| 章節 | 全民台語聖經全羅經文 | 註釋 |
| 39:1 | Go͘-k Pī Phah-pāiChì-koân Siōng-chú kóng, " Jîn-chú, lí tio̍h ǹg Go͘-k lâi soan-pò͘ kong-kek i kóng, chì-koân Siōng-chú ánne kóng: Me-sek, Thô͘-bal ê chhōa-thâu ê ông — Go͘-k, Góa kah lí chò tùi-te̍k. | 註釋 串珠 盧俊義 盧導讀台 |
| 39:2 | Góa beh hō͘ lí oa̍t tńg-.lâi, Góa beh chhōa lí chìn-chêng, hō͘ lí tùi pak-hong ê ke̍k-thâu lâi, chhōa lí kàu I-su-la-el ê soaⁿ. | 註釋 串珠 盧俊義 盧導讀台 |
| 39:3 | Góa beh tùi lí ê tò chhiú phah ka-la̍uh lí ê kiong, tùi lí ê chiàⁿ chhiú phah lak lí ê chìⁿ. | 註釋 串珠 盧俊義 盧導讀台 |
| 39:4 | Lí kah lí ê kun-tūi í-ki̍p kah lí lâi ê lia̍t kok jîn-bîn ē tó tī I-su-la-el ê soaⁿ. Góa beh kā lí hō͘ ta̍k chióng ê eng-chiáu kah chhân-iá ê iá-siù chò chia̍h-mi̍h. | 註釋 串珠 盧俊義 盧導讀台 |
| 39:5 | Lí ē tó tī chhân-iá, in-ūi Góa bat ánne kóng. Che sī chì-koân Siōng-chú kóng ê. | 註釋 串珠 盧俊義 盧導讀台 |
| 39:6 | Góa mā beh kàng-lo̍h hóe tī Má-gok kah tó-sū an-jiân seng-oa̍h ê lâng ê sin chiūⁿ; in chiū ē chai Góa to̍h-sī Siōng-chú. | 註釋 串珠 盧俊義 盧導讀台 |
| 39:7 | " Góa beh tī Góa ê chú-bîn — I-su-la-el tiong hián-chhut Góa ê sèng-miâ, mā bô iông-ín Góa ê sèng-miâ koh siū siat-to̍k; lia̍t kok lâng chiū ē chai Góa to̍h-sī Siōng-chú — I-su-la-el tiong ê sèng ê. | 註釋 串珠 盧俊義 盧導讀台 |
| 39:8 | " Chì-koân Siōng-chú kóng: Lí khòaⁿ, tāichì lâi ā, mā ē ánne hō͘ i chiâⁿ, che sī Góa só͘ kóng ê ji̍t. | 註釋 串珠 盧俊義 盧導讀台 |
| 39:9 | " Tòa tī I-su-la-el siâⁿ ê lâng beh chhut-.khì, khí hóe sio i ê ke-si, to̍h-sī tōa-sè ê tîn-pâi, kiong-chìⁿ, thûi-á kah chhiuⁿ, lóng beh ēng in lâi hiâⁿ hóe, keng-kòe chhit nî; | 註釋 串珠 盧俊義 盧導讀台 |
| 39:10 | sīm-chì in bô beh tùi chhân-iá khioh chhâ, mā bô beh tùi chhiū-nâ chhò chhiū; in-ūi in ē ēng ke-si hiâⁿ hóe, koh ē chhiúⁿ hiahê chhiúⁿ in ê lâng, kiap hiahê kiap in ê lâng. Che to̍h-sī chì-koân Siōng-chú kóng ê. " | 註釋 串珠 盧俊義 盧導讀台 |
| 39:11 | Go͘-k ê Bâi-chòngSiōng-chú kóng, " Tng hit ji̍t, Góa beh kā I-su-la-el tē, hái ê tang pêng, lâng só͘ keng-kòe ê soaⁿ-kok, siúⁿ-sù hō͘ Go͘-k chò bōng-tē lâi chó͘-tòng keng-kòe ê lâng ê lō͘. Tī hia, lâng ē bâi-chòng Go͘-k kah i ê chèng lâng; ē kā hit só͘-chāi chheng-chò ' Ha-mong-go͘k（ Chù, Hi-bú-lâi bûn ê im-tha̍k, ì-sù sī " Khǹg Go͘-k kun si-thé "）ê soaⁿ-kok'. | 註釋 串珠 盧俊義 盧導讀台 |
| 39:12 | I-su-la-el ê chú-bîn ē kā in bâi-chòng, keng-kòe chhit goe̍h-ji̍t kú, hō͘ hit-ê tē chheng-khì. | 註釋 串珠 盧俊義 盧導讀台 |
| 39:13 | Choân kok ê jîn-bîn ē kā in bâi-chòng. Tng Góa tit tio̍h êng-kng ê ji̍t, chit-ê tāichì ē hō͘ in tit tio̍h miâ-siaⁿ. Che sī chì-koân Siōng-chú kóng ê. | 註釋 串珠 盧俊義 盧導讀台 |
| 39:14 | In ē phài lâng tiāⁿtiāⁿ sûn-lô choân tē kah keng-kòe ê lâng chò-hóe bâi-chòng hiahê chhun lo̍h-lâi tī tē-.ni̍h ê sin-si, thang chheng-khì hit-ê só͘-chāi. Kàu chhit goe̍h-ji̍t móa, in ē koh sì-kè khì chhōe. | 註釋 串珠 盧俊義 盧導讀台 |
