| 章節 | 全民台語聖經全羅經文 | 註釋 |
| 9:1 | Kám-siā Siōng-chú ê Kong-gī（ Ta-bi̍t ê si, kau hō͘ ga̍k-koaⁿ; tiāu ēng lâm ko-im he̍k ké-siaⁿ ）Góa beh choân-sim kám-siā Siōng-chú; góa beh soan-iông Lí it-chhè kî-biāu ê só͘ chò. | 註釋 串珠 盧導讀台 |
| 9:2 | Góa beh in-ūi Lí lâi hoaⁿ-hí khoài-lo̍k; Chì-koân-.ê ah, góa beh oló Lí ê miâ. | 註釋 串珠 盧導讀台 |
| 9:3 | Góa ê tùi-te̍k oa̍t tńg-sin thè-.khì ê sî, in chiū tī Lí ê bīn-chêng poa̍h-tó bia̍t-bông. | 註釋 串珠 盧導讀台 |
| 9:4 | Lí í-keng thè góa sin-oan, thè góa piān-bêng; Lí chē tī pó-chō, chiàu kong-gī teh sím-phòaⁿ. | 註釋 串珠 盧導讀台 |
| 9:5 | Lí ū chek-pī lia̍t pang, Lí ū siau-bia̍t pháiⁿ lâng; Lí ū kā in ê miâ éng-oán chhat-siau. | 註釋 串珠 盧導讀台 |
| 9:6 | Tùi-te̍k ē siū húi-bia̍t, éng-oán hong-hùi; Lí húi-hoāi in ê siâⁿ, bô lâng koh-chài ē kì-tit in. | 註釋 串珠 盧導讀台 |
| 9:7 | To̍k-to̍k Siōng-chú chē-ūi chò chú kàu éng-oán; I í-keng an-tì I ê pó-chō beh lâi sím-phòaⁿ. | 註釋 串珠 盧導讀台 |
| 9:8 | I ē chiàu kong-gī lâi sím-phòaⁿ sè-kài, chiàu kong-pêⁿ phòaⁿ-koat chèng lâng. | 註釋 串珠 盧導讀台 |
| 9:9 | Siōng-chú koh ē chò siū ap-pek ê lâng ê iàu-sài, sī in tī hoān-lān sî ê siâⁿ-pó. | 註釋 串珠 盧導讀台 |
| 9:10 | Bat Lí ê miâ ê lâng ē óa-khò Lí; in-ūi Siōng-chú Lí m̄ bat khì-sak cháu-chhōe Lí ê lâng. | 註釋 串珠 盧導讀台 |
| 9:11 | Tio̍h oló tòa tī Si-óng ê Siōng-chú, kā I ê só͘ kiâⁿ soan-iông tī chèng lâng ê tiong-kan. | 註釋 串珠 盧導讀台 |
| 9:12 | In-ūi hit ūi ūi lâng sin-oan ê Siōng-tè ē kì-tit in; bô bē kì-.tit khùn-khó͘ ê lâng ê ai-kiû. | 註釋 串珠 盧導讀台 |
| 9:13 | Siōng-chú ah, kiû Lí liân-bín góa; Lí ū tùi sí-bông ê mn̂g kā góa kiù chhut-.lâi, kiû Lí kàm-chhat hiahê oàn-hūn góa ê lâng só͘ hō͘ góa tú-.tio̍h ê khó͘-lān, | 註釋 串珠 盧導讀台 |
| 9:14 | Thang hō͘ góa kóng-khí Lí it-chhè ê hó miâ-siaⁿ; góa beh tī Si-óng ê siâⁿ mn̂g, ūi tio̍h Lí ê kiù-un lâi hoaⁿ-hí. | 註釋 串珠 盧導讀台 |
| 9:15 | Lia̍t-pang hām-lo̍h tī in kakī só͘ khui ê hām-kheⁿ; in ê kha tîⁿ tī in thau-thau-á siat ê lô-bāng. | 註釋 串珠 盧導讀台 |
| 9:16 | Siōng-chú í-keng hián-bêng kakī, I ū kiâⁿ sím-phòaⁿ; pháiⁿ lâng hō͘ kakī ê chhiú só͘ chò ê tîⁿ tio̍h. [im-ga̍k hiáng ìn, Sè-la̍h] | 註釋 串珠 盧導讀台 |
| 9:17 | Pháiⁿ lâng ē kui tī im-hú, hiahê bē kì-tit Siōng-tè ê lia̍t pang mā ē ánne. | 註釋 串珠 盧導讀台 |
| 9:18 | In-ūi Siōng-tè it-tēng bē éng-oán bē kì-tit sànchhiah lâng, khùn-khó͘ ê lâng ê ǹg-bāng it-tēng bē éng-oán bô-.khì. | 註釋 串珠 盧導讀台 |
| 9:19 | Siōng-chú ah, kiû Lí khí-.lâi, m̄ thang hō͘ lâng khah iâⁿ góa; goān lia̍t pang tī Lí ê bīn-chêng siū sím-phòaⁿ! | 註釋 串珠 盧導讀台 |
| 9:20 | Siōng-chú ah, kiû Lí hō͘ in kiaⁿ-hiâⁿ; goān lia̍t kok chai-iáⁿ kakī chí-put-kò sī lâng niā-niā! [Sè-la̍h] | 註釋 串珠 盧導讀台 |