Ko-lîm-to Chiân su/哥林多前書簡介 線上收聽:中文和合本 台語聖經 台語聖經(長老會傳播中心授權） 客語聖經 福州話聖經 粵語和合本 希臘文 下載檔案 關於語音聖經
12:1 Sèng Sîn ê Un-sù
Hiaⁿ-tī chí-mōe, koan-hē Sèng Sîn ê siúⁿ-sù, góa ài lín liáu-kái khah chheng-chhó.
12:2 Lín chai, lín iáu-bōe sìn Chú ê sî, chhut-chāi lâng ín-iú khì pài bē kóng-ōe ê ngó͘-siōng.
12:3 Só͘-í, góa ài lín bêng-pe̍k, siū Siōng-tè ê Sèng Sîn kám-tōng ê lâng bē kóng " I-é-su tio̍h siū chiù-chó͘ "; bô siū Sèng Sîn kám-tōng ê lâng mā bē kóng " I-é-su sī Chú ".
12:4 Un-sù ū bô kāng, m̄ koh, siúⁿ-sù un-sù ê Sèng Sîn sī kāng chi̍t-ê.
12:5 Ho̍k-sāi ū chin chē khoán, m̄ koh, sī ho̍k-sāi kāng chi̍t-ê Chú.
12:6 Kang-chok ū chin chē khoán, m̄ koh, hō͘ lâng ū lêng-le̍k khì chò ta̍k hāng tāichì ê sī kāng chi̍t-ê Siōng-tè.
12:7 Sèng Sîn hián-bêng tī ta̍k lâng sin chiūⁿ, sûi-jiân chi̍t lâng chi̍t-khoán, m̄ koh, bo̍k-tek lóng sī ūi tio̍h beh hō͘ chèng lâng tit tio̍h lī-ek.
12:8 Ū lâng tùi Sèng Sîn tit tio̍h thoân hok-im ê tì-hūi, ū lâng tùi kāng chi̍t-ê Sèng Sîn tit tio̍h tì-sek.
12:9 Ū lâng tùi kāng chi̍t-ê Sèng Sîn tit tio̍h sìn-sim, ū lâng tùi kāng chi̍t-ê Sèng Sîn tit tio̍h i-pēⁿ ê un-sù.
12:10 Ū lâng tit tio̍h kiâⁿ sîn-jiah ê lêng-le̍k, ū lâng tit tio̍h thoân Siōng-tè hok-im ê un-sù, ū lâng tit tio̍h hun-pia̍t ta̍k chióng sîn-lêng ê un-sù, ū lâng tit tio̍h kóng kok chióng ōe-gí ê un-sù, koh ū lâng tit tio̍h hoan-e̍k kok chióng ōe-gí ê un-sù.
12:11 Chiahê lóng sī kāng chi̍t-ê Sèng Sîn teh ūn-chok, chiàu I kakī ê ì-sù kā bô kāng ê un-sù pun hō͘ ta̍k lâng.
12:12 Chi̍t-ê Seng-khu Ū Chin Chē Ki-thé
Chhin-chhiūⁿ seng-khu sī chi̍t-ê, m̄ koh ū chin chē ki-thé. Seng-khu ê ki-thé sûi-jiân chin chē, seng-khu khiok chí ū chi̍t-ê; Ki-tok mā sī ánne.
12:13 Bô-lūn Iô-tá-iah lâng á-.sī Hi-la̍h lâng, lô͘-lē á-.sī chū-iû ê, lán lóng tùi kāng chi̍t-ê Sèng Sîn niá siū sé-lé lâi chiâⁿ-chò chi̍t thé, mā kiōng-tông niá-siū kāng chi̍t-ê Sèng Sîn.
12:14 Seng-khu m̄-sī kantaⁿ chi̍t-ê ki-thé, sī ū chin chē ki-thé.
12:15 Kha nā kóng, " Góa m̄-sī chhiú, só͘-í, bô sio̍k seng-khu. " kha bē in-ūi ánne chiū bô sio̍k seng-khu.
12:16 Hīⁿ-á nā kóng, " Góa m̄-sī ba̍k-chiu, só͘-í, bô sio̍k seng-khu. " Hīⁿ-á bē in-ūi ánne chiū bô sio̍k seng-khu.
12:17 Choân seng-khu nā lóng sī ba̍k-chiu, beh ēng siáⁿ-mi̍h lâi thiaⁿ? Choân seng-khu nā lóng sī hīⁿ-á, beh ēng siáⁿ-mi̍h lâi phīⁿ?
12:18 Kî-si̍t, Siōng-tè chiàu I ê chí-ì, kā ta̍k-ê ki-thé sûi ê an-tì tī seng-khu.
12:19 Nā pah-thé lóng kāng-khoán, ná ē-tàng chiâⁿ-chò chi̍t-ê seng-khu?
12:20 Seng-khu sûi-jiân ū pah-thé, seng-khu khiok sī kantaⁿ chi̍t-ê.
12:21 Ba̍k-chiu bē tàng tùi chhiú kóng, " Góa bô su-iàu lí. " thâu-khak mā bē tàng tùi kha kóng, " Góa bô su-iàu lín. "
12:22 Kî-si̍t hiahê khòaⁿ khí-lâi khah nńg-chiáⁿ ê ki-thé, tian-tò koh khah ū pit-iàu.
12:23 Lán khòaⁿ-chò khah bô kùi-khì ê ki-thé, tian-tò tio̍h kā in khah chiàu-kò͘; hiahê khah pháiⁿ-khòaⁿ ê ki-thé, lán tian-tò tio̍h kā in khah koan-sim.
12:24 Hiahê khah hó khòaⁿ ê ki-thé bô su-iàu táⁿ-pān. Siōng-tè kā seng-khu an-tì hó-sè, hō͘ hiahê khah bô tiōng-iàu ê ki-thé koh khah siū chun-tiōng.
12:25 Án-ne, chiah hō͘ seng-khu bē hun-lia̍t, tian-tò hō͘ pah-thé hō͘-siong chiàu-kò͘.
12:26 Chi̍t-ê ki-thé nā siū khó͘, pah-thé chiū tâng siū khó͘; chi̍t-ê ki-thé nā tit tio̍h êng-kng, pah-thé chiū chò-hóe hoaⁿ-hí.
12:27 Lín sī Ki-tok ê seng-khu, ta̍k lâng sī Ki-tok seng-khu ê ki-thé.
12:28 Siōng-tè tī kàu-hōe só͘ an-tì ê, tē-it sī sù-tô͘, tē-jī sī sian-ti, tē-saⁿ sī kàu-su, koh ū kiâⁿ sîn-jiah ê, ū i-pēⁿ un-sù ê, pang-chān lâng ê, tī-lí sū-bū ê, kóng ta̍k chióng ōe-gí ê.
12:29 Ta̍k lâng kám lóng sī sù-tô͘? Lóng sī sian-ti? Lóng sī kàu-su? Lóng sī kiâⁿ sîn-jiah ê?
12:30 Kám lóng ū i-pēⁿ ê un-sù? Kám lóng ē kóng ta̍k chióng ê ōe-gí? Kám lóng ē hoan-e̍k bô kāng ê ōe-gí?
12:31 Lín tio̍h pek-chhiat him-bō͘ koh khah tōa ê un-sù. Taⁿ góa kā lín chí-sī chi̍t tiâu siōng hó ê lō͘.
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。