Má-thài Hok-im/馬太福音簡介 線上收聽:中文和合本 台語聖經 台語聖經(長老會傳播中心授權） 客語聖經 福州話聖經 粵語和合本 希臘文 下載檔案 關於語音聖經
11:1 I-é-su hoan-hù cha̍p-jī sù-tô͘ liáu-āu, chiū lī-khui hia, khì hù-kīn ê siâⁿ kà-sī lâng kah thoân hok-im.
11:2 Kiâⁿ Sé-lé Iô-há-neh ê Gî-būn
( Lk 7: 18-35)
Iô-há-neh tī kaⁿ-.ni̍h thiaⁿ tio̍h Ki-tok só͘ chò ê tāichì, chiū chhe bûn-tô͘ khì mn̄g I kóng,
11:3 " Lí kám sī teh beh lâi ê hit ūi? Á-sī goán tio̍h koh tán lēng-gōa chi̍t ūi? "
11:4 I-é-su ìn kóng, " Lín tio̍h kā só͘ thiaⁿ tio̍h kah só͘ khòaⁿ-.tio̍h ê, khì kā Iô-há-neh kóng,
11:5 Chiū-sī chheⁿmê-.ê khòaⁿ-.tio̍h, pái-kha-.ê kiâⁿ lō͘, thái-ko-ê chheng-khì, chhàu-hīⁿ-lâng ê thiaⁿ-.tio̍h, sí-.khì ê lâng koh-oa̍h, sànchhiah lâng thiaⁿ tio̍h hok-im. (chù, ISI 35:5; 61:1)
11:6 Tùi góa bô hoâi-gî ê lâng, si̍t-chāi ū hok-khì. "
11:7 Kiâⁿ Sé-lé Iô-há-neh ê Ho͘-io̍k
In lī-khui ê sî, I-é-su chiah tùi kûn-chiòng thê-khí Iô-há-neh ê tāichì kóng, " Lín chá-chêng chhut-khì khòng-iá, sī beh khòaⁿ siáⁿ-mi̍h à? Kám sī beh khòaⁿ lô͘-tek hō͘ hong chhoe tín-tāng?
11:8 Lín tàu-té chhut-khì ài khòaⁿ siáⁿ-mi̍h? Kám sī lâng chhēng ko-kùi ê saⁿ-khò͘? Lí khòaⁿ, chhēng ko-kùi saⁿ-khò͘ ê sī tī ông-kiong lāi.
11:9 Nā-sī ánne, lín chhut-khì sī ūi tio̍h chhòng siáⁿ? Kám sī beh khòaⁿ sian-ti? Sī là. Góa kā lín kóng, i pí sian-ti koh khah úi-tāi.
11:10 Koan-hē chit-ê lâng, ū kì-chài, góa chhe góa ê sù-chiá tī Lí ê bīn-chêng; i beh chò Lí ê sian-hong, kā Lí khui lō͘. (chù, MLK 3:1)
11:11 Kiâⁿ Sé-lé Iô-há-neh Thoân-tō ê Ì-gī
" Góa si̍t-chāi kā lín kóng, hū-jîn-lâng só͘ seⁿ ê, bô chi̍t-ê lâng pí kiâⁿ sé-lé Iô-há-neh khah úi-tāi; chóng-.sī, tī thian-kok siōng bî-sè-.ê, iáu koh pí i khah úi-tāi.
11:12 Tùi kiâⁿ sé-lé Iô-há-neh ê sî-ji̍t kàu taⁿ, thian-kok it-ti̍t siū kiông-lia̍t ê kong-kek, kiông-béng ê lâng ēng pō-le̍k lâi chhiúⁿ-toa̍t.
11:13 In-ūi chèng sian-ti kah lu̍t-hoat ê ī-giân kàu Iô-há-neh ê sî ûi-chí.
11:14 Lín nā goān-ì chiap-siū chiahê ī-giân, chit-ê lâng to̍h-sī teh beh lâi ê E-li-iah.
