Khé-sī-lio̍k/啟示錄簡介 線上收聽:中文和合本 台語聖經 台語聖經(長老會傳播中心授權） 客語聖經 福州話聖經 粵語和合本 希臘文 下載檔案 關於語音聖經
10 Iô-há-neh Siu tio̍h Hian-khui ê Sè-kńg Chheh
Góa koh khòaⁿ tio̍h lēng-gōa chi̍t-ê ū tōa khùi-la̍t ê thiⁿ-sài tùi thiⁿ kàng lo̍h-.lâi; i ēng hûn chò saⁿ-chhēng, thâu-khak téng ū khēng, i ê bīn chhin-chhiūⁿ ji̍t-thâu, kha chhin-chhiūⁿ hóe-thiāu.
2 I ê chhiú the̍h chi̍t kńg í-keng hian-khui ê sè-kńg chheh, chiàⁿ kha-ta̍h tī hái-.ni̍h, tò-kha ta̍h tī tē-chiūⁿ.
3 I chhin-chhiūⁿ sai teh háu, tōa-siaⁿ hoah ê sî, hit chhit-ê lûi chiū chhut siaⁿ hôe-èng.
4 Chhit-ê lûi chhut siaⁿ liáu-āu, góa tú beh siá lo̍h-.lâi ê sî, góa thiaⁿ tio̍h tùi thiⁿ ū siaⁿ kóng, " Chhit-ê lûi só͘ kóng ê, lí tio̍h pó-siú pì-bi̍t, m̄ thang siá lo̍h-.lâi. "
5 Jiân-āu góa khòaⁿ tio̍h hit-ê khiā tī hái kah tē ê thiⁿ-sài gia̍h-khí i ê chiàⁿ chhiú ǹg thiⁿ,
6 Kí hit ūi chhòng-chō thiⁿ kah thiⁿ-téng ê mi̍h, tē kah tē-chiūⁿ ê mi̍h, hái kah hái-.ni̍h ê mi̍h ê hit ūi éng-oán oa̍h ê Siōng-tè, lâi chiùchōa kóng, " Bē koh iân-chhiân lò͘!
7 To̍k-to̍k tī tē-chhit-ê thiⁿ-sài pûn kó͘-chhoe ê ji̍t, kó͘-chhoe ê siaⁿ hiáng ê sî, Siōng-tè thoân hō͘ I ê lô͘-po̍k, to̍h-sī hiahê sian-ti ê ò-pì chiū ē si̍t-hiān. "
8 Í-chêng tùi thiⁿ-téng kah góa kóng-ōe hit-ê siaⁿ, taⁿ koh tùi góa kóng, " Lí khì kā kha-ta̍h tī hái kah tē-chiūⁿ hit-ê thiⁿ-sài chhiú tiong hit kńg hian-khui ê chheh the̍h-.lâi. "
9 Góa chiū khì hit-ê thiⁿ-sài hia, chhiáⁿ i kā hit kńg sè-kńg chheh hō͘ góa. I kā góa kóng, " Lí the̍h-khì kā i chia̍h lo̍h-.khì. Lí ê pak-tó͘ ē kám-kak khó͘, tī chhùi lāi ē tiⁿ kah chhin-chhiūⁿ bi̍t. "
10 Góa chiū tùi thiⁿ-sài ê chhiú the̍h hit pún sè-kńg chheh lâi chia̍h, chhùi lāi kó-jiân tiⁿ kah chhin-chhiūⁿ bi̍t, thun lo̍h-khì pak-tó͘ chiū piàn khó͘.
11 Thiⁿ-sài kā góa kóng, " Lí tio̍h koh soan-pò͘ koan-hē Siōng-tè tùi kok chióng bîn-cho̍k, kok-ka, gí-giân kah kun-ông só͘ ī-giân ê tāichì. "
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。