| 章節 | 全民台語聖經全羅經文 | 註釋 |
| 44:1 | Iô-sé-huh ê Gîn Chiú-poe Sit-chongIô-sé-huh hoan-hù koán-ke kóng, " Kā bí-niûⁿ ji̍p móa chiahê lâng ê pò͘-tē, chīn in só͘ ū-hoat-tō͘ tòa ê, koh kā ta̍k lâng ê gîn lok tī i ê pò͘-tē kháu. | 註釋 串珠 盧華 盧導讀台 |
| 44:2 | Mā kā góa ê poe, to̍h-sī hit tè gîn-poe, hē tī siàu-liân ê pò͘-tē kháu, i tia̍h ngó͘-kok ê gîn mā sòa hē lo̍h-.khì. " Koán-ke ê chiū chiàu Iô-sé-huh só͘ kóng ê ōe khì chò. | 註釋 串珠 盧華 盧導讀台 |
| 44:3 | Thiⁿ chi̍t ē kng, chiū chhe hiahê lâng kah in ê lî lī-khui-.khì. | 註釋 串珠 盧華 盧導讀台 |
| 44:4 | In chhut siâⁿ kiâⁿ bô gōa hn̄g, Iô-sé-huh kā koán-ke kóng, " Khí-.lâi, khì jiok hiahê lâng, jiok tio̍h chiū kā in kóng, ' Lín ná ē ēng pháiⁿ pò hó? | 註釋 串珠 盧華 盧導讀台 |
| 44:5 | Che kám m̄-sī góa ê chú-lâng lim chiú ê poe? Kám m̄-sī i chiam-pok teh ēng ê? Lín ánne chò sī m̄ tio̍h. '" | 註釋 串珠 盧華 盧導讀台 |
| 44:6 | Koán-ke-.ê jiok tio̍h in, kā chiahê ōe tùi in kóng. | 註釋 串珠 盧華 盧導讀台 |
| 44:7 | In ìn kóng, " Góa ê chú án-chóaⁿ ē kóng chit khoán ōe? Lí ê lô͘-po̍k choa̍t-tùi bô chò chit khoán tāichì. | 註釋 串珠 盧華 盧導讀台 |
| 44:8 | Lí khòaⁿ, goán chêng tī pò͘-tē kháu só͘ khòaⁿ-.tio̍h ê gîn, siōng-chhiáⁿ tùi Ka-nân tē tòa-lâi hêng lí, goán ná ē tùi lí chú-lâng ê ke thau-the̍h kim-gîn? | 註釋 串珠 盧華 盧導讀台 |
| 44:9 | Lí ê lô͘-po̍k ê tiong-kan, bô-lūn tī siáⁿ lâng hia chhiau-.tio̍h, chiū hō͘ i sí, goán mā beh chò góa ê chú-lâng ê lô͘-po̍k. " | 註釋 串珠 盧華 盧導讀台 |
| 44:10 | Koán-ke kóng, " Taⁿ chiū chiàu lín ê ōe lâi chò, tī siáⁿ lâng hia chhiau-.tio̍h, hit-ê lâng chiū chò góa ê lô͘-po̍k, kî-tha ê lóng bô chōe. " | 註釋 串珠 盧華 盧導讀台 |
| 44:11 | Tùi hit sî khí, in ta̍k lâng kóaⁿ-kín kā pò͘-tē sià tī thô͘-kha, ta̍k lâng tháu-khui in ê pò͘-tē. | 註釋 串珠 盧華 盧導讀台 |
| 44:12 | Koán-ke chiū khai-sí chhiau, tùi tōa ê kàu sè-.ê ûi-chí, hit-ê poe kèng-jiân tī Biān-iá-mín ê pò͘-tē lāi chhiau tio̍h. | 註釋 串珠 盧華 盧導讀台 |
| 44:13 | In chiū thiah-li̍h in ê saⁿ, ta̍k lâng kā in ê mi̍h hō͘ lî-á chài, tńg-khì siâⁿ lāi. | 註釋 串珠 盧華 盧導讀台 |
| 44:14 | Iô-tah kah i ê hiaⁿ-tī kàu Iô-sé-huh ê chhù, Iô-sé-huh iáu tī hia, in chiū tī i ê bīn-chêng phak lo̍h tē. | 註釋 串珠 盧華 盧導讀台 |
| 44:15 | Iô-sé-huh kā in kóng, " Lín só͘ chò ê sī siáⁿ-mi̍h sū? Lín kám m̄-chai, chhin-chhiūⁿ góa chit khoán ê lâng ē chiam-pok? " | 註釋 串珠 盧華 盧導讀台 |
| 44:16 | Iô-tah kóng, " Goán tùi góa ê Chú beh kóng siáⁿ-mi̍h? Goán iáu ū siáⁿ thang kóng? Goán ná ū hoat-tō͘ thang ūi kakī piān-kái? Siōng-tè í-keng chhâ-chhut lí ê lô͘-po̍k ê chōe-kò, goán kah hit-ê tī i ê chhiú chhiau tio̍h poe ê, lóng sī góa ê chú ê lô͘-po̍k. " | 註釋 串珠 盧華 盧導讀台 |
| 44:17 | Iô-sé-huh kóng, " Góa choa̍t-tùi bô beh ánne chò, tī siáⁿ lâng ê chhiú chhiau tio̍h poe, hit-ê lâng chiū tio̍h chò góa ê lô͘-po̍k, lín chiahê thang pêng-an tńg-khì lín lāu-pē hia. " | 註釋 串珠 盧華 盧導讀台 |
