Hi-pek-lâi su/希伯來書簡介 線上收聽:中文和合本 台語聖經 台語聖經(長老會傳播中心授權） 客語聖經 福州話聖經 粵語和合本 希臘文 下載檔案 關於語音聖經
2:1 Úi-tāi-ê Chín-kiù
Só͘-í, lán tio̍h koh khah kian-siú só͘ thiaⁿ-.tio̍h ê sìn-sit, chiah bián-tit phian-lī chin-tō.
2:2 In-ūi thong-kòe thiⁿ-sài só͘ thoân ê sìn-sit sī chin ê, pōe-ge̍k bô sūn-ho̍k ê lâng lóng tio̍h siū èng-tit ê pò-èng.
2:3 Án-ne, lán nā hut-lio̍k chiahni̍h tōa ê chín-kiù, kám ē-tàng tô-siám èng-tit ê hêng-hoa̍t? Chú pún-sin khí-thâu to̍h ū kóng-khí chit-ê chín-kiù, hiahê thiaⁿ-kìⁿ ê lâng mā ū kā lán chèng-si̍t chit-ê tāichì.
2:4 Siōng-tè koh ū ēng sîn-jiah, kî-sū kah ta̍k-khoán tōa koân-lêng ê chok-ûi, í-ki̍p chiàu I kakī ê chí-ì hun-phòe hō͘ lán ê Sèng Sîn ê siúⁿ-sù, lóng chò-hóe lâi chò-chèng.
2:5 Chín-kiù ê Khai-lō͘ Sian-hong
Siōng-tè pēng bô kā lán só͘ kóng teh beh lâi ê sè-kài kau hō͘ thiⁿ-sài koán-lí.
2:6 To̍k-to̍k keng-tián ū chi̍t-ê só͘-chāi kóng, " Lâng sī siáⁿ-mi̍h, Lí kèng-jiân kā i koan-hoâi? Lâng ê kiáⁿ sī siáⁿ-mi̍h, Lí kèng-jiân kā i khòaⁿ-kò͘? "
2:7 Lí hō͘ i sió-khóa khah su thiⁿ-sài; ēng êng-kng kah chun-kùi hō͘ i chò koan-bián,
2:8 Koh hō͘ i koán-hat bān-mi̍h. (chù, SPh 8:4-6) Siōng-tè hō͘ lâng koán-hat bān-mi̍h, ánne bêng-bêng pau-hâm it-chhè ê mi̍h. Chóng-.sī, kàu taⁿ lán iáu-bōe khòaⁿ tio̍h ū lâng teh koán-hat bān-mi̍h.
2:9 Lán khòaⁿ-kìⁿ hit-ê chiâⁿ-chò lâng, chiām-sî sió-khóa khah su thiⁿ-sài ê I-é-su, í-keng keng-kòe sí-bông ê kan-khó͘, tit tio̍h êng-kng kah chun-kùi ê koan-bián. I ánne óa-khò Siōng-tè ê un-tián, thang ūi tio̍h chèng lâng lâi sí.
2:10 hit ūi chhòng-chō koh î-chhî bān-mi̍h ê Siōng-tè, ūi tio̍h beh chhōa chin chē kiáⁿ-jî chìn-ji̍p êng-kng, chiah tio̍h hō͘ chín-kiù ê khai-lō͘ sian-hong I-é-su tùi khó͘-lān lâi sêng-choân. Siōng-tè ánne chò sī ū sek-tòng.
2:11 Sū-si̍t siōng, hit-ê hō͘ lâng chiâⁿ-sèng ê kah hiahê tit tio̍h chiâⁿ-sèng ê lóng tùi kāng chi̍t-ê goân-thâu chhut. In-ūi ánne, I-é-su chheng in chò hiaⁿ-tī, pēng bô kám-kak kiàn-siàu.
2:12 I-é-su tùi Siōng-tè kóng, góa beh tùi góa ê hiaⁿ-tī chí-mōe soan-iông Lí ê miâ, tī hōe-chiòng ê bīn-chêng oló Lí ê miâ. (chù, SPh 22:22)
2:13 I-é-su koh kóng, " Góa beh sìn-khò Siōng-tè. " (chù, ISI 8:17 LXX) iū-koh kóng, " Lí khòaⁿ! Góa kah Siōng-tè só͘ hō͘ góa ê kiáⁿ-jî lóng tī chia. " (chù, ISI 8:18)
2:14 Kì-jiân kiáⁿ-jî lóng sī ū hoeh ū bah ê lâng, I-é-su pún-sin mā kāng-khoán chiâⁿ-chò ū hoeh ū bah ê lâng. Che sī ūi tio̍h beh thong-kòe I ê sí lâi húi-bia̍t hit-ê chiáng-koán sí-bông ê Mô͘-kúi,
2:15 Koh tháu-pàng hiahê in-ūi tùi sí-bông kiaⁿ-hiâⁿ, soah it-seng teh chò sí-bông lô͘-lē ê lâng.
2:16 Tong-jiân I-é-su teh koan-sim ê m̄-sī thiⁿ-sài, sī A-bu-la-hàm ê kiáⁿ-sun.
2:17 Só͘-í, I-é-su tī ta̍k hong-bīn lóng tio̍h kah hiaⁿ-tī chí-mōe kāng-khoán, chiah ē-tàng tī Siōng-tè ê bīn-chêng, chò jîn-chû koh tiong-si̍t ê tōa-chè-si, thang hō͘ chèng lâng ê chōe tit tio̍h sià-bián.
2:18 In-ūi I-é-su ū chhin-sin keng-le̍k siū khó͘ kah chhì-thàm, chiū ē-tàng pang-chān hiahê siū chhì-thàm ê lâng.
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。