| 39:15 | Sûn-lô choân tē ê lâng ē keng-kòe hia, nā ū lâng khòaⁿ tio̍h lâng ê kut-hâi, chiū tī hia li̍p chi̍t-ê kì-hō, thèng-hāu bâi-chòng ê lâng kā i bâi-chòng tī Ha-mong-gok ê soaⁿ-kok. | 註釋 串珠 盧俊義 盧導讀台 |
| 39:16 | Mā ē ū chi̍t-ê siâⁿ, miâ kiò-chò Ha-mo͘-nah, in ē ánne chheng-khì hit-ê tē. | 註釋 串珠 盧俊義 盧導讀台 |
| 39:17 | " Jîn-chú, chì-koân Siōng-chú ánne kóng: Lí tio̍h tùi ta̍k chióng ê poe-chiáu í-ki̍p chhân-iá ê iá-siù, kóng: Lín tio̍h chū-chi̍p chò-tīn lâi, tio̍h tùi sì-hng chū-chi̍p kàu Góa ūi tio̍h lín só͘ hiàn ê chè, to̍h-sī I-su-la-el soaⁿ ê tōa chè, hō͘ lín thang chia̍h bah, lim hoeh. | 註釋 串珠 盧俊義 盧導讀台 |
| 39:18 | Lín ē chia̍h ióng-sū ê bah, lim tē-chiūⁿ siú-léng ê hoeh, kang ê mî-iûⁿ, iûⁿ-á, kang ê soaⁿ-iûⁿ kah kang ê gû, lóng sī Ba-siáng ê pûi ê chengseⁿ. | 註釋 串珠 盧俊義 盧導讀台 |
| 39:19 | Lín chia̍h Góa ūi tio̍h lín só͘ hiàn ê chè, ē chia̍h iû chia̍h kàu pá, lim hoeh lim kàu chùi. | 註釋 串珠 盧俊義 盧導讀台 |
| 39:20 | Lín ē tī Góa ê toh chia̍h bé-phit kah chē chhia ê, í-ki̍p ióng-sū kah só͘-ū ê chiàn-sū chia̍h kàu pá-pá. Che sī chì-koân Siōng-chú kóng ê. " | 註釋 串珠 盧俊義 盧導讀台 |
| 39:21 | I-su-la-el ê Ho̍k-hengSiōng-chú kóng, " Góa beh tī lia̍t kok tiong hián-bêng Góa ê êng-kng, lia̍t kok mā ē khòaⁿ tio̍h Góa só͘ kiâⁿ ê sím-phòaⁿ kah Góa só͘ hē tī in sin chiūⁿ ê chhiú. | 註釋 串珠 盧俊義 盧導讀台 |
| 39:22 | Án-ne, tùi hit ji̍t í-āu, I-su-la-el ê chú-bîn chiū ē chai Góa sī Siōng-chú — in ê Siōng-tè. | 註釋 串珠 盧俊義 盧導讀台 |
| 39:23 | Lia̍t kok mā ē chai I-su-la-el ê chú-bîn siū lia̍h sī in-ūi in ê chōe-kò. In tek-chōe Góa, Góa tùi in am Góa ê bīn, kā in kau tī in ê tùi-te̍k ê chhiú, in chiū lóng tó tī to hā. | 註釋 串珠 盧俊義 盧導讀台 |
| 39:24 | Góa chiàu in ê ù-òe, chiàu in ê kòe-sit khoán-thāi in, tùi in am Góa ê bīn. " | 註釋 串珠 盧俊義 盧導讀台 |
| 39:25 | Só͘-í, chì-koân Siōng-chú ánne kóng, " Góa beh hō͘ Iâ-kop siū lia̍h ê lâng tò tńg-.lâi, mā beh liân-bín I-su-la-el choân ke, | 註釋 串珠 盧俊義 盧導讀台 |
| 39:26 | mā beh ūi tio̍h Góa ê sèng-miâ jia̍t-sim. | 註釋 串珠 盧俊義 盧導讀台 |
| 39:27 | In tī pún só͘-chāi an-jiân seng-oa̍h, bô lâng hō͘ in kiaⁿ, tī Góa kā in tùi lia̍t kok tiong chhōa tò tńg-.lâi, tùi tùi-te̍k ê tē chū-chi̍p óa-.lâi. Góa tī lia̍t kok ê bīn-chêng, tī in sin chiūⁿ hián-bêng chò sèng ê sî, in ē tam-tng in ê kiàn-siàu kah in pōe-ge̍k Góa it-chhè ê chōe. | 註釋 串珠 盧俊義 盧導讀台 |
| 39:28 | Góa hō͘ in siū lia̍h khì tī lia̍t pang, koh kā in chū-chi̍p tò tńg-lâi pún só͘-chāi, bô lâu kah chi̍t-ê lâng tī hia; in chiū ē chai Góa sī in ê Siōng-tè — Siōng-chú. | 註釋 串珠 盧俊義 盧導讀台 |
| 39:29 | Góa mā bô koh tùi in am Góa ê bīn, in-ūi Góa í-keng kā Góa ê sîn-lêng kàng-lo̍h tī I-su-la-el ê chú-bîn. Che sī chì-koân Siōng-chú kóng ê. " | 註釋 串珠 盧俊義 盧導讀台 |