| 44:18 | Iô-tah Thè Biān-iá-mín Ai-kiûIô-tah óa-kīn Iô-sé-huh kóng, " Góa ê chú, kiû lí iông-ín lí ê lô͘-po̍k kóng chi̍t kù ōe hō͘ góa ê chú thiaⁿ. M̄-thang tùi lí ê lô͘-po̍k siū-khì, in-ūi lí kah Hôa-láu sio-siâng. | 註釋 串珠 盧華 盧導讀台 |
| 44:19 | Góa ê chú bat mn̄g lí chiahê lô͘-po̍k kóng, ' Lín ū lāu-pē, ū hiaⁿ-tī bô? ' | 註釋 串珠 盧華 盧導讀台 |
| 44:20 | Goán kā góa ê Chú kóng, ' Goán ū lāu-pē, í-keng nî lāu, iáu ū i nî lāu só͘ seⁿ ê chi̍t-ê soah-bóe kiáⁿ. I ê a-hiaⁿ í-keng sí, i ê lāu-bú kantaⁿ pàng i chi̍t-ê, i ê lāu-pē koh chin thiàⁿ i. ' | 註釋 串珠 盧華 盧導讀台 |
| 44:21 | Lí kā lí ê lô͘-po̍k kóng, ' Chhōa i lo̍h-lâi góa chia, hō͘ góa chhin-ba̍k khòaⁿ tio̍h i. ' | 註釋 串珠 盧華 盧導讀台 |
| 44:22 | Goán kā góa ê chú kóng, ' Gín-á bē tàng lī-khui i ê lāu-pē, nā lī-khui i ê lāu-pē, lāu-pē it-tēng ē sí. ' | 註釋 串珠 盧華 盧導讀台 |
| 44:23 | Lí kā lí ê lô͘-po̍k kóng, ' Lín ê soah-bóe sió-tī nā bô kah lín chò-hóe lo̍h-.lâi, lín chiū bē tàng koh kìⁿ góa ê bīn. ' | 註釋 串珠 盧華 盧導讀台 |
| 44:24 | " Goán tńg-khì kàu lí ê lô͘-po̍k — goán lāu-pē hia, chiū kā góa ê chú ê ōe tùi i kóng. | 註釋 串珠 盧華 盧導讀台 |
| 44:25 | Goán ê lāu-pē kóng, ' Lín koh khì kā lán tia̍h tām-po̍h-á bí-niûⁿ lâi. ' | 註釋 串珠 盧華 盧導讀台 |
| 44:26 | Goán chiū kóng, ' Goán bē tàng lo̍h-.khì. Goán ê soah-bóe sió-tī nā kah goán chò-hóe khì, goán chiū beh lo̍h-.khì, in-ūi soah-bóe sió-tī nā bô kah goán chò-hóe khì, goán it-tēng bē tàng kìⁿ hit-ê lâng ê bīn. ' | 註釋 串珠 盧華 盧導讀台 |
| 44:27 | Lí ê lô͘-po̍k — góa ê lāu-pē, kā goán kóng, ' Lín chai góa ê bó͘ kā góa seⁿ nn̄g-ê kiáⁿ. | 註釋 串珠 盧華 盧導讀台 |
| 44:28 | Chi̍t-ê lī-khui góa chhut-.khì, góa kóng i it-tēng sī hō͘ iá-siù thiah-chhùi, kàu taⁿ góa iáu bô koh khòaⁿ tio̍h i. | 註釋 串珠 盧華 盧導讀台 |
| 44:29 | Τaⁿ lín koh kā chit-ê chhōa-.khì, lī-khui góa. I nā tú tio̍h hām-hāi, to̍h-sī lín hō͘ góa pe̍h thâu-mn̂g chhi-chhám lo̍h im-hú. ' | 註釋 串珠 盧華 盧導讀台 |
| 44:30 | " Goán lāu-pē ê sèⁿ-miā kah chit-ê gín'á ê sèⁿ-miā sio-liân, taⁿ góa tńg-khì lí ê lô͘-po̍k góa ê lāu-pē hia, nā gín'á bô kah goán tông-chāi, | 註釋 串珠 盧華 盧導讀台 |
| 44:31 | goán ê lāu-pē khòaⁿ bô gín'á, i chiū it-tēng ē sí. Che to̍h-sī goán hō͘ lí ê lô͘-po̍k — goán ê lāu-pē, pe̍h thâu-mn̂g chhi-chhám lo̍h im-hú. | 註釋 串珠 盧華 盧導讀台 |
| 44:32 | In-ūi lí ê lô͘-po̍k bat tùi góa ê lāu-pē tam-pó chit-ê gín'á, kóng, ' Góa nā bô chhōa i tńg-lâi kau lí, góa goān tī lāu-pē ê bīn-chêng it-seng tam-tng chōe. ' | 註釋 串珠 盧華 盧導讀台 |
| 44:33 | Taⁿ kiû lí iông-ín lí ê lô͘-po̍k lâu lo̍h-.lâi, thè chit-ê gín'á chò góa ê chú ê lô͘-po̍k, hō͘ gín'á kah i hiahê a-hiaⁿ chò-hóe tńg-.khì. | 註釋 串珠 盧華 盧導讀台 |
| 44:34 | Nā gín'á bô kah góa chò-hóe khì, goán ná ē-tàng tńg-khì kìⁿ goán ê lāu-pē? Khióng-kiaⁿ goán ē khòaⁿ tio̍h goán lāu-pē só͘ beh tú-.tio̍h ê chai-hō. " | 註釋 串珠 盧華 盧導讀台 |