| 章節 | 全民台語聖經全羅經文 | 註釋 |
| 34:1 | E-li-hu koh ìn kóng: | 註釋 串珠 盧導讀台 |
| 34:2 | Lín ū tì-hūi ê lâng, tio̍h thiaⁿ góa ê ōe, ū tì-sek ê lâng tio̍h àⁿ hīⁿ-khang thiaⁿ góa kóng. | 註釋 串珠 盧導讀台 |
| 34:3 | In-ūi hīⁿ-á chhì-giām lâng ê ōe, chhin-chhiūⁿ téng-hâm hun-pia̍t chu-bī. | 註釋 串珠 盧導讀台 |
| 34:4 | Lán tio̍h ūi kakī kéng hit-ê ha̍p-gî ê, mā tio̍h chò-hóe chai siáⁿ-mi̍h sī hó. | 註釋 串珠 盧導讀台 |
| 34:5 | In-ūi Io-buh ū kóng, góa sī kong-gī, Siōng-tè toa̍t góa ê chèng-lí; | 註釋 串珠 盧導讀台 |
| 34:6 | góa sûi-jiân ū lí, iáu sǹg sī kóng pe̍h-chha̍t ê; góa sûi-jiân bô kòe-sit, só͘ siū ê siong bē i-tit. | 註釋 串珠 盧導讀台 |
| 34:7 | Siáⁿ lâng chhin-chhiūⁿ Io-buh móa chhùi bú-bān, chhin-chhiūⁿ teh lim chúi? | 註釋 串珠 盧導讀台 |
| 34:8 | I kah chok-gia̍t ê lâng tàu-tīn ū lâi-óng, kah pháiⁿ lâng chò-hóe kiâⁿ. | 註釋 串珠 盧導讀台 |
| 34:9 | In-ūi i bat kóng: Lâng ì-ài Siōng-tè, lóng sī bô lī-ek. | 註釋 串珠 盧導讀台 |
| 34:10 | Só͘-í, lín bêng-lí ê lâng tio̍h thiaⁿ góa ê ōe. Siōng-tè choa̍t-tùi bē kiâⁿ pháiⁿ, Choân-lêng-.ê choa̍t-tùi bē kiâⁿ put-gī. | 註釋 串珠 盧導讀台 |
| 34:11 | In-ūi I beh chiàu lâng só͘ chò ê lâi kā i pò-èng, chiàu lâng só͘ kiâⁿ ê lâi hō͘ i tú-.tio̍h. | 註釋 串珠 盧導讀台 |
| 34:12 | Siōng-tè si̍t-chāi bē chò pháiⁿ; Choân-lêng-.ê mā bô phian-su lâi sím-phòaⁿ. | 註釋 串珠 盧導讀台 |
| 34:13 | Siáⁿ lâng kā tē kau-thok I? Siáⁿ lâng an-tēng choân sè-kài? | 註釋 串珠 盧導讀台 |
| 34:14 | I nā choan-sim kò͘ kakī, kā I ê sîn-lêng kah khùi siu-hôe kui kakī, | 註釋 串珠 盧導讀台 |
| 34:15 | Kiàn-nā ū jio̍k-thé ê ē chò chi̍t-ē sí, lâng iû-goân ē kui thó͘. | 註釋 串珠 盧導讀台 |
| 34:16 | Lí nā bêng-lí, chiū tio̍h thiaⁿ chit-ê ōe, àⁿ hīⁿ-khang thiaⁿ góa kóng ōe ê siaⁿ. | 註釋 串珠 盧導讀台 |
| 34:17 | Oàn-hūn kong-pêⁿ ê kám ē chiáng-koân? Hitê ū kong-gī koh ū koân-lêng ê Siōng-tè, lí kám ē-tàng tēng I ū chōe? | 註釋 串珠 盧導讀台 |
| 34:18 | I tùi kun-ông kóng: Lí sī bô hē-lo̍h ê; tùi kùi-cho̍k kóng: Lí sī siâ-ok ê. | 註釋 串珠 盧導讀台 |
| 34:19 | I bô phian-su khoán-thāi ū chiok-ūi ê, mā bô khi-pîn tiōng-hù, in-ūi hiahê lóng sī I ê chhiú só͘ chō ê. | 註釋 串珠 盧導讀台 |
