Má-thài Hok-im/馬太福音簡介 線上收聽:中文和合本 台語聖經 台語聖經(長老會傳播中心授權） 客語聖經 福州話聖經 粵語和合本 希臘文 下載檔案 關於語音聖經
3:1 Kiâⁿ Sé-lé Iô-há-neh ê Thoân-tō
( Mk 1: 1-8; Lk 3: 1-9, 15-17; Ih 1: 19-28)
Hit sî, kiâⁿ sé-lé Iô-há-neh lâi-kàu Iô-tá-iah ê khòng-iá soan-káng tō-lí,
3:2 I soan-iông kóng, " Lín tio̍h hóe-kái, in-ūi thian-kok teh beh kàu à. "
3:3 Chit-ê lâng to̍h-sī I-sá-iah sian-ti só͘ teh kóng ê, ū siaⁿ tī khòng-iá teh hoah, Tio̍h ūi Chú chún-pī tō-lō͘, siu-ti̍t I beh kiâⁿ ê sió-lō͘. (chù, ISI 40:3)
3:4 Iô-há-neh chhēng lo̍k-tô-mn̂g ê saⁿ, io hâ phôe-tòa, i só͘ chia̍h ê sī chháu-meh kah iá-bi̍t.
3:5 Hit sî, Ê-lú-sa-lèm kah choân Iô-tá-iah séng, í-ki̍p Iol-tàn hô sì-kho͘-ûi ê lâng lóng chhut-lâi chhōe Iô-há-neh.
3:6 In jīn chōe, Iô-há-neh chiū tī Iol-tàn hô kā in sé-lé.
3:7 Iô-há-neh khòaⁿ tio̍h chin chē Hoa-lí-sái phài kah Sat-to-kai phài ê lâng lâi beh hō͘ i sé-lé, chiū kā in kóng, " Lín chiahê to̍k-chôa, siáⁿ lâng kéng-kò lín siám-phiah Siōng-tè teh beh hoat ê siū-khì?
3:8 Taⁿ lín tio̍h ēng hêng-ûi lâi chèng-bêng lín chin-chiàⁿ ū hóe-kái.
3:9 M̄-thang kakī siūⁿ kóng, ' Ū A-bu-la-hàm chò goán ê chó͘-sian. ' Góa kā lín kóng, Siōng-tè ē-tàng tùi chiahê chio̍h-thâu seⁿ-chhut A-bu-la-hàm ê kiáⁿ-sun.
3:10 Taⁿ pó͘-thâu í-keng khòa tī chhiū thâu; nā bô kiat hó kóe-chí ê chhiū, lóng beh kā i chhò khí-.lâi, hiat lo̍h-khì hóe-.ni̍h.
3:11 Góa ēng chúi kā lín sé-lé, sī beh piáu-bêng lín ū hóe-kái, m̄ koh, tī góa āu-bīn teh beh lâi ê hit ūi, pí góa khah ū koân-lêng, góa liân kā I kōaⁿ-ê to bē kham-tit. I beh ēng Sèng Sîn kah hóe kā lín sé-lé.
3:12 I ê chhiú the̍h pòa-ki, beh kā be̍h-tiâⁿ ê be̍h-á choân-pō͘ pòa chheng-khì. I ē kā be̍h-á siu ji̍p-khì chhng-khò͘, m̄ koh, be̍h-hiuⁿ téng-téng bô lō͘-ēng ê mi̍h, ē ēng bē hoa-khì ê hóe kā i sio-tiāu. "
3:13 I-é-su Siū Sé-lé
( Mk 1: 9-11; Lk 3: 21-22)
Hit sî, I-é-su tùi Ga-lí-la-iah séng lâi-kàu Iol-tàn hô chhōe Iô-há-neh, beh hō͘ i sé-lé.
3:14 M̄ koh, Iô-há-neh kā I chó͘-chí, kóng, " Góa eng-kai tio̍h tùi Lí niá siū sé-lé, Lí ná ē tian-tò lâi chhōe góa? "
3:15 I-é-su ìn i kóng, " Taⁿ chhiáⁿ ín-chún góa ánne chò, chiah ha̍h Siōng-tè só͘ iau-kiû ê. " Iô-há-neh chiū tông-ì ánne chò.
3:16 I-é-su niá siū sé-lé liáu-āu, chiū sûi-sî tùi chúi-.ni̍h khí-.lâi. Thiⁿ hut-jiân ūi tio̍h I khui, I chiū khòaⁿ tio̍h Siōng-tè ê Sèng Sîn, chhin-chhiūⁿ hún-chiáu kàng-lîm tī I ê téng-bīn.
3:17 Koh ū siaⁿ tùi thiⁿ-téng kóng, " Chit-ê sī góa só͘ thiàⁿ ê Kiáⁿ, I sī góa chin-chiàⁿ kah-ì ê. "
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。