Thiap-sat-lô-nî-ka Chiân su/帖撒羅尼迦前書簡介 線上收聽:中文和合本 台語聖經 台語聖經(長老會傳播中心授權） 客語聖經 福州話聖經 粵語和合本 希臘文 下載檔案 關於語音聖經
5:1 Chún-pī Gêng-chiap Chú ê Chài-lîm
Hiaⁿ-tī chí-mōe, koan-hē Chú chài-lîm ê sî kah kî, góa bô su-iàu siá tī poe lāi.
5:2 In-ūi lín kakī chai, Chú chài-lîm ê ji̍t ē chhin-chhiūⁿ chha̍t-á, tī àm-sî bô-ì-tiong lâi-kàu.
5:3 Lâng tng teh kóng, " Chi̍t chhiat pêng-an "ê sî, chai-hō ē chhin-chhiūⁿ seⁿ kiáⁿ ê kan-khó͘, lîm-kàu teh beh seng-sán ê hū-jîn-lâng, in bē tàng tô-phiah chit-ê lân-koan.
5:4 M̄ koh, hiaⁿ-tī chí-mōe, lín m̄-sī tī o͘-àm tiong teh kòe-ji̍t, hit-ê ji̍t bē chhin-chhiūⁿ chha̍t-á hut-jiân-kan lâi-kàu lín tau.
5:5 In-ūi lín lóng sī kng-bêng ê lâng, sī ji̍t-sî ê lâng; lán m̄-sī sio̍k tī àm-sî, mā m̄-sī sio̍k tī o͘-àm.
5:6 Só͘-í, lán m̄ thang chhin-chhiūⁿ kî-tha ê lâng teh khùn, tio̍h kéng-séng kín-sīn.
5:7 In-ūi khùn ê lâng lóng sī àm-sî teh khùn, chiú-chùi ê lâng lóng sī àm-sî teh chùi.
5:8 M̄ koh, lán sī sio̍k ji̍t-sî ê, lán tio̍h kín-sīn, ēng sìn-sim kah thiàⁿ-sim chò chiàn-kah chhēng, ēng tit-kiù ê ǹg-bāng chò thâu-khoe tì.
5:9 Siōng-tè m̄-sī kéng-soán lán lâi siū I hêng-hoa̍t, sī beh hō͘ lán thong-kòe Chú I-é-su Ki-tok lâi tit-kiù.
5:10 Ki-tok thè lán sí, sī beh hō͘ lán bô-lūn sī oa̍h á-.sī sí, lóng ē-tàng tī I chài-lîm ê sî kah I chò-hóe oa̍h.
5:11 Só͘-í, tio̍h chiàu lín chitmá teh chò ê ánne hō͘-siong kó͘-lē, hō͘-siong pang-chān.
5:12 Kiat-bóe ê Khoàn-bián kah Chiok-hok
Hiaⁿ-tī chí-mōe, chhiáⁿ lín tio̍h kèng-tiōng hiahê tī lín tiong-kan teh lô-khó͘ kang-chok, mā sī Chú só͘ kéng-soán lâi kā lín chí-tō kah khoàn-bián ê lâng.
5:13 Ūi tio̍h in teh chò ê kang-chok, lín tio̍h ēng siōng tōa ê thiàⁿ-sim kah kèng-ì lâi tùi-thāi in. Lín tāi-ke mā tio̍h hô-bo̍k chò-hóe.
5:14 Hiaⁿ-tī chí-mōe, goán khó͘-khǹg lín tio̍h kéng-kài pîntōaⁿ ê lâng, kó͘-bú sit-chì ê lâng, hû-chhî loán-jio̍k ê lâng, ēng khoan-iông tùi-thāi múi chi̍t-ê lâng.
5:15 Lín tio̍h kín-sīn, m̄ thang ēng pháiⁿ pò pháiⁿ, tio̍h put-sî hō͘-siong hó khoán-thāi, koh hó khoán-thāi múi chi̍t-ê lâng.
5:16 Tio̍h tiāⁿtiāⁿ hoaⁿ-hí.
5:17 Tio̍h put-sî kî-tó.
5:18 Bô-lūn siáⁿ-mi̍h kéng-gū lóng tio̍h kám-siā, in-ūi che sī Siōng-tè ê chí-ì, ài lín chiahê sio̍k Ki-tok I-é-su ê lâng ánne chò.
5:19 M̄-thang phah-hoa Sèng Sîn ê hóe.
5:20 M̄-thang biáu-sī sian-ti ê ōe.
5:21 Ta̍k hāng tāichì tio̍h siông-sè kiám-giām, hó ê tio̍h kè-sio̍k chò lo̍h-.khì.
5:22 Tio̍h siám-phiah ta̍k chióng ê siâ-ok.
5:23 Goān siúⁿ-sù pêng-an ê Siōng-tè chhin-chū kā lín sèng-hòa, koh goān I pó-siú lín ê lêng, hûn, thé, tī lán ê Chú I-é-su Ki-tok chài-lîm ê sî, lóng tit tio̍h pó-choân, bô thang hiâm!
5:24 Ho͘-tiàu lín ê sī sìn-si̍t ê Siōng-tè, I it-tēng ē chiàu ánne kā lín sêng-choân.
5:25 Kiat-bóe ê Chhéng-an
Hiaⁿ-tī chí-mōe, chhiáⁿ ūi goán kî-tó.
5:26 Tio̍h ēng sîn-sèng ê lé-gî, lâi kā só͘-ū ê hiaⁿ-tī chí-mē chhéng-an.
5:27 Góa hōng Chú ê miâ lâi hoan-hù lín, tio̍h tha̍k chit tiuⁿ phoe hō͘ só͘-ū ê hiaⁿ-tī chí-mōe thiaⁿ.
5:28 Goān lán ê Chú I-é-su Ki-tok ê un-tián kah lín tông-chāi!
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。