Ko-lîm-to Hō͘ su/哥林多後書簡介 線上收聽:中文和合本 台語聖經 台語聖經(長老會傳播中心授權） 客語聖經 福州話聖經 粵語和合本 希臘文 下載檔案 關於語音聖經
11:1 Páu-lô Tùi-khòng Ké Sù-tô͘
Chhiáⁿ lín khoan-iông góa sió-khóa ê gû-gōng, góa siong-sìn lín ē kā góa khoan-iông.
11:2 Góa thiàⁿ lín, chhin-chhiūⁿ Siōng-tè thiàⁿ lín thiàⁿ kah ē khí chi̍t-tò͘, in-ūi lín chhin-chhiūⁿ sûn-kiat ê chāi-sek-lí, góa kā lín phit-phòe hō͘ chi̍t-ê tiōng-hu, to̍h-sī Ki-tok.
11:3 Chhin-chhiūⁿ E-bah hō͘ chôa ê hoa-giân khá-gí phiàn-.khì, góa khióng-kiaⁿ lín ê sim-su mā ē siū bê-he̍k, soah-khì-sak tùi Ki-tok ê sûn-kiat kah chin-sêng.
11:4 Nā ū lâng khì lín hia thoân kah goán só͘ thoân bô kāng ê I-é-su, lín chiū sûi-piān chiap-siū; lín mā chiap-siū kah í-chêng goán só͘ thoân bô kāng ê Sèng Sîn kah hok-im.
11:5 Kah lín hiahê" Te̍k-pia̍t sù-tô͘ " pí khí-.lâi, góa siūⁿ góa chi̍t-sut-á to bô khah su.
11:6 Kiám-chhái góa kóng-ōe khah han-bān, m̄ koh, góa ê tì-sek bē pí lâng khah su; chit-tiám, goán í-keng ū ēng ta̍k chióng hong-hoat, lī-iōng ta̍k chióng ki-hōe tùi lín piáu-bêng ā.
11:7 Góa bián-hùi tùi lín thoân Siōng-tè ê hok-im; ūi tio̍h beh hō͘ lín ko-seng, góa tio̍h khut-kē kakī. Góa ánne chò kám ū m̄ tio̍h?
11:8 Góa tī lín hia teh kang-chok ê sî, sī pa̍t-ê kàu-hōe teh kā góa kiong-kip it-chhè ê hùi-iōng; kóng-khí-lâi góa sī teh the̍h pa̍t-ê kàu-hōe ê siā-lé lâi ho̍k-sāi lín.
11:9 Góa tī lín hia ê sî, nā bô kàu-ēng, mā m̄ bat kiû lín pang-chān, lâi kā lín ke-thiⁿ mâ-hoân. It-chhè ê hùi-iōng lóng sī Ma-ke-tó-niah lâi ê hiaⁿ-tī kā góa kiong-kip; kòe-khì sī ánne, chiong-lâi mā sī ánne, góa choa̍t-tùi bē kā lín thoa-lūi.
11:10 Góa káⁿ chí góa só͘ sìn ê Ki-tok chin-lí chiùchōa, tī A-kha-iah séng ê tē-khu, góa lóng ē-tàng ánne khoa-kháu.
11:11 Sī án-chóaⁿ kóng lè? Kám kóng góa bô thiàⁿ lín? Góa ū thiàⁿ lín, Siōng-tè chai!
11:12 Góa beh kè-sio̍k ánne chò, thang hō͘ hiahê chū-chheng " Sù-tô͘ "ê lâng bô ki-hōe khoa-kháu, kóng in só͘ chò ê kang-chok kah goán kāng-khoán.
11:13 Hit khoán lâng sī ké sù-tô͘, in chò tāichì kan-chà, ké-chò sī Ki-tok ê sù-tô͘.
11:14 Che bô kî-koài! Liân Sa-tán mā ē ké-chò kng-bêng ê thiⁿ-sài!
11:15 Só͘-í, Sa-tán ê lô͘-po̍k ké-chò sī gī ê lô͘-po̍k, mā m̄-sī siáⁿ-mi̍h tōa tāichì. Chòe-āu in ē chiàu in ê hêng-ûi siū tio̍h èng-tit ê pò-èng.
11:16 Páu-lô Ūi Ka-kī Piān-hō͘
Góa koh kóng chi̍t pái, M̄-thang kā góa khòaⁿ-chò gōng lâng. Chóng-.sī, lín nā-sī ánne siūⁿ, to̍h-sī kā góa tòng-chò gōng lâng teh chiap-la̍p, hō͘ góa ū tām-po̍h-á thang khoa-kháu.
