Iâ-lī-bí su/耶利米書簡介 線上收聽:中文和合本 台語聖經 客語聖經 福州話聖經 希伯來文讀經 下載檔案 關於語音聖經
48 Mô͘-ap ê Húi-bia̍t
Koan-hē Mô͘-ap, bān-kun ê Siōng-chú — I-su-la-el ê Siōng-tè ánne kóng: Ne-bó ū chai-hō à! In-ūi siū húi-hoāi. Ki-lia̍t-tháim tú tio̍h kiàn-siàu, siū cheng-ho̍k; Bí-su-ka tú tio̍h kiàn-siàu, siū pāi-hoāi.
2 Mô͘-ap bô koh siū oló, ū lâng tī He-si-bóng kè-bô͘ beh hāi i, kóng: Lâi lah, lán lâi kā i chián-tû, hō͘ i bô koh chiâⁿ-chò kok. Mat-mén, lí mā tio̍h tiām-tiām, mài chhut siaⁿ; to-kiàm beh jiok lí.
3 Tùi Ho-lo-niám ū tōa-siaⁿ hoah ê siaⁿ, ū chhiúⁿ-kiap kah tōa ê húi-bia̍t.
4 Mô͘-ap tú tio̍h húi-bia̍t, i ê gín'á teh háu ê siaⁿ hō͘ lâng thiaⁿ-.tio̍h.
5 In-ūi lâng peh-chiūⁿ Lu-hit ê soaⁿ-phiâⁿ, ná kiâⁿ ná khàu, lo̍h Ho-lo-niám ê soaⁿ-phiâⁿ, thiaⁿ tio̍h húi-bia̍t, ai-khàu ê siaⁿ.
6 Lín tio̍h tô-cháu, sûi lâng kò͘ sèⁿ-miā, chhin-chhiūⁿ khòng-iá ê tō͘-siông.
7 Lí in-ūi óa-khò kakī ê só͘ chò kah kakī ê châi-pó, mā ē siū lia̍h. Ke-mô͘-sih kah sio̍k i ê chè-si, kùi-cho̍k, mā lóng ē chò chi̍t-ē siū chhian-sóa.
8 Kiâⁿ húi-bia̍t ê ē kàu ta̍k-ê siâⁿ, bô chi̍t-ê siâⁿ ē bián-.tit. Soaⁿ-kok ē tì-kàu soe-pāi, pêng-goân ē siū húi-hoāi; chiàu Siōng-chú só͘ kóng ê.
9 Tio̍h ēng si̍t hō͘ Mô͘-ap, hō͘ i poe-cháu. I chiahê siâⁿ ē tì-kàu pha-hng, bô lâng tòa.
10 Chhìn-chhìn chhái-chhái chò Siōng-chú ê kang ê tio̍h siū chiù-chó͘; kìm-chí i ê to bak tio̍h hoeh ê mā tio̍h siū chiù-chó͘.
11 Mô͘-ap ê Siâⁿ-chhī Siū Húi-bia̍t
Siōng-chú kóng, " Mô͘-ap tùi chá-kî í-lâi, tiāⁿtiāⁿ hióng-siū pêng-an; chhin-chhiūⁿ chē-chheng ê chiú, bô tùi chit-ê khì-kū piàⁿ tī pa̍t-ê khì-kū, mā m̄ bat siū lia̍h. In-ūi ánne, i ê goân-bī iáu tī-.leh, khì-bī bô piàn.
12 " Lí khòaⁿ, ji̍t-chí teh beh kàu, Góa beh chhe piàⁿ chiú ê khì i hia, kā i piàⁿ chhut-.lâi, piàⁿ khang i ê khì-kū, phah-phòa i ê chiú-àng.
13 Mô͘-ap ē ūi tio̍h Ke-mô͘-sih lâi kiàn-siàu, chhin-chhiūⁿ I-su-la-el ê chú-bîn ūi tio̍h in só͘ óa-khò ê Be-thel lâi kiàn-siàu.
14 Lí ná ē kóng: Goán sī ióng-sū, sī ū la̍t thang kau-chiàn ê lâng?
15 Mô͘-ap piàn-chò pha-hng, tùi-te̍k chiūⁿ-.khì, ji̍p-khì i hiahê siâⁿ. Só͘ kéng-soán ê siàu-liân lâng lo̍h-.khì chiū tú tio̍h thâi-sí; che sī kun-ông — miâ chò bān-kun ê Siōng-chú kóng ê.
