi bān-kun ê Siōng-chú ánne kóng, " Lín tio̍h chhò chhiū-á, khí thô͘-tui, kong-kek Ê-lú-sa-lèm. Che sī hit-ê eng-kai siū hêng-hoa̍t ê siâⁿ, in tiong-kan choân-pō͘ sī pō-gio̍k. | 註釋 串珠 盧導讀台 |
| 6:7 | Chéⁿ án-chóaⁿ chhèng-chhut chúi, chit-ê siâⁿ mā ánne chhèng-chhut pháiⁿ; tī in tiong-kan tiāⁿtiāⁿ thiaⁿ tio̍h ū kiông-pō, húi-bia̍t ê tāichì, pēⁿ-thiàⁿ, sún-siong mā tiāⁿtiāⁿ tī Góa ê bīn-chêng. | 註釋 串珠 盧導讀台 |
| 6:8 | Ê-lú-sa-lèm lâng, lín tio̍h siū kà-sī. Bián-tit Góa ê sim kah lí so͘-oán, bián-tit Góa hō͘ lí pha-hng, chiâⁿ-chò bô lâng tòa ê só͘-chāi. " | 註釋 串珠 盧導讀台 |
| 6:9 | Pōe-ge̍k ê I-su-la-elBān-kun ê Siōng-chú ánne kóng, " Te̍k-jîn ē lia̍h I-su-la-el choân-pō͘ só͘ chhun lo̍h-.lâi ê jîn-bîn, chhin-chhiūⁿ teh bán phû-tô. Lí tio̍h chhin-chhiūⁿ bán phû-tô ê, chhiú koh chhun ji̍p-khì chhiū-ki. " | 註釋 串珠 盧導讀台 |
| 6:10 | Góa ìn kóng, " Taⁿ góa beh tùi siáⁿ lâng kóng-ōe chò kiàn-chèng hō͘ in thiaⁿ? Lí khòaⁿ, in ê hīⁿ-á bô siū kat-lé, bē tàng thiaⁿ. Lí khòaⁿ, Siōng-chú ê ōe, in lia̍h-chò kiàn-siàu, bô hoaⁿ-hí thiaⁿ. | 註釋 串珠 盧導讀台 |
| 6:11 | In-ūi ánne, góa hō͘ Siōng-chú ê siū-khì chhiong-móa, jím bē tiâu. Só͘-í, Siōng-chú kóng, " Góa beh chò chi̍t-ē piàⁿ lo̍h-khì tī ke-lō͘ ê gín'á kah chū-hōe ê siàu-liân lâng, liân tiōng-hu kah i ê bó͘, lāu lâng kah ji̍t-chí boán-chiok ê, lóng ē siū lia̍h. | 註釋 串珠 盧導讀台 |
| 6:12 | In ê chhù-the̍h, chhân-hn̂g kah bó͘ lóng ē piàn-chò pa̍t lâng ê; in-ūi Siōng-tè ē chhun chhiú kong-kek tòa tī chit só͘-chāi ê jîn-bîn. Che sī Siōng-chú kóng ê. | 註釋 串珠 盧導讀台 |
| 6:13 | In-ūi in tùi siōng sè kàu siōng tōa ê lóng it-bī tham-sim, tùi sian-ti kàu chè-si lóng kiâⁿ kan-chà. | 註釋 串珠 盧導讀台 |
| 6:14 | In chhìn-chhìn chhái-chhái i-tī Góa ê jîn-bîn ê siong, kóng, ' Pêng-an à! Pêng-an à! ', kî-si̍t bô pêng-an. | 註釋 串珠 盧導讀台 |
| 6:15 | In kiâⁿ khó-ò͘ⁿ ê tāichì, kám chai kiàn-siàu? Bô, in lóng bô kiàn-siàu, bīn mā bē âng. In-ūi ánne, in ē tī poa̍h-tó ê lâng ê tiong-kan poa̍h-tó; Góa pān in ê sî, in ē tian-tian tó-tó. Che sī Siōng-chú kóng ê. " | 註釋 串珠 盧導讀台 |
| 6:16 | I-su-la-el Kī-choa̍t Siōng-chú ê Tō-lō͘Siōng-chú ánne kóng, " Lín tio̍h khiā tī lō͘-.ni̍h khòaⁿ, cha-mn̄g kū ê lō͘, hit tiâu hó lō͘ tī tó-ūi, chiū tio̍h kiâⁿ hit tiâu lō͘; ánne, lín ê sim chiū ē tit tio̍h an-hioh. " Chóng-.sī, in ìn kóng, " Goán m̄-kiâⁿ hit tiâu lō͘. " | 註釋 串珠 盧導讀台 |