| 34:20 | Bô gōa kú ê tiong-kan, pòaⁿ-mê ê sî, in chiū sí-bông; jîn-bîn siū iô-tāng, teh kòe-.khì; ióng-béng ê siū tû-bia̍t m̄-bián ēng chhiú. | 註釋 串珠 盧導讀台 |
| 34:21 | In-ūi I ê ba̍k-chiu kàm-chhat ta̍k lâng ê lō͘, khòaⁿ-bêng i ê kha-pō͘. | 註釋 串珠 盧導讀台 |
| 34:22 | Bô ū o͘-àm, bô ū sí-ìm, thang hō͘ kiâⁿ pháiⁿ ê lâng khì bih. | 註釋 串珠 盧導讀台 |
| 34:23 | In-ūi I bô kā lâng tiāⁿ tio̍h sî-kî, hō͘ lâng thang kàu I ê bīn-chêng siū sím-phòaⁿ. | 註釋 串珠 盧導讀台 |
| 34:24 | I phah-chhùi kiông-béng ê lâng, m̄-bián cha-mn̄g, siat-li̍p pa̍t lâng lâi thè in. | 註釋 串珠 盧導讀台 |
| 34:25 | In-ūi I kàm-chhat in ê só͘ chò; tī àm-sî kā in chhia-tó, in chiū bia̍t-bông. | 註釋 串珠 盧導讀台 |
| 34:26 | I tī kûn-chiòng teh khòaⁿ ê só͘-chāi kā in phah, ná chhin-chhiūⁿ teh phah chò pháiⁿ ê lâng. | 註釋 串珠 盧導讀台 |
| 34:27 | In-ūi in kiâⁿ phian-chhoa̍h bô tòe I, mā lóng bô tì-ì I ê lō͘. | 註釋 串珠 盧導讀台 |
| 34:28 | Tì-sú hō͘ sànchhiah lâng tōa-siaⁿ hoah ê siaⁿ thàu kàu I bīn-chêng, I mā thiaⁿ tio̍h khùn-khó͘ ê lâng ê tōa-siaⁿ hoah. | 註釋 串珠 盧導讀台 |
| 34:29 | I hō͘ lâng an-chēng, siáⁿ lâng ē hiâm I m̄ tio̍h? I am bīn, siáⁿ lâng khòaⁿ I ē tio̍h? I khoán-thāi chi̍t kok á-.sī chi̍t-ê lâng lóng sī ánne; | 註釋 串珠 盧導讀台 |
| 34:30 | bián-tit bô kèng-khiân ê lâng chò ông, bián-tit ū lâng bé-thong jîn-bîn. | 註釋 串珠 盧導讀台 |
| 34:31 | Kám ū lâng bat tùi Siōng-tè kóng: Góa í-keng siū chek-hoa̍t, bô koh hoān chōe? | 註釋 串珠 盧導讀台 |
| 34:32 | Góa só͘ bô khòaⁿ-.tio̍h ê, kiû Lí chí-sī góa; góa nā bat chò pháiⁿ, góa bô beh koh-chài chò. | 註釋 串珠 盧導讀台 |
| 34:33 | Kám sī I só͘ pò-èng ê bô chiàu lí ê ì-sù, lí chiah the-sî m̄ chiap-siū? Taⁿ tio̍h kéng ê sī lí, m̄-sī góa; lí só͘ chai ê chò lí kóng. | 註釋 串珠 盧導讀台 |
| 34:34 | Bêng-lí ê lâng kah thiaⁿ góa ê ōe ê tì-hūi lâng, lóng ē tùi góa kóng: | 註釋 串珠 盧導讀台 |
| 34:35 | Io-buh só͘ kóng ê bô tì-sek, i ê ōe bô tì-hūi. | 註釋 串珠 盧導讀台 |
| 34:36 | Goān Io-buh siū chhì-giām kàu thiat-té, in-ūi i ê ìn-tap chhin-chhiūⁿ pháiⁿ lâng. | 註釋 串珠 盧導讀台 |
| 34:37 | In-ūi i tī i ê chōe koh ke-thiⁿ pōe-ge̍k; i tī lán tiong-kan phah chhiú, koh ēng chin chē ōe hoán-tùi Siōng-tè. | 註釋 串珠 盧導讀台 |