| 章節 | 全民台語聖經全羅經文 | 註釋 |
| 144:1 | Kun-ông Ūi Sèng-lī Kám-un（ Ta-bi̍t ê si. ）Siōng-chú sī góa ê chio̍h-pôaⁿ, sī eng-kai oló ê! I toàn-liān góa ê chhiú gâu cheng-chiàn, kà góa ê chéng-thâu-á ū ki-khiáu ē sio-thâi. | 註釋 串珠 盧導讀台 |
| 144:2 | I sī góa ê chû-ài, góa ê soaⁿ-chē, góa ê siâⁿ-pó, góa ê Kiù-chú, góa ê tîn-pâi, góa só͘ óa-khò ê; I hō͘ góa ê jîn-bîn khut-ho̍k tī góa ē-bīn. | 註釋 串珠 盧導讀台 |
| 144:3 | Siōng-chú ah, lâng sī siáⁿ-mi̍h, Lí kèng-jiân bat i! Lâng ê kiáⁿ sī siáⁿ-mi̍h, Lí kèng-jiân siàu-liām i! | 註釋 串珠 盧導讀台 |
| 144:4 | Lâng chhin-chhiūⁿ pûn chi̍t kháu khùi; i ê ji̍t-chí chhin-chhiūⁿ iáⁿ kòe-.khì. | 註釋 串珠 盧導讀台 |
| 144:5 | Siōng-chú ah, kiû Lí hō͘ thiⁿ sôe lo̍h-.lâi, chhin-sin kàng-lîm; kiû Lí bong soaⁿ, hō͘ soaⁿ chhut ian. | 註釋 串珠 盧導讀台 |
| 144:6 | Kiû Lí hoat-chhut sihnà kā góa ê tùi-te̍k kóaⁿ sì-sòaⁿ; kiû Lí siā-chhut Lí ê chìⁿ hō͘ in khí jiáu-loān. | 註釋 串珠 盧導讀台 |
| 144:7 | Lí tùi téng-bīn chhun chhiú kiù góa, kiù góa chhut tōa-chúi, kiù góa thoat-lī gōa-pang lâng ê chhiú. | 註釋 串珠 盧導讀台 |
| 144:8 | In ê chhùi kóng pe̍h-chha̍t; in ê chiàⁿ chhiú sī kan-chà ê chhiú. | 註釋 串珠 盧導讀台 |
| 144:9 | Siōng-chú ah, góa beh tùi Lí chhiùⁿ sin ê koa, ēng cha̍p tiâu hiân ê sek chhiùⁿ koa oló Lí. | 註釋 串珠 盧導讀台 |
| 144:10 | Lí chín-kiù kun-ông, kiù Lí ê lô͘-po̍k — Ta-bi̍t thoat-lī thâi lâng ê to. | 註釋 串珠 盧導讀台 |
| 144:11 | Kiû Lí chín-kiù góa, kiù góa thoat-lī gōa-pang lâng ê chhiú. In ê chhùi kóng pe̍h-chha̍t; in ê chiàⁿ chhiú sī kan-chà ê chhiú. | 註釋 串珠 盧導讀台 |
| 144:12 | Goán ê chapo͘ kiáⁿ tng siàu-liân ê sî, chhin-chhiūⁿ chhiū-á tōa châng; goán ê chabó͘ kiáⁿ chhin-chhiūⁿ chhù-kak ê chio̍h-thiāu, chiàu khí ông-kiong ê khoán-sit tiau-tok. | 註釋 串珠 盧導讀台 |
| 144:13 | Goán ê chhek-chhng móa-móa, ē chhut ta̍k chióng ê bí-niûⁿ; goán ê iûⁿ tī soaⁿ-iá seⁿ-thòaⁿ, chiâⁿ-chheng chiâⁿ-bān. | 註釋 串珠 盧導讀台 |
| 144:14 | Goán ê gû thoa hòe móa chài, bô lâng ji̍p-lâi chhim-chiàm; goán mā bián chhut-khì cheng-chiàn, goán ê ke-lō͘ bô thî-khàu ê siaⁿ. | 註釋 串珠 盧導讀台 |
| 144:15 | Tú tio̍h chit khoán kéng-hóng ê jîn-bîn chin ū hok-khì! Ū Siōng-chú chò in ê Siōng-tè ê chú-bîn chin ū hok-khì! | 註釋 串珠 盧導讀台 |