| 6:17 | Góa kā lín siat siú-bōng ê lâng, kóng, " Tio̍h thiaⁿ sàu-kak ê siaⁿ. " Chóng-.sī, in kóng, " Goán m̄-thiaⁿ. " | 註釋 串珠 盧導讀台 |
| 6:18 | Só͘-í, Siōng-chú kóng, " Lia̍t kok, in-ūi ánne lín tio̍h thiaⁿ! Hōe-chiòng, lín tio̍h chai in tiong-kan ū siáⁿ-mi̍h sū. | 註釋 串珠 盧導讀台 |
| 6:19 | Tē, lí tio̍h thiaⁿ! Lí khòaⁿ, Góa beh hō͘ chai-hō lîm-kàu chiahê jîn-bîn, to̍h-sī in tô͘-bô͘ ê kiat-kó; in-ūi in m̄ chun-thàn Góa ê ōe, Góa ê lu̍t-hoat, in mā khì-choa̍t. | 註釋 串珠 盧導讀台 |
| 6:20 | Tùi Sí-bah chhut ê jú-hiuⁿ, tùi hn̄g-hn̄g ê só͘-chāi chhut ê chhiong-pô͘, tòa-lâi hō͘ Góa, ū siáⁿ lō͘-ēng? Lín ê sio-chè bô tit tio̍h chiap-la̍p; lín ê lé-mi̍h, Góa mā bô hoaⁿ-hí. | 註釋 串珠 盧導讀台 |
| 6:21 | Só͘-í, Góa — Siōng-chú ánne soan-pò͘: Lí khòaⁿ, Góa beh hē chó͘-gāi ê chio̍h tī chiahê jîn-bîn ê bīn-chêng. Pē kah kiáⁿ ē chò chi̍t-ē poa̍h tī hit téng-bīn; chhù-piⁿ kah pêng-iú mā lóng ē bia̍t-bông. " | 註釋 串珠 盧導讀台 |
| 6:22 | Pak-hong Lâi ê Chhim-lio̍k-chiáSiōng-chú ánne kóng, " Lí khòaⁿ, ū chi̍t chióng jîn-bîn tùi pak-hong lâi, mā ū chi̍t-ê tōa kok heng-khí, tùi tē-ke̍k lâi. | 註釋 串珠 盧導讀台 |
| 6:23 | In gia̍h kiong kah chhiuⁿ, in chân-jím bô liân-bín; in ê siaⁿ chhin-chhiūⁿ hái hōa-hōa háu. Si-óng ê chabó͘ gín'á, in lóng khiâ bé lia̍t-tīn, chhin-chhiūⁿ chiàn-sū beh kong-kek lí. " | 註釋 串珠 盧導讀台 |
| 6:24 | Ê-lú-sa-lèm lâng kóng, " Goán thiaⁿ tio̍h in ê hong-siaⁿ, chhiú chiū nńg lo̍h-.khì; thòng-khó͘ kā goán khîⁿ tiâu-.leh, thàng-thiàⁿ chhin-chhiūⁿ teh seⁿ kiáⁿ ê chabó͘ lâng. | 註釋 串珠 盧導讀台 |
| 6:25 | Lín m̄ thang chhut-khì chhân-.ni̍h, mā m̄ thang kiâⁿ tī lō͘-.ni̍h; in-ūi tī hia ū tùi-te̍k ê to-kiàm, sì-kho͘-ûi ū kiaⁿ-hiâⁿ. | 註釋 串珠 盧導讀台 |
| 6:26 | Góa ê jîn-bîn, tio̍h hâ môa-pò͘, kō tī hóe-hu tiong. Tio̍h pi-siong, chhin-chhiūⁿ sòng-sit to̍k-seⁿ kiáⁿ, thòng-sim thî-khàu, in-ūi chân-sat ê ē hut-jiân lâi-kàu lán tiong-kan." | 註釋 串珠 盧導讀台 |
| 6:27 | Siōng-chú tùi I-é-lí-miah kóng, " Góa siat-li̍p lí tī Góa ê jîn-bîn tiong, chò chhì-liān ê kah siâⁿ-pó, hō͘ lí chai lâi kā in chhì-liān ê hêng-ûi. | 註釋 串珠 盧導讀台 |
| 6:28 | In lóng sī tōa pōe-ge̍k ê lâng, sì-kè kā lâng húi-pòng. In sī tâng, sī thih, lóng sī kiâⁿ húi-hoāi ê. | 註釋 串珠 盧導讀台 |
| 6:29 | Hong-kūi chhoe hóe teh to̍h, iân í-keng iûⁿ tī hóe lāi; in ti̍t-ti̍t toàn-liān, kàu bóe mā sī khang-khang; in-ūi pháiⁿ ê tái iáu-bōe tû-.khì. | 註釋 串珠 盧導讀台 |
| 6:30 | Lâng ē kā in chheng-chò siū khì-sak ê gîn, in-ūi Siōng-chú í-keng kā in khì-sak. " | 註釋 串珠 盧導讀台 |