| 章節 | 全民台語聖經全羅經文 | 註釋 |
| 15:1 | Kah A-má-le̍k Lâng Kau-chiànSa-mu-el kā Sàu-lô kóng, " Siōng-chú chhe góa kā lí boah iû, siat-li̍p lí chò ông, tī-lí I ê chú-bîn — I-su-la-el lâng; só͘-í, lí tio̍h thiaⁿ Siōng-chú só͘ kóng ê ōe. | 註釋 串珠 盧俊義 盧華 盧導讀台 |
| 15:2 | Bān-kun ê Siōng-chú ánne kóng, ' I-su-la-el lâng chhut Ai-gi̍p ê sî, A-má-le̍k lâng án-chóaⁿ khoán-thāi in, án-chóaⁿ chia̍t in ê lō͘, góa lóng ē kì-tit. | 註釋 串珠 盧俊義 盧華 盧導讀台 |
| 15:3 | Taⁿ lí tio̍h khì phah A-má-le̍k, choân-pō͘ kā in bia̍t-bông, m̄ thang pó-sioh in, kā lâm, lí, gín'á kah chia̍h leng ê, í-ki̍p gû, iûⁿ, lo̍k-tô kah lî-á, choân-pō͘ kā in thâi-sí. '" | 註釋 串珠 盧俊義 盧華 盧導讀台 |
| 15:4 | Sàu-lô chiū chio-chi̍p jîn-bîn tī Thi-la̍k-in, kā in tiám-sǹg, chóng-kiōng pō͘-peng jī-cha̍p bān, Iô-tah lâng chi̍t bān. | 註釋 串珠 盧俊義 盧華 盧導讀台 |
| 15:5 | Sàu-lô kàu A-má-le̍k ê siâⁿ, bâi-ho̍k tī soaⁿ-kok tiong. | 註釋 串珠 盧俊義 盧華 盧導讀台 |
| 15:6 | Sàu-lô kā Ke-nî lâng kóng, " Lín lo̍h-khì lī-khui A-má-le̍k lâng, bián-tit góa kā lín kah in chò chi̍t-ē châu-bia̍t, in-ūi I-su-la-el lâng chhut Ai-gi̍p ê sî, lín bat hó khoán-thāi in. " Chiū ánne, Ke-nî lâng lī-khui A-má-le̍k lâng khì. | 註釋 串珠 盧俊義 盧華 盧導讀台 |
| 15:7 | Sàu-lô phah A-má-le̍k lâng, tui Ha-bí-la̍h kàu Ai-gi̍p thâu-chêng ê Siu-i. | 註釋 串珠 盧俊義 盧華 盧導讀台 |
| 15:8 | I kā A-má-le̍k ông A-gak oa̍h-oa̍h lia̍h khí-.lâi, ēng to kā i ê jîn-bîn choân-pō͘ thâi-sí. | 註釋 串珠 盧俊義 盧華 盧導讀台 |
| 15:9 | Chóng-.sī, Sàu-lô kah jîn-bîn pó-sioh A-gak, mā pó-sioh siōng hó ê iûⁿ, gû, gû-á, iûⁿ-á kah it-chhè hó ê mi̍h, m̄-khéng choân-pō͘ kā i bia̍t-tiāu. Kiàn-nā hā-chiān m̄ chiâⁿ-mi̍h ê, lóng choân-pō͘ thâi-sí. | 註釋 串珠 盧俊義 盧華 盧導讀台 |
| 15:10 | Siōng-chú Hō͘-hóe hō͘ Sàu-lô Chò ÔngHit sî, Siōng-chú ê ōe lîm-kàu Sa-mu-el kóng, | 註釋 串珠 盧俊義 盧華 盧導讀台 |
| 15:11 | " Góa ūi tio̍h siat-li̍p Sàu-lô chò ông lâi hō͘-hóe, in-ūi i oa̍t tńg-.khì bô tòe Góa, bô chun-siú Góa ê bēng-lēng. " Sa-mu-el chin chheh-sim, kui mê kiû Siōng-chú. | 註釋 串珠 盧俊義 盧華 盧導讀台 |
