Ko-lîm-to Hō͘ su/哥林多後書簡介 線上收聽:中文和合本 台語聖經 台語聖經(長老會傳播中心授權） 客語聖經 福州話聖經 粵語和合本 希臘文 下載檔案 關於語音聖經
5:1 Goán chai, lán tī tē-chiūⁿ teh tòa ê pò͘-pêⁿ nā húi-hoāi, Siōng-tè chiū ē hō͘ lán thiⁿ-téng ê chhù. He m̄-sī lâng ê chhiú khí-chō ê chhù, sī Siōng-tè khí-chō tī thiⁿ-téng éng-oán ê chhù.
5:2 Lán chitmá tòa tī chit-ê pò͘-pêⁿ teh thó͘-khùi, khat-bōng thang khì tòa thiⁿ-téng ê chhù, chhin-chhiūⁿ kā saⁿ-chhēng lo̍h-.khì.
5:3 In-ūi nā kā saⁿ-chhēng lo̍h-.khì, lán chiū bē thǹgpaktheh.
5:4 Lán iáu tòa tī chit-ê pò͘-pêⁿ teh thoa-bôa thó͘-khùi, m̄-sī ài kā tē-chiūⁿ ê thé thǹg khí-.lâi, sī ài tha̍h sio̍k-thiⁿ ê thé, thang hō͘ oa̍h-miā lâi khek-ho̍k hit-ê ē sí ê thé.
5:5 Siōng-tè hō͘ lán ū chit-ê kái-piàn, I mā sù Sèng Sîn lâi chò lán ê pó-chèng.
5:6 Só͘-í, goán put-sî chhiong-móa ióng-khì. Goán chai, lán iáu-sī jio̍k-thé teh oa̍h ê sî, to̍h-sī kah Chú ūi lán chún-pī ê chhù lī-khui hn̄g-hn̄g.
5:7 In-ūi lán teh oa̍h sī khò sìn-sim, m̄-sī khò ba̍k-chiu só͘ khòaⁿ-.tio̍h ê.
5:8 Goán chhiong-móa ióng-khì, khah ài lī-khui tē-chiūⁿ ê seng-khu, khì kah Chú chò-hóe tòa.
5:9 Só͘-í, bô-lūn sī tiàm tī tē-chiūⁿ ê seng-khu, á-.sī lī-khui seng-khu, goán só͘ tì-ì ê sī hō͘ Chú hoaⁿ-hí.
5:10 In-ūi lán tāi-ke lóng tio̍h khiā tī Ki-tok ê bīn-chêng siū sím-phòaⁿ, ta̍k lâng lóng tio̍h chiàu kakī tī tē-chiūⁿ ê seng-khu só͘ chò ê tāichì, bô-lūn sī hó á-.sī pháiⁿ, lâi chiap-siū pò-èng.
5:11 Thong-kòe Ki-tok Lâi kah Siōng-tè Hô-hó
In-ūi goán chai tio̍h kèng-ùi Siōng-tè, goán chiū ánne lâi khó͘-khǹg lâng. M̄ koh, Siōng-tè jīn-bat lán kah hui-siông chheng-chhó, góa mā ǹg-bāng lín ē tùi lín ê liông-sim lâi jīn-bat goán.
5:12 Goán m̄-sī koh beh thui-chiàn kakī, sī beh hō͘ lín in-ūi goán ê iân-kò͘, ū thang khoa-kháu ê só͘-chāi, thang ìn-tap hiahê chù-tiōng gōa-māu bô chù-tiōng lāi-sim lâi khoa-kháu ê lâng.
5:13 Goán nā chin-chiàⁿ khí-kông, sī ūi tio̍h Siōng-tè ê iân-kò͘; goán cheng-sîn nā chèng-siông, sī ūi tio̍h lín ê iân-kò͘.
5:14 In-ūi Ki-tok ê thiàⁿ chhui-pek goán, hō͘ goán bêng-pe̍k, chi̍t-ê lâng thè chèng lâng sí, chèng lâng chiū lóng kah I tâng-sí.
5:15 Ki-tok ūi tio̍h chèng lâng sí, sī beh hō͘ hiahê oa̍h-.leh ê lâng bô koh ūi tio̍h kakī lâi oa̍h, sī ūi tio̍h thè in sí koh-oa̍h ê Ki-tok lâi oa̍h.
5:16 Só͘-í, tùi taⁿ í-āu, goán bô koh chiàu lâng ê phiau-chún lâi bat lâng; goán sûi-jiân bat chiàu lâng ê phiau-chún lâi bat Ki-tok, m̄ koh chitmá goán bô koh ánne chò.
5:17 Bô-lūn siáⁿ-mi̍h lâng, nā kah Ki-tok kiat-liân, to̍h-sī sin chhòng-chō ê lâng; kū ê tāichì í-keng kòe-.khì, taⁿ lóng piàn-chò sin ê.
5:18 Chiahê it-chhè lóng sī Siōng-tè ê chok-ûi, I thong-kòe Ki-tok hō͘ lán kah I koh-chài hô-hó, mā kā chit-ê khǹg lâng kah Siōng-tè koh-chài hô-hó ê chit-hūn kau hō͘ goán.
5:19 Goán só͘ thoân ê hok-im to̍h-sī, Siōng-tè thong-kòe Ki-tok hō͘ sè-kan lâng kah I koh-chài hô-hó, bô koh tui-kiù in ê chōe-kò, mā kā I kah lâng koh hô-hó ê sìn-sit kau-thok goán.
5:20 Só͘-í, goán chò Ki-tok ê sù-chiá, Siōng-tè thong-kòe goán lâi khǹg lín. Goán thè Ki-tok kā lín khún-kiû, Tio̍h kah Siōng-tè koh-chài hô-hó.
5:21 Siōng-tè hō͘ bô chōe ê Ki-tok lâi taⁿ lán ê chōe, sī beh hō͘ lán kah I kiat-liân, lâi kah Siōng-tè kiàn-li̍p ha̍p-gî ê koan-hē.
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。