11:17 Góa chitmá teh kóng ê m̄-sī Chú ê ì-sù, sī góa chò chi̍t-ê gōng lâng teh khoa-kháu.
11:18 Kì-jiân ū hiah chē lâng teh tián sio̍k-sè ê tāichì, góa mā beh khoa-kháu chi̍t ē.
11:19 Lín kì-jiân hiahni̍h khiáu, eng-kai ē hoaⁿ-hí khoan-iông góa chit-ê gōng lâng chiah tio̍h.
11:20 Nā ū lâng kā lín tòng-chò lô͘-po̍k, kā lín phiⁿ, kā lín hām-hāi, tùi lín kiau-ngō͘, siàn lín ê chhùi-phóe, lín lóng ē khoan-iông jím-siū.
11:21 Kóng khí-lâi chin kiàn-siàu, goán kòe-khì m̄-káⁿ chò chit khoán tāichì. Chóng-.sī, nā ū lâng káⁿ khoa-kháu siáⁿ-mi̍h, chún-chò sī chi̍t-ê gōng lâng teh kóng ōe, góa mā káⁿ.
11:22 In kám sī Hi-bú-lâi lâng? Góa mā sī; in kám sī I-su-la-el lâng? Góa mā sī; in kám sī A-bu-la-hàm ê kiáⁿ-sun? Góa mā sī.
11:23 In kám sī Ki-tok ê lô͘-po̍k? Chún-chò sī gōng lâng teh kóng ōe, góa koh khah sī. Góa siū koh khah chē ê lô-khó͘, hông koaiⁿ lo̍h kaⁿ pí in khah chē pái, koh siū sǹg bē liáu ê piⁿ-phah, chin chē pái hiám-hiám-á sí-.khì.
11:24 Góa hō͘ Iô-tá-iah lâng lia̍h-khì ēng piⁿ phah gō͘ pái, ta̍k pái phah sì-cha̍p ē kiám chi̍t ē, lóng phah-kah hiám-hiám-á sí-.khì!
11:25 Saⁿ pái hō͘ Lô-má lâng ēng koái-á phah, chi̍t pái hō͘ lâng ēng chio̍h-thâu tìm, saⁿ pái tú tio̍h chûn-phòa, chi̍t pái tī hái-.ni̍h phiau-liû chi̍t ji̍t chi̍t mê.
11:26 Góa tiāⁿtiāⁿ tī lí-hêng tiong tú tio̍h kang-hô ê gûi-hiám, chhiúⁿ-kiap ê gûi-hiám, Iô-tá-iah tông-pau kah gōa-pang lâng ê gûi-hiám, siâⁿ lāi ê gûi-hiám, khòng-iá ê gûi-hiám, hái-siōng ê gûi-hiám kah ké sìn-tô͘ chō-sêng ê gûi-hiám.
11:27 Góa lô-khó͘ thoa-bôa, tiāⁿtiāⁿ bô khùn, iau-gō chhùi-ta, bô thang chia̍h, bô thang tòa, bô thang chhēng.
11:28 Kî-tha ê tāichì bián-kóng, kantaⁿ ta̍k ji̍t thè só͘-ū ê kàu-hōe teh chhau-hoân to̍h kàu-gia̍h.
11:29 Nā ū lâng loán-jio̍k, góa kám bē kám-kak loán-jio̍k? Nā ū lâng hoān chōe, góa ê sim-hóe kám bē to̍h khí-.lâi?
11:30 Góa nā tio̍h khoa-kháu, chiū beh khoa-kháu hiahê koan-hē góa loán-jio̍k ê tāichì.
11:31 Chú I-é-su ê Thiⁿ-pē Siōng-tè, to̍h-sī hit ūi éng-oán thang oló ê, I chai góa bô kóng pe̍h-chha̍t.
11:32 Góa tī Ta-má-su-ko ê sî, A-lí-ta̍t ông chhiú-hā ê chóng-tok pò͘-tì ōe-peng kò͘-siú siâⁿ mn̂g beh kā góa lia̍h.
11:33 M̄ koh, ū lâng ēng bí-lôa á tùi siâⁿ chhiûⁿ ê thang-á kā góa lūi lo̍h-.khì, hō͘ góa thoat-lī i ê chhiú.
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。