Iâ-lī-bí su/耶利米書簡介 線上收聽:中文和合本 台語聖經 客語聖經 福州話聖經 希伯來文讀經 下載檔案 關於語音聖經
19:1 Phòa-chhùi ê Hûi-pân
Siōng-chú hoan-hù góa khì bé sio-hûi lâng ê hûi-pân, koh chhōa jîn-bîn ê láu-tōa kah chè-si tiong ê láu-tōa,
19:2 chhut-khì kiò-chò " Biān-hin-nóm ê soaⁿ-kok " ê Hal-chhut ê mn̂g-kháu hia, soan-pò͘ I só͘ hoan-hù góa ê ōe,
19:3 kóng, " Iô-tah ê lia̍t ông kah tòa tī Ê-lú-sa-lèm ê jîn-bîn, lín tio̍h thiaⁿ Siōng-chú ê ōe; bān-kun ê Siōng-chú — I-su-la-el ê Siōng-tè ánne kóng: Lí khòaⁿ, Góa beh hō͘ chai-hō lîm-kàu chit-ê só͘-chāi, só͘-ū thiaⁿ ê lâng, in ê hīⁿ-khang it-tēng ē tiō thiàu.
19:4 In-ūi in khì-sak Góa, khòaⁿ chit-ê só͘-chāi chhin-chhiūⁿ gōa-pang, koh tī chia sio hiuⁿ hō͘ pa̍t-ê sîn-bêng, to̍h-sī in í-chêng só͘ m̄ bat ê; in ê chó͘-sian kah Iô-tah lia̍t ông mā sī ánne, koh hō͘ bô chōe ê lâng ê hoeh phiàn-móa tī chit-ê só͘-chāi,
19:5 koh ūi Ba-al khí soaⁿ-thâu ê tôaⁿ, thang tī hóe tiong sio in ê kiáⁿ, chò sio-chè lâi hiàn hō͘ Ba-al. Che m̄-sī Góa só͘ bēng-lēng ê, m̄-sī Góa só͘ thê-khí ê, mā m̄-sī Góa ê sim só͘ siūⁿ ê.
19:6 In-ūi ánne, ji̍t-chí teh beh kàu, chit-ê só͘-chāi bô koh kiò-chò To-hu-teh kah Biān-hin-nóm ê soaⁿ-kok, tian-tò kiò-chò ' Sio-thâi ê soaⁿ-kok'.
19:7 Góa beh tī chit-ê só͘-chāi hō͘ Iô-tah kah Ê-lú-sa-lèm ê kè-bô͘ kui tī khang-khang, mā beh hō͘ in tī tùi-te̍k ê bīn-chêng tó tī to hā kah siàu-siūⁿ in ê sèⁿ-miā ê lâng ê chhiú-thâu. In ê sin-si, Góa beh hō͘ khong-tiong ê poe-chiáu kah tē-chiūⁿ ê iá-siù chò chia̍h-mi̍h.
19:8 Góa beh hō͘ chit-ê siâⁿ chò thang tio̍h-kiaⁿ kah thí-chhiò ê; só͘-ū keng-kòe ê lâng ē in-ūi chit-ê siâⁿ só͘ tú-.tio̍h ê chai-hō lâi tio̍h-kiaⁿ kah thí-chhiò.
19:9 Góa beh hō͘ in tī ûi-khùn siū pek-hāi ê tiong-kan, to̍h-sī tùi-te̍k kah siàu-siūⁿ in ê sèⁿ-miā ê lâng pek-hāi in ê sî, ta̍k lâng chia̍h in ê kiáⁿ ê bah kah chabó͘ kiáⁿ ê bah, í-ki̍p pêng-iú ê bah.
19:10 " Kóng soah, lí tio̍h siak-phòa hit-ê hûi-pân, hō͘ tâng kiâⁿ ê lâng chhin-ba̍k khòaⁿ-.tio̍h,
19:11 Koh kā in kóng: ' Bān-kun ê Siōng-chú ánne kóng: Góa beh ánne phah-phòa chit-ê siâⁿ kah chiahê jîn-bîn, chhin-chhiūⁿ lâng siak-phòa sio-hûi lâng ê hûi-khì, bē koh siu-pó͘-.tit. Jî-chhiáⁿ lâng beh tī To-hu-teh bâi-chòng sí-lâng, kàu bô chhun só͘-chāi.
19:12 Góa beh ánne khoán-thāi chit-ê só͘-chāi kah tòa tī kî-tiong ê jîn-bîn, hō͘ chit-ê siâⁿ ná chhin-chhiūⁿ To-hu-teh.
19:13 Ê-lú-sa-lèm ê chhù kah Iô-tah lia̍t ông ê chhù, í-keng òe lahsap ê lóng ē chhin-chhiūⁿ To-hu-teh, in-ūi tī hiahê chhù téng, lâng ǹg thiⁿ-téng ê bān-siōng sio hiuⁿ, ǹg pa̍t chióng ê sîn-bêng koàn-tiān. '"
19:14 I-é-lí-miah tùi To-hu-teh, to̍h-sī Siōng-chú chhe i khì thoân bēng-lēng ê só͘-chāi, tò tńg-.lâi, khiā tī Siōng-chú ê tiān ê īⁿ lāi, tùi kûn-chiòng kóng,
19:15 " Bān-kun ê Siōng-chú — I-su-la-el ê Siōng-tè ánne kóng: ' Lí khòaⁿ, Góa beh hō͘ Góa só͘ kóng it-chhè hêng-hoa̍t in ê chai-hō kàu tī chit-ê siâⁿ kah só͘-ū sio̍k i ê siâⁿ, in-ūi in ngē in ê ām-kún, m̄-khéng thiaⁿ Góa ê ōe.' "
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。