16 Mô͘-ap ê chai-hō teh beh kàu, i ê hoān-lān chin kín to̍h kàu.
17 Kiàn-nā tī i ê sì-kho͘-ûi bat i ê miâ ê, lín lóng tio̍h ūi i pi-siong, kóng: Hitê ióng ê thûi, súi ê koái-á, ná ē áu-tn̄g kàu ánne?
18 Tòa tī Ti-bóng ê jîn-bîn, lí tio̍h tùi lí êng-kng ê ūi lo̍h-.lâi, chē tī ta-sò ê tē; in-ūi húi-bia̍t Mô͘-ap ê khí-lâi kong-kek lí, húi-hoāi lí hiahê siâⁿ-pó.
19 Tòa tī A-ló-el ê lâng, lí tio̍h khiā tī lō͘ piⁿ koan-khòaⁿ, mn̄g tô-cháu ê chapo͘ lâng kah thoat-lī ê chabó͘ lâng, kóng: Sī siáⁿ-mi̍h tāichì?
20 Mô͘-ap in-ūi húi-hoāi lâi kiàn-siàu, lín tio̍h thî-khàu tōa-siaⁿ hoah, tio̍h tī Al-nông pò-kò, kóng: Mô͘-ap piàn-chò pha-hng!
21 " Hêng-hoa̍t í-keng kàu tī pêng-goân ê tē, tī Ho-lóng, tī Ia-hat, tī Me-hoa-at,
22 tī Ti-bóng, tī Ne-bó, tī Bia̍t-ti-bu-la-thiám,
23 tī Ki-lia̍t-tháim, tī Bia̍t-ga-mul, tī Bia̍t-me-óng,
24 tī Ka-lio̍k, tī Bo-chu-la̍h kah Mô͘-ap tē hn̄g-kīn só͘-ū ê siâⁿ.
25 Mô͘-ap ê kak chám-tn̄g à, i ê chhiú-kut at-tn̄g à. Che sī Siōng-chú kóng ê. "
26 Mô͘-ap ē Siū Lêng-jio̍k
Siōng-chú kóng, " Lín tio̍h hō͘ Mô͘-ap chiú-chùi, i ē tī i só͘-thò͘ ê mi̍h tiong-kan kō-lâi kō-khì, koh ē hō͘ lâng thí-chhiò.
27 I-su-la-el kám m̄ bat hō͘ lí thí-chhiò? I kám sī tī chha̍t ê tiong-kan hō͘ lâng chhâ-chhut? In-ūi lí ta̍k pái kóng-khí in ê sî, chiū iô thâu pōaⁿ hīⁿ.
28 " Tòa tī Mô͘-ap ê lâng, lín tio̍h lī-khui chiahê siâⁿ, khì tòa tī chio̍h-pôaⁿ, chhin-chhiūⁿ pan-kah chò siū tī khang-kháu ê piⁿ-á.
29 Goán ū thiaⁿ tio̍h Mô͘-ap ê kiau-ngō͘, i ê kiau-ngō͘ kàu-ke̍k; i ê chū-ko, i ê kiau-ngō͘, i ê bú-bān, chûn-sim kakī lia̍h-chò tōa.
30 Góa chai i ê siū-khì kah i khang-khang ê khoa-kháu, só͘ kiâⁿ lóng sī khang-khang bô lō͘-ēng.
31 In-ūi ánne, Góa beh ūi tio̍h Mô͘-ap thî-khàu, Góa beh ūi tio̍h Mô͘-ap choân tē tōa-siaⁿ hoah; in ē ūi tio̍h Kel-ha-la-siat ê lâng thó͘-khùi.
32 Si-bú-mah ê phû-tô chhiū, Góa ūi tio̍h lí thî-khàu, pí Ia-chel lâng ê thî-khàu khah siong-tiōng. Lí ê ki thòaⁿ-kòe hái, ti̍t-ti̍t chhun-kàu Ia-chel ê hái. Hitê kiâⁿ húi-bia̍t ê í-keng lîm-kàu lí beh siu-sêng ê kóe-chí kah lí ê phû-tô.
33 Pûi ê chhân kah Mô͘-ap tē, hiahê hoaⁿ-hí kah khoài-lo̍k lóng bô-.khì; Góa hō͘ chiú-khut ê chiú bô-.khì, bô lâng ta̍h chiú lâi chhut hoaⁿ-hí ê siaⁿ, hit-ê siaⁿ m̄-sī hoaⁿ-hí ê siaⁿ.
