Khé-sī-lio̍k/啟示錄簡介 線上收聽:中文和合本 台語聖經 台語聖經(長老會傳播中心授權） 客語聖經 福州話聖經 粵語和合本 希臘文 下載檔案 關於語音聖經
8 Iûⁿ-ko khui tē-chhit-ê hong-ìn ê sî, thiⁿ-téng tiām-tiām iok pòaⁿ-tiám-cheng.
2 Pûn Thâu Sì Ki Kó͘-chhoe Ī-kò ê Chai-hō
Jiân-āu góa khòaⁿ tio̍h hit chhit-ê thiⁿ-sài khiā tī Siōng-tè ê bīn-chêng, in ū niá-siū chhit ki kó͘-chhoe.
3 Lēng-gōa chi̍t-ê thiⁿ-sài phâng kim hiuⁿ-lô͘, lâi khiā tòa chè-tôaⁿ piⁿ; i ū niá-siū chin chē hiuⁿ, chiū kā chèng sìn-tô͘ ê kî-tó chò-hóe hiàn tī pó-chō chêng ê kim chè-tôaⁿ téng.
4 Hiuⁿ-ian kah chèng sìn-tô͘ ê kî-tó tùi thiⁿ-sài ê chhiú chhèng kàu Siōng-tè ê bīn-chêng.
5 Jiân-āu thiⁿ-sài phâng hit-ê hiuⁿ-lô͘, kā chè-tôaⁿ téng ê hóe té kàu móa, chiah hiat lo̍h-khì tē-chiūⁿ. Sûi-sî chiū ū tân-lûi ê siaⁿ, sihnà kah tē-tāng.
6 Gia̍h chhit ki kó͘-chhoe hit chhit-ê thiⁿ-sài, chún-pī hó-sè beh pûn.
7 Thâu chi̍t-ê thiⁿ-sài chi̍t ē pûn, sûi-sî ū pha̍uh kah hóe chham hoeh piàⁿ lo̍h tē-chiūⁿ; saⁿ-hūn chi-it ê tē sio-sio-.khì, saⁿ-hūn chi-it ê chhiū-ba̍k mā sio-sio-.khì, só͘-ū ê chheⁿ-chháu mā lóng sio-sio-.khì.
8 Tē-jī-ê thiⁿ-sài chi̍t ē pûn, sûi-sî ū chhin-chhiūⁿ hóe teh sio ê tōa soaⁿ hiat-lo̍h hái; saⁿ-hūn chi-it ê hái piàn-chò hoeh,
9 Hái ni̍h só͘-ū ê oa̍h-mi̍h ū saⁿ-hūn chi-it sí-.khì, chûn-chiah mā ū saⁿ-hūn chi-it phòa-khì.
10 Tē-saⁿ-ê thiⁿ-sài chi̍t ē pûn, sûi-sî ū tōa lia̍p chheⁿ tùi thiⁿ-téng lak lo̍h-.lâi, chhin-chhiūⁿ teh-to̍h ê hóe-pé, lak tī saⁿ-hūn chi-it ê kang-hô kah chúi-goân.
11 Chit-lia̍p chheⁿ ê miâ kiò-chò " Khó͘ 艾", i hō͘ saⁿ-hūn chi-it ê chúi piàn khó͘; chin chē lâng ūi tio̍h chiahê chúi sí-.khì, in-ūi chúi piàn khó͘.
12 Tē-sì-ê thiⁿ-sài chi̍t ē pûn, ji̍t ê saⁿ-hūn chi-it, goe̍h ê saⁿ-hūn chi-it, chheⁿ ê saⁿ-hūn chi-it lóng siū tio̍h kong-kek, tì-sú ji̍t, goe̍h, chheⁿ ê saⁿ-hūn chi-it piàn-chò àm. Ji̍t-sî saⁿ-hūn chi-it bô kng, àm-sî mā saⁿ-hūn chi-it bô kng.
13 Jiân-āu góa koh khòaⁿ, ū thiaⁿ tio̍h chi̍t chiah tī khong-tiong teh poe ê eng-chiáu tōa-siaⁿ kóng, " Ū chai-hō à, ū chai-hō à, tòa tī tē-chiūⁿ ê lâng ū chai-hō à, in-ūi kî-tha saⁿ-ê thiⁿ-sài teh beh koh pûn kó͘-chhoe! "
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。