11:15 Ū hīⁿ-khang thang thiaⁿ ê lâng, tio̍h thiaⁿ.
11:16 Chit-ê Sè-tāi
Góa tàu-té tio̍h ēng siáⁿ-mi̍h lâi pí-phēng chit sè-tāi ê lâng? In tú chhin-chhiūⁿ chi̍t tīn gín'á chē tī chhī-á-kháu, lâi teh tùi in ê tâng-phōaⁿ kóng,
11:17 Goán tùi lín pûn phín-á, lín bô thiàu-bú; goán teh thî-khàu, lín mā bô pi-siong.
11:18 In-ūi Iô-há-neh lâi, bô chia̍h bô lim, lâng chiū kóng, i hō͘ siâ-sîn hū-sin.
11:19 Jîn-chú lâi, ū chia̍h koh ū lim, lâng chiū kóng I sī tham-chia̍h hò͘ⁿ-chiú ê lâng, koh sī thiu-sòe ê kah chōe-jîn ê pêng-iú, m̄ koh, Siōng-tè ê tì-hūi sī tùi I ê hêng-ûi lâi tit tio̍h chèng-si̍t. "
11:20 Chek-pī M̄ Hóe-kái ê Siâⁿ
( Lk 10:13-15)
I-é-su í-keng tī hiahê siâⁿ kiâⁿ chin chē sîn-jiah, in-ūi in lóng bô hóe-kái, I chiū chek-pī in kóng,
11:21 " Ko-la̍h-sìn, lí chhám à! Bia̍t-sái-tah, lí chhám à! In-ūi tī lín tiong-kan só͘ kiâⁿ ê sîn-jiah, nā kiâⁿ tī Tu-lô kah Si-tòng, in chá to̍h chhēng môa-saⁿ sám hóe-hu lâi hóe-kái.
11:22 M̄ koh, góa kā lín kóng, tng sím-phòaⁿ ê ji̍t, Tu-lô kah Si-tòng ē pí lín siū khah khin ê hêng-hoa̍t.
11:23 Ka-peh-ná-um, lí kám ài lâng kā lí phô͘-tháⁿ chiūⁿ thiⁿ? Siōng-tè ē kā lí hiat-lo̍h im-hú; in-ūi tī lí hia só͘ kiâⁿ ê sîn-jiah, nā kiâⁿ tī So͘-tóm, chit-ê siâⁿ chiū ē chûn-chāi kàu kin-á-ji̍t.
11:24 M̄ koh, góa kā lín kóng, tī sím-phòaⁿ ê ji̍t, So͘-tóm só͘ siū ê hêng-hoa̍t ē pí lí khah khin. "
11:25 Lâi Góa Chia Tit An-hioh
( Lk 10: 21-22)
Hit sî, I-é-su kóng, " Thiⁿ-pē ah, thiⁿ-tē ê Chú, góa kám-siā Lí, in-ūi Lí kā chiahê tāichì, tùi tì-hūi chhong-bêng ê lâng am-khàm khí-.lâi, khiok ū tùi sè-hàn gín'á khé-sī.
11:26 Pē ah, sī lah, in-ūi che sī chiàu Lí ê chí-ì lâi chò ê.
11:27 Góa ê Thiⁿ-pē í-keng kā it-chhè kau-thok góa, Thiⁿ-pē í-gōa, bô lâng bat Kiáⁿ; Kiáⁿ kah Kiáⁿ só͘ ài beh chí-sī ê lâng í-gōa, mā bô lâng bat Thiⁿ-pē.
11:28 " Lô-khó͘ taⁿ tāng-tàⁿ ê, lóng tio̍h lâi góa chia, góa beh hō͘ lín an-hioh.
11:29 Góa sim-lāi un-jiû khiam-sùn, lín tio̍h phāiⁿ góa ê ka-taⁿ lâi tùi góa ha̍k-si̍p, lín ê sim-sîn chiū ē tit tio̍h an-hioh;
11:30 In-ūi góa ê ka-taⁿ hó-ēng, góa ê tàⁿ koh khin. "
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。