Thiap-sat-lô-nî-ka Chiân su/帖撒羅尼迦前書簡介 線上收聽:中文和合本 台語聖經 台語聖經(長老會傳播中心授權） 客語聖經 福州話聖經 粵語和合本 希臘文 下載檔案 關於語音聖經
1:1 Chhéng-an
Páu-lô, Se-la̍h kah Tî-mó͘-theh, siá phoe hō͘ The-sa-lô-nî-ke lâng sio̍k Thiⁿ-pē Siōng-tè kah Chú I-é-su Ki-tok ê kàu-hōe. Goān lín tit tio̍h un-tián kah pêng-an!
1:2 Tùi Siōng-tè ê Kám-un
Goán tiāⁿtiāⁿ ūi tio̍h lín tāi-ke lâi kám-siā Siōng-tè, tī kî-tó tiong put-sî to teh siàu-liām lín.
1:3 Goán tī lán ê Thiⁿ-pē Siōng-tè ê bīn-chêng, siàu-liām lín óa-khò sìn-sim só͘ chò ê kang, chhut tī thiàⁿ-sim só͘ hù-chhut ê lô-khó͘ kah ū nāi-sim teh gióng-bōng Chú I-é-su Ki-tok.
1:4 Hiaⁿ-tī chí-mōe, goán chai lín sī Siōng-tè só͘ thiàⁿ koh siū I kéng-soán ê kiáⁿ-jî.
1:5 In-ūi goán thoân hok-im khì-kàu lín hia, m̄-sī kantaⁿ óa-khò giân-gí, mā sī óa-khò Siōng-tè ê tōa koân-lêng kah Sèng Sîn, í-ki̍p goán tùi hok-im ê khak-sìn. Lín lóng chai goán tī lín hia ê sî sī án-chóaⁿ, he lóng sī ūi tio̍h lín ê lī-ek.
1:6 Lín ū o̍h goán, mā ū o̍h Chú, sûi-jiân tú tio̍h chin chē khó͘-lān, iáu koh ēng Sèng Sîn só͘ siúⁿ-sù ê hoaⁿ-hí, lâi niá-siū sìn-sit.
1:7 Chiū ánne, lín chiâⁿ-chò Ma-ke-tó-niah kah A-kha-iah só͘-ū sìn-tô͘ ê bô͘-hoān.
1:8 In-ūi Chú ê sìn-sit sī tùi lín thoân-chhut, m̄ nā tī Ma-ke-tó-niah kah A-kha-iah, lín tùi Siōng-tè ê sìn-gióng mā í-keng thoân khì-kàu ta̍k só͘-chāi. Só͘-í, goán m̄-bián koh kóng siáⁿ-mi̍h.
1:9 In-ūi hia ê lâng lóng teh thoân-káng goán khì lín hia ê sî án-chóaⁿ siū lín ê hó khoán-thāi, koh lín án-chóaⁿ lī-khui ngó͘-siōng, kui-ǹg Siōng-tè, lâi ho̍k-sāi oa̍h koh chin ê Siōng-tè,
1:10 Koh teh thèng-hāu I ê Kiáⁿ tùi thiⁿ kàng-lîm. Siōng-tè hō͘ I ê Kiáⁿ I-é-su tùi sí-lâng tiong koh-oa̍h, lâi chín-kiù lán thoat-lī chiong-lâi ê sím-phòaⁿ.
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。