Lô-má su/羅馬書簡介 線上收聽:中文和合本 台語聖經 台語聖經(長老會傳播中心授權） 客語聖經 福州話聖經 粵語和合本 希臘文 下載檔案 關於語音聖經
2:1 Iô-tá-iah Lâng Bô Thang Chià-kháu
Só͘-í, lí chit-ê ài phoe-phòaⁿ pa̍t lâng ê, bô-lūn lí sī siáⁿ-mi̍h lâng, lóng bē tàng piān-kái. In-ūi lí phoe-phòaⁿ pa̍t lâng chò ê tāichì, kakī mā ta̍k hāng lóng teh chò, ánne, lí phoe-phòaⁿ pa̍t lâng, to̍h-sī teh tēng kakī ê chōe.
2:2 Lán chai, chò chit khoán tāichì ê lâng, Siōng-tè ē kong-chèng kā i sím-phòaⁿ.
2:3 Lí chit-ê phoe-phòaⁿ pa̍t lâng, kakī mā khì chò-kāng-khoán tāichì ê lâng, lí siūⁿ kóng lín ē-tàng siám-phiah Siōng-tè ê sím-phòaⁿ, sī-.bô?
2:4 Á-sī lí khòaⁿ-khin Siōng-tè ke̍k tōa ê jîn-chû, khoan-iông kah jím-nāi? Lí kám m̄-chai, Siōng-tè tùi lí jîn-chû sī beh ín-chhōa lí hóe-kái?
2:5 Lí ê sim kò͘-chi̍p m̄ hóe-kái, sī teh ke-thiⁿ Siōng-tè ê siū-khì. Chit-ê siū-khì ē tī I kong-gī sím-phòaⁿ hit ji̍t hián-bêng.
2:6 Siōng-tè beh chiàu ta̍k lâng ê hêng-ûi kā in pò-èng. (chù, SPh 66:12; ChG 24:12)
2:7 Hiahê kian-chhî chò hó sū, tui-kiû êng-kng, chun-kùi kah bē pāi-hoāi ê sèⁿ-miā ê lâng, Siōng-tè ē siúⁿ-sù hō͘ in éng-oán ê oa̍h-miā.
2:8 Hiahê chū-su, pōe-ge̍k chin-lí, koh tian-tò tńg-khì sūn-chiông put-gī ê lâng, Siōng-tè ē ēng siū-khì kah hêng-hoa̍t, lâi kā in pò-èng.
2:9 Só͘-ū chò pháiⁿ ê lâng lóng ē tú tio̍h hoān-lān kah khùn-khó͘, Iô-tá-iah lâng ē seng tú-.tio̍h, āu-lâi chiah sòa-kàu Hi-la̍h lâng.
2:10 Só͘-ū chò hó sū ê lâng ē tit tio̍h êng-kng, chun-kùi kah pêng-an, Iô-tá-iah lâng ē seng tit tio̍h, āu-lâi chiah sòa-kàu Hi-la̍h lâng.
2:11 In-ūi Siōng-tè tùi jīm-hô lâng lóng bô phian-sim.
2:12 Gōa-pang lâng bô siū Mô͘-se ê lu̍t-hoat koán-hat, in nā hoān chōe, ē siū lu̍t-hoat í-gōa ê sím-phòaⁿ lâi bia̍t-bông; nā-sī siū Mô͘-se ê lu̍t-hoat koán-hat ê lâng, in nā hoān chōe, chiū ē chiàu lu̍t-hoat siū sím-phòaⁿ.
2:13 In-ūi kantaⁿ thiaⁿ lu̍t-hoat ê lâng, tī Siōng-tè ê bīn-chêng m̄-sī gī lâng, chí ū chun-hêng lu̍t-hoat ê lâng chiah ē hō͘ Siōng-tè jīm-tēng chò gī lâng.
2:14 Bô Mô͘-se lu̍t-hoat ê gōa-pang lâng nā chiàu pún-sèng chun-hêng lu̍t-hoat ê kui-tēng, in pún-sin to̍h-sī kakī ê lu̍t-hoat.
