Ko-lîm-to Hō͘ su/哥林多後書簡介 線上收聽:中文和合本 台語聖經 台語聖經(長老會傳播中心授權） 客語聖經 福州話聖經 粵語和合本 希臘文 下載檔案 關於語音聖經
10 Páu-lô Ūi Ka-kī ê Thoân-kàu Piān-hō͘
Lâng kóng góa kah lín chò-hóe ê sî chin kheh-khì kah lín sio-lī ê sî chiū chin giâm keh, góa — Páu-lô chitmá beh ēng Ki-tok ê un-jiû kah jîn-chû kā lín khó͘-khǹg.
2 Góa khì lín hia ê sî, m̄ thang pek góa tùi lín bô kheh-khì. Tùi hiahê phoe-phêng goán ēng sio̍k-sè ê tōng-ki teh chò tāichì ê lâng, góa it-tēng ē tùi in bô kheh-khì.
3 In-ūi goán sûi-jiân tòa tī chit sè-kan teh seng-oa̍h, pēng bô chiàu sio̍k-sè ê tōng-ki teh hùn-tàu.
4 Goán hùn-tàu ēng ê khì-kū m̄-sī sio̍k-sè ê, sī ēng Siōng-tè ū khùi-la̍t ê bú-khì, liân kian-kò͘ ê siâⁿ-pó to ē-tàng kong-phòa. Goán beh thui-hoan hiahê hi-ké ê giân-lūn,
5 Kā chó͘-tòng lâng jīn-bat Siōng-tè ê it-chhè kiau-ngō͘ lóng siau-bia̍t, koh kái-piàn múi chi̍t-ê lâng ê sim-su ì-liām, hō͘ i oân-choân sūn-ho̍k Ki-tok.
6 Lín oân-choân sūn-ho̍k liáu-āu, goán chiū beh lâi chhú-hoa̍t hiahê m̄ sūn-ho̍k ê lâng.
7 Lín kantaⁿ teh khòaⁿ gán-chiân ê sū. Nā ū lâng jīn-ûi kakī sī sio̍k Ki-tok, i tio̍h koh siūⁿ khòaⁿ māi, i sio̍k Ki-tok, goán mā sī sio̍k Ki-tok.
8 Chú só͘ siúⁿ-sù hō͘ goán ê koân-pèng, sī beh kā lín chō-chiū, m̄-sī beh kā lín húi-hoāi; góa tùi chit-ê koân-pèng nā ū khah kòe-thâu khoa-kháu, góa mā bē kám-kak kiàn-siàu.
9 Góa bô ài hō͘ lín siūⁿ kóng góa ēng phoe teh kā lín khióng-hat.
10 In-ūi ū lâng kóng Páu-lô ê phoe giâm-keh koh kiông-ngē; m̄ koh, bīn tùi bīn chò-hóe ê sî, i khiok chin un-jiû, kóng-ōe mā bô chin te̍k-pia̍t.
11 Kóng chit khoán ōe ê lâng tio̍h chai, goán bô tī lín hia ê sî, phoe sī án-chóaⁿ siá, goán kàu lín hia ê sî mā ē ánne chò.
12 Goán m̄-káⁿ kah hiahê tián hong-sîn ê lâng pí-phēng. In ēng kakī phoe-phêng kakī, mā ēng kakī pí-phēng kakī, si̍t-chāi bô tì-hūi.
13 M̄ koh, goán bô beh kòe-hūn khoa-kháu, kantaⁿ beh chiàu Siōng-tè kā goán hān-tiāⁿ ê hoān-ûi, chit-ê hoān-ûi pau-hâm goán tī lín tiong-kan ê kang-chok.
14 Lín kì-jiân tī hoān-ûi lāi, ánne, goán téng-pái khì lín hia thoân Ki-tok ê hok-im pēng bô chhiau-kòe hoān-ûi.
15 Tam bīn Khoa-kháu Chú
Goán bô ēng pa̍t lâng lô-khó͘ oân-sêng ê tāichì tòng-chò kakī ê sêng-chek lâi khoa-kháu; goán ǹg-bāng lín ê sìn-sim ē ná cheng-tióng, goán tī lín tiong-kan kang-chok ê hoān-ûi ē ná khui-khoah.
16 Án-ne, goán chiah thang kā hok-im thoân khì lín í-gōa ê tē-khu, m̄-bián ēng pa̍t lâng hoān-ûi lāi í-keng oân-sêng ê tāichì lâi khoa-kháu.
17 Keng-tián ū kì-chài, Beh khoa-kháu ê lâng, tio̍h ēng Chú ê chok-ûi lâi khoa-kháu. (chù, ILM 9:24)
18 In-ūi chin-chiàⁿ ta̍t-tit oló ê, sī Chú só͘ oló ê lâng, m̄-sī chū-khoa ê lâng.
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。