Le̍k-tāi-chì Hā-koàn/歷代志下簡介 線上收聽:中文和合本 台語聖經 客語聖經 福州話聖經 希伯來文讀經 下載檔案 關於語音聖經
1:1 Só͘-lô-móng Ông Kî-kiû Tì-hūi
( LOS 3: 1-15)
Ta-bi̍t ê kiáⁿ Só͘-lô-móng ê kok-ūi kian-kò͘, Siōng-chú — i ê Siōng-tè kah i tāichì, hō͘ i put-chí tōa heng-ōng.
1:2 Só͘-lô-móng tùi I-su-la-el jîn-bîn, to̍h-sī iâⁿ-tiúⁿ, liân-tiúⁿ, sím-phòaⁿ-koaⁿ, í-ki̍p choân I-su-la-el ê siú-léng kah cho̍k-tiúⁿ kóng-ōe.
1:3 Só͘-lô-móng kah hōe-chiòng lóng khì-kàu Gi-bóng ê soaⁿ-thâu tôaⁿ, tī hia ū Siōng-tè ê hōe-bō͘, to̍h-sī Siōng-tè ê lô͘-po̍k Mô͘-se tī khòng-iá só͘ chō ê.
1:4 To̍k-to̍k Siōng-tè ê kūi, Ta-bi̍t í-keng tùi Ki-lia̍t-iâ-lîm tòa i khì-kàu Ta-bi̍t thè i chún-pī ê só͘-chāi, in-ūi i bat tī Ê-lú-sa-lèm thè Siōng-tè tah pò͘-pêⁿ.
1:5 Jî-chhiáⁿ Hu-ul ê sun, U-lī ê kiáⁿ Be-cha-lel só͘ chō ê tâng-tôaⁿ mā tī hia, tī Siōng-chú ê hōe-bō͘ chêng, Só͘-lô-móng kah hōe-chiòng lóng lâi chia.
1:6 Só͘-lô-móng chiūⁿ-kàu Siōng-chú ê bīn-chêng ê tâng-tôaⁿ, to̍h-sī tī hōe-bō͘ hia, hiàn chi̍t chheng chiah ê chengseⁿ tī hit téng-bīn chò sio-chè.
1:7 Hit mê, Siōng-chú tùi Só͘-lô-móng thok-bāng, kā i kóng, " Lí ài Góa siúⁿ-sù hō͘ lí siáⁿ-mi̍h, lí thang kiû. "
1:8 Só͘-lô-móng tùi Siōng-chú kóng, " Lí bat tùi góa ê lāu-pē Ta-bi̍t si tōa chû-ài, koh hō͘ góa sòa-chiap i chò ông.
1:9 Siōng-chú — Siōng-tè ah, taⁿ kiû Lí kiâⁿ Lí só͘ èng-ín góa ê lāu-pē Ta-bi̍t ê ōe, in-ūi Lí siat-li̍p góa chò chiahê jîn-bîn ê ông, in chhin-chhiūⁿ tē-chiūⁿ ê thô͘-soa hiah chē.
1:10 Kiû Lí siúⁿ-sù góa tì-hūi kah chhong-bêng, hō͘ góa thang chhut-ji̍p tī chiahê jîn-bîn ê bīn-chêng, in-ūi siáⁿ lâng ē-tàng sím-phòaⁿ Lí hiah tōa kok ê jîn-bîn? "
1:11 Siōng-tè tùi Só͘-lô-móng kóng, " Lí í-keng ū chit khoán sim, bô kiû châi-bu̍t, hó-gia̍h, chun-kùi kah lí ê tùi-te̍k ê sèⁿ-miā, mā bô kiû kakī tn̂g hòe-siū, to̍k-to̍k ūi kakī kiû tì-hūi kah chhong-bêng, hō͘ lí thang sím-phòaⁿ Góa ê chú-bîn, to̍h-sī Góa siat-li̍p lí chò in ê ông ê,
1:12 só͘-í, siúⁿ-sù hō͘ lí tì-hūi kah chhong-bêng, Góa mā ē siúⁿ-sù hō͘ lí châi-bu̍t, hó-gia̍h kah chun-kùi. Tī lí í-chêng ê lia̍t ông lóng bô ū ánne, tī lí í-āu mā bē koh ū ánne. "
1:13 Só͘-lô-móng Ông ê Bú-le̍k kah Châi-hù
( LOS 10: 26-29)
Chiū ánne, Só͘-lô-móng tùi Gi-bóng soaⁿ-thâu tôaⁿ ê hōe-bō͘ chêng tńg-lâi Ê-lú-sa-lèm, chò ông koán-lí I-su-la-el.
1:14 Só͘-lô-móng chū-chi̍p chiàn-chhia kah bé-peng, ū chiàn-chhia chi̍t-chheng sì-pah tâi, bé-peng chi̍t-bān nn̄g-chheng miâ, an-tì tī tún chhia ê siâⁿ, mā kah ông tī Ê-lú-sa-lèm.
1:15 Ông tī Ê-lú-sa-lèm hō͘ kim-gîn ná chhin-chhiūⁿ chio̍h-thâu, hō͘ pek-hiuⁿ chhiū ná chhin-chhiūⁿ pêng-goân ê sng-châi chhiū, in-ūi ū chin chē.
1:16 Só͘-lô-móng só͘-ū ê bé sī tùi Ai-gi̍p lâi ê, to̍h-sī ông ê senglí lâng chi̍t tīn chi̍t tīn chiàu kè-chîⁿ bé-.lâi ê.
1:17 In tùi Ai-gi̍p bé-.lâi ê chhia, múi tâi kè-ta̍t gîn la̍k pah si-khel, bé múi chi̍t chiah kè-ta̍t chi̍t-pah gō͘-cha̍p si-khel. Hiat lâng chiahê ông kah A-lâm chiahê ông, lóng tùi in keng-chhiú chiàu ánne tòa chhut-.lâi.
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。