2:15 In ê hêng-ûi sī teh piáu-sī lu̍t-hoat ê iau-kiû ū khek tī in ê sim-lāi; in ê liông-sim mā ē chèng-si̍t, in-ūi in ê lāi-sim sî-sî teh chek-pī kakī, ū sî teh ūi kakī piān-hō͘.
2:16 Só͘-í, chiàu góa só͘ thoân ê hok-im, tī sím-phòaⁿ hit ji̍t, Siōng-tè ē thong-kòe Ki-tok I-é-su, lâi sím-phòaⁿ lâng sim-lāi ún-ba̍t ê tāichì.
2:17 Iô-tá-iah Lâng Mā Tio̍h Siū Sím-phòaⁿ
Án-ne, lí leh? Lí kakī chū-chheng sī Iô-tá-iah lâng, óa-khò lu̍t-hoat, koh khoa-kháu lí ê Siōng-tè.
2:18 Lí ū ha̍k-si̍p lu̍t-hoat, chai-iáⁿ Siōng-tè ê chí-ì, mā ē-hiáu hun-pia̍t sī-hui.
2:19 Lí chhim-sìn kakī sī teh kā sit-bêng ê lâng chhōa-lō͘ ê, sī tī o͘-àm tiong ê lâng ê kng,
2:20 Sī gōng lâng ê chí-tō chiá, sī siàu-liân lâng ê lāu-su. Lí siūⁿ kóng kì-jiân ū lu̍t-hoat, tùi tì-sek kah chin-lí chiū ū pá-ak.
2:21 Lí kà-sī pa̍t lâng, sī án-chóaⁿ bô kà-sī kakī? Lí kà lâng m̄ thang thau-the̍h, lí kakī ū thau-the̍h bô?
2:22 Lí kóng m̄ thang hoān kan-îm, lí kakī ū hoān tio̍h bô? Lí thó-ià ngó͘-siōng, lí kakī ū khì thau-the̍h biō-sī ê mi̍h bô?
2:23 Lí khoa-kháu kóng ū lu̍t-hoat, lí kakī ū ûi-pōe lu̍t-hoat lâi bú-jio̍k Siōng-tè á-bô?
2:24 Keng-tián ū kì-chài, in-ūi lín ê iân-kò͘, Siōng-tè ê miâ tī gōa-pang lâng ê tiong-kan siū siat-to̍k. (chù, ISI 52:5 LXX)
2:25 Lí nā chun-siú lu̍t-hoat, kat-lé chiū ū kè-ta̍t; lí nā hoān-hoat, ū kat-lé chiū kah bô kat-lé kāng-khoán.
2:26 Bô siū kat-lé ê lâng nā chun-siú lu̍t-hoat ê kui-tēng, kám bē tàng sǹg-chò ū siū kat-lé?
2:27 Jio̍k-thé bô siū kat-lé, m̄ koh ū chun-siú lu̍t-hoat ê lâng kám bô beh kā lí tēng chōe? In-ūi lí ū lu̍t-hoat ê tiâu bûn koh ū siū kat-lé, tian-tò bô chun-siú lu̍t-hoat.
2:28 Kî-si̍t gōa-piáu sī Iô-tá-iah lâng ê lâng, pēng m̄-sī chin-chiàⁿ ê Iô-tá-iah lâng; jio̍k-thé siū kat-lé mā m̄-sī chin-chiàⁿ ê kat-lé.
2:29 Lāi-chāi ê Iô-tá-iah lâng chiah sī chin-chiàⁿ ê Iô-tá-iah lâng; lāi-sim chiap-siū ê kat-lé chiah sī chin-chiàⁿ ê kat-lé, m̄-sī khò lu̍t-hoat ê tiâu bûn ê kat-lé. Chit khoán lâng só͘ siū ê oló m̄-sī tùi lâng lâi ê, sī tùi Siōng-tè.
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。