34 " In-ūi He-si-bóng ai-siong ê siaⁿ thàng-kàu E-lé-a-leh, ti̍t-ti̍t kàu Ia-hat, koh tùi Cho-al kàu Ho-lo-niám, it-ti̍t kàu Eg-lat-si-li-siah, in-ūi Nim-lim ê chúi it-tēng ē ta-.khì.
35 Góa beh tī Mô͘-ap tē, hō͘ hit-ê hiàn chè tī soaⁿ-thâu tôaⁿ ê kah hit-ê sio hiuⁿ tī i hiahê sîn-bêng ê lóng soah-.khì.
36 " In-ūi ánne, Góa ê sim ūi tio̍h Mô͘-ap chhin-chhiūⁿ phín-siau teh tân, Góa ê sim ūi tio̍h Kel-ha-la-siat lâng chhin-chhiūⁿ phín-siau teh tân, in-ūi in só͘ chek-chū ê châi-bu̍t lóng bô-.khì à.
37 Thâu-khak ta̍k-ê kng liu-liu, chhùi-chhiu ta̍k-ê chián té-té, chhiú-kut ta̍k-ê koah siong, io hâ môa-pò͘.
38 Tī Mô͘-ap ta̍k keng ê chhù téng kah i hiahê ke-lō͘, ta̍k só͘-chāi lóng ū thî-khàu; in-ūi Góa kong-phòa Mô͘-ap, chhin-chhiūⁿ kòng-phòa bô kah-ì ê khì-kū. Che sī Siōng-chú kóng ê.
39 I húi-hoāi kàu ánne! In thî-khàu kàu ánne! Mô͘-ap kiàn-siàu oa̍t tò-tńg kàu ánne! Chhin-chhiūⁿ ánne, Mô͘-ap ē hō͘ sì-kho͘-ûi ê lâng thí-chhiò koh tio̍h-kiaⁿ kah gāng-.khì. "
40 Mô͘-ap Bô Lō͘ Thang Tô-cháu
In-ūi Siōng-chú ánne kóng, " Lí khòaⁿ, i ē chhin-chhiūⁿ eng-chiáu poe-.lâi, tī Mô͘-ap thí-khui i ê si̍t.
41 Ka-lio̍k hō͘ lâng cheng-ho̍k khì, hiahê siâⁿ-pó hō͘ lâng chiàm-.khì. Kàu hit ji̍t, Mô͘-ap chiahê ióng-sū ê sim, chhin-chhiūⁿ beh seⁿ kiáⁿ ê chabó͘ lâng ê sim.
42 Mô͘-ap ē tú tio̍h húi-bia̍t, bô koh chiâⁿ-chò kok, in-ūi in kiau-ngō͘, pōe-ge̍k Siōng-chú.
43 Tòa tī Mô͘-ap ê jîn-bîn, kiaⁿ-hiâⁿ, hām-kheⁿ kah oa̍h-tauh lóng ē lîm-kàu tī lí.
44 Cháu-phiah kiaⁿ-hiâⁿ ê ē poa̍h-lo̍h hām-kheⁿ; tùi hām-kheⁿ peh khí-.lâi ê ē hō͘ oa̍h-tauh tauh-.tio̍h, in-ūi Góa beh hō͘ hêng-hoa̍t ê nî lîm-kàu tī Mô͘-ap. Che sī Siōng-chú kóng ê.
45 Hiahê tô-cháu ê khùi-la̍t í-keng chīn-pōng, khiā tī He-si-bóng ìm-ńg ē; chóng-.sī, hóe tùi He-si-bóng chhut-.lâi, hóe-iām tùi Si-hông hoat-chhut, sio-khì Mô͘-ap ê choân-pō͘ pian-kài kah chok-loān ê lâng thâu-khak téng bīn.
46 Mô͘-ap, lí ū chai-hō à! Ke-mô͘-sih ê jîn-bîn bia̍t-bông à! Lí ê chèng kiáⁿ hō͘ lâng lia̍h-.khì, lí ê chèng chabó͘ kiáⁿ chò siū lia̍h ê.
47 " Chóng-.sī, kàu ji̍t-āu, Góa beh hō͘ Mô͘-ap siū lia̍h ê lâng tò tńg-.lâi. Koan-hē Mô͘-ap siū sím-phòaⁿ ê ōe, kàu chia ûi-chí. "
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。