| 15:12 | Sa-mu-el keh kang chá-khí, thàu-chá beh khì gêng-chiap Sàu-lô. Ū lâng kā Sa-mu-el kóng, " Sàu-lô khì-kàu Kal-mel, tī hia ūi kakī khiā chio̍h-pi, koh oa̍t-tńg kòe-.khì, lo̍h kàu Gil-gal. " | 註釋 串珠 盧俊義 盧華 盧導讀台 |
| 15:13 | Sa-mu-el kàu Sàu-lô hia, Sàu-lô kā i kóng, " Goān Siōng-chú kā lí sù-hok, góa í-keng chun-siú Siōng-chú ê bēng-lēng à. " | 註釋 串珠 盧俊義 盧華 盧導讀台 |
| 15:14 | Sa-mu-el kóng, " Án-ne, chiū ū chit-ê iûⁿ meh-meh háu ji̍p góa ê hīⁿ-khang kah góa só͘ thiaⁿ tio̍h gû teh ma-ma kiò, sī siáⁿ-mi̍h goân-in? " | 註釋 串珠 盧俊義 盧華 盧導讀台 |
| 15:15 | Sàu-lô kóng, " In tùi A-má-le̍k lâng hia tòa-.lâi ê, in-ūi jîn-bîn pó-sioh siōng hó ê iûⁿ kah gû, beh hiàn hō͘ Siōng-chú — lí ê Siōng-tè, kî-tha ê goán lóng châu-bia̍t. " | 註釋 串珠 盧俊義 盧華 盧導讀台 |
| 15:16 | Sa-mu-el kā Sàu-lô kóng, " Lí tiām-tiām, góa beh kā Siōng-chú chā-mê só͘ kā góa kóng ê lâi kā lí kóng. " Sàu-lô ìn i kóng, " Chhiáⁿ kóng. " | 註釋 串珠 盧俊義 盧華 盧導讀台 |
| 15:17 | Sa-mu-el kóng, " Chá-chêng lí sûi-jiân kakī khòaⁿ-chò bî-sè, kám m̄-sī siū siat-li̍p chò I-su-la-el chi-cho̍k ê thâu? Siōng-chú ēng iû kā lí boah, hō͘ lí chò ông lâi tī-lí I-su-la-el. | 註釋 串珠 盧俊義 盧華 盧導讀台 |
| 15:18 | Jî-chhiáⁿ Siōng-chú chhe lí chhut-hoat khì, hoan-hù lí kóng, A-má-le̍k lâng sī ū chōe ê lâng, lí tio̍h khì choân-pō͘ kā in châu-bia̍t tiāu, koh kah in kau-chiàn, kàu in lóng bia̍t-bông. | 註釋 串珠 盧俊義 盧華 盧導讀台 |
| 15:19 | Lí án-chóaⁿ bô chun-thàn Siōng-chú ê ōe, kóaⁿ-kín khì chhiúⁿ mi̍h, kiâⁿ Siōng-chú só͘ khòaⁿ-chò pháiⁿ ê tāichì? " | 註釋 串珠 盧俊義 盧華 盧導讀台 |
| 15:20 | Sàu-lô kā Sa-mu-el kóng, " Góa si̍t-chāi ū chun-thàn Siōng-chú ê bēng-lēng, kiâⁿ Siōng-chú só͘ chhe góa kiâⁿ ê lō͘, lia̍h A-má-le̍k ông A-gak lâi, choân-pō͘ châu-bia̍t A-má-le̍k lâng. | 註釋 串珠 盧俊義 盧華 盧導讀台 |
| 15:21 | Chóng-.sī, jîn-bîn tùi só͘ chhiúⁿ ê mi̍h ê tiong-kan, chhú iûⁿ, gû, eng-kai hiàn ê mi̍h ê siōng hó ê, beh tī Gil-gal chè-hiàn Siōng-chú — lí ê Siōng-tè. " | 註釋 串珠 盧俊義 盧華 盧導讀台 |
| 15:22 | Sa-mu-el kóng, " Siōng-chú hoaⁿ-hí sio-chè ê chè-sū, kám chhin-chhiūⁿ hoaⁿ-hí lâng chun-thàn Siōng-chú ê ōe? Lí khòaⁿ, chun-thàn iâⁿ-kòe hiