Má-thài Hok-im/馬太福音簡介 線上收聽:中文和合本 台語聖經 台語聖經(長老會傳播中心授權） 客語聖經 福州話聖經 粵語和合本 希臘文 下載檔案 關於語音聖經
22:1 Hun-iàn ê Phì-jū
( Lk 14: 15-24)
I-é-su koh ēng phì-jū kā in kóng,
22:2 " Thian-kok chhin-chhiūⁿ chi̍t-ê kok-ông kā i ê kiáⁿ pān hun-iàn.
22:3 I chhe lô͘-po̍k khì kiò só͘ iau-chhiáⁿ ê lâng lâi hù hun-iàn, m̄ koh, in m̄ lâi.
22:4 Kok-ông koh chhe kî-tha ê lô͘-po̍k, kā in kóng, ' Khì kā só͘ iau-chhiáⁿ ê lâng kóng, góa ê iàn-se̍k í-keng chún-pī hó-sè, góa ê gû kah pûi ê chengseⁿ mā í-keng thâi à. It-chhè lóng chún-pī hó à. Chhiáⁿ lín tio̍h lâi hù iàn-se̍k. '
22:5 Hiahê lâng bô khòaⁿ-chò iàu-kín, chò in khì; chi̍t-ê khì chhân-hn̂g chò-kang, chi̍t-ê khì chò senglí,
22:6 Kî-tha ê lâng lia̍h i ê lô͘-po̍k lâi lêng-jio̍k, kā in thâi-sí.
22:7 Kok-ông hui-siông siū-khì, chiū phài kun-peng châu-bia̍t hiahê hiong-chhiú, koh pàng hóe sio in ê siâⁿ.
22:8 Jiân-āu kā i ê lô͘-po̍k kóng, ' hun-in ê iàn-se̍k í-keng chún-pī hó-sè, m̄ koh, só͘ iau-chhiáⁿ ê lâng lóng bē kham-tit lâi.
22:9 Só͘-í, lín khì tōa lō͘-kháu, kā só͘ tú-.tio̍h ê lâng lóng chhiáⁿ lâi hù hun-iàn. '
22:10 Hiahê lô͘-po̍k chhut-khì lō͘-.ni̍h, kā só͘ tú-.tio̍h ê bô-lūn hó-pháiⁿ lóng chhiáⁿ lâi. Hun-iàn ê tōa thiaⁿ lâng-kheh chē kah móa-móa.
22:11 Kok-ông ji̍p-khì khòaⁿ hiahê lâng-kheh, khòaⁿ tio̍h tī hia ū chi̍t-ê lâng bô chhēng lé-ho̍k,
22:12 Chiū mn̄g i kóng, ' Pêng-iú, lí ji̍p-lâi chia ná ē bô chhēng lé-ho̍k? ' Hitê lâng tiām-tiām bô ìn.
22:13 Hit sî, kun-ông kā chiahê lô͘-po̍k kóng, ' Kā i ê kha-chhiú pa̍k khí-.lâi, kā i hiat chhut-khì gōa-bīn o͘-àm ê só͘-chāi. Tī hia i ē thî-khàu, kā-gê chhiat-khí. '
22:14 In-ūi siū ho͘-tiàu ê lâng chē, siū kéng-soán ê lâng chió. "
22:15 La̍p-sòe ê Būn-tê
( Mk 12: 13-17; Lk 20: 20-26)
Hit sî, Hoa-lí-sái phài ê lâng chhut-khì chham-siông, siūⁿ khòaⁿ beh án-chóaⁿ chhńg I-é-su ê ōe-phāng lâi kā I hām-hāi.
22:16 In chiū chhe-phài bûn-tô͘ kah He-lo̍t tóng ê lâng lâi kā I-é-su kóng, " Lāu-su ah, goán chai Lí sī láu-si̍t lâng, koh chiàu Siōng-tè ê chin-lí lâi kà-sī lâng. Lí m̄-kiaⁿ pòaⁿ-lâng, in-ūi Lí bô khòaⁿ lâng ê gōa-māu.
22:17 Chhiáⁿ Lí kā goán kóng, la̍p-sòe hō͘ Lô-má ê hông-tè ū ha̍h lu̍t-hoat bô? "
22:18 I-é-su chai-iáⁿ in ê pháiⁿ liām-thâu, chiū kóng, " Ké hó ê lâng, lín án-chóaⁿ beh lâi kā góa chhì-thàm?
22:19 The̍h chi̍t-ê la̍p-sòe ê gîn-pè lâi hō͘ góa khòaⁿ. " In chiū the̍h chi̍t-ê gîn-pè hō͘ I-é-su khòaⁿ.
22:20 I-é-su mn̄g in kóng, " Chit-ê siōng kah jī-hō sī siáⁿ lâng ê? "
22:21 In ìn kóng, " Sī hông-tè ê. " I-é-su chiū kā in kóng, " Án-ne, lín tio̍h kā hông-tè ê mi̍h la̍p hō͘ hông-tè, kā Siōng-tè ê mi̍h la̍p hō͘ Siōng-tè. "
22:22 In thiaⁿ tio̍h ánne chin tio̍h-kiaⁿ, chiū lī-khui I-é-su.
22:23 Sí-lâng Koh-oa̍h ê Būn-tê
( Mk 12: 18-27; Lk 20: 27-40)
Kāng hit ji̍t, chi̍t-kóa chú-tiuⁿ lâng sí-liáu bô koh-oa̍h ê Sat-to-kai phài ê lâng lâi mn̄g I-é-su kóng,
22:24 " Lāu-su ah, Mô͘-se kóng, ' Ū lâng bô seⁿ kiáⁿ to̍h sí-.khì, i ê sió-tī tio̍h chhōa hiaⁿ-só lâi chò bó͘, thang seⁿ kiáⁿ lâi ūi i ê a-hiaⁿ thoân-chong chiap-tāi. (chù, SBK 25:5)
22:25 Taⁿ goán chia ū hiaⁿ-tī chhit lâng. Tōa-hiaⁿ chhōa bó͘ liáu chiū sí-.khì, bô kiáⁿ, kā i e bó͘ pàng hō͘ i ê sió-tī.
22:26 Tē-jī-ê, tē-saⁿ-ê, kàu tē-chhit-ê lóng sī kāng-khoán chêng-hêng.
22:27 Kàu bóe, hit-ê hū-jîn-lâng mā sí.
22:28 Án-ne tī koh-oa̍h ê sî, chit-ê hū-jîn-lâng beh chò siáⁿ lâng ê bó͘? In-ūi chhit-ê hiaⁿ-tī lóng ū chhōa kòe i chò bó͘. "
22:29 I-é-su ìn kóng, " Lín siūⁿ m̄ tio̍h à. Lín m̄ bat keng-tián kah Siōng-tè ê koân-lêng.
22:30 In-ūi koh-oa̍h ê sî, in ē kah thiⁿ-téng ê thiⁿ-sài kāng-khoán, bô kè bô chhōa.
22:31 Koan-hē sí-lâng koh-oa̍h ê tāichì, lín kám bô tha̍k tio̍h Siōng-tè só͘ kā lín kóng ê ōe,
22:32 ' Góa to̍h-sī A-bu-la-hàm ê Siōng-tè, Í-sak ê Siōng-tè, Iâ-kop ê Siōng-tè' (chù, CAG 3:6; 15-16)? I m̄-sī sí-lâng ê Siōng-tè, sī oa̍h-lâng ê Siōng-tè. "
22:33 Chèng lâng thiaⁿ tio̍h I-é-su ê kà-sī, chin tio̍h-kiaⁿ.
22:34 Siōng Tiōng-iàu ê Kài-bēng
( Mk 12: 28-34; Lk 10: 25-28)
Hoa-lí-sái phài ê lâng thiaⁿ tio̍h I-é-su í-keng hō͘ Sat-to-kai phài ê lâng bô ōe thang ìn, chiū chū-chi̍p chò-hóe.
22:35 Kî-tiong chi̍t-ê lu̍t-hoat kàu-su lâi beh chhì-thàm I-é-su, kóng,
22:36 " Lāu-su ah, lu̍t-hoat tiong tó chi̍t tiâu kài-bēng siōng tiōng-iàu? "
22:37 I-é-su ìn kóng, " Lí tio̍h chīn-sim, chīn-sèng, chīn-ì thiàⁿ Chú — lí ê Siōng-tè.
22:38 Chit-ê siōng iàu-kín, mā sī thâu chi̍t-ê kài-bēng.
22:39 Tē-jī tiâu mā kāng-khoán, tio̍h thiàⁿ chhù-piⁿ chhin-chhiūⁿ kakī. (chù, LBK 19: 18)
22:40 Chit nn̄g tiâu kài-bēng sī choân-pō͘ lu̍t-hoat kah sian-ti kà-sī ê chóng-kin-thâu. "
22:41 Ta-bi̍t ê Kiáⁿ-sun ê Būn-tê
( Mk 12: 35-37; Lk 20: 41-44)
Hoa-lí-sái phài ê lâng chū-chi̍p ê sî, I-é-su mn̄g in kóng,
22:42 " Koan-hē Ki-tok ê tāichì lín siūⁿ án-chóaⁿ? I sī siáⁿ lâng ê kiáⁿ-sun? " In ìn I-é-su kóng, " Sī Ta-bi̍t ê kiáⁿ-sun. "
22:43 I-é-su kā in kóng, " Án-ne, Ta-bi̍t hō͘ Sèng Sîn kám-tōng ê sî, ná ē chheng Ki-tok chò Chú, kóng,
22:44 Chú kā góa ê Chú kóng, Lí chē góa ê tōa-pêng, thèng-hāu góa kā Lí ê tùi-te̍k khut-ho̍k tī Lí ê kha chêng. (chù, SPh 110: 1)
22:45 Ta-bi̍t kì-jiân chheng-ho͘ Ki-tok chò Chú, Ki-tok ná ē lâi chò Ta-bi̍t ê kiáⁿ-sun? "
22:46 In bô lâng ē-tàng ìn I-é-su pòaⁿ-kù ōe; tùi hit ji̍t khí, bô lâng káⁿ koh lâi mn̄g I-é-su jīm-hô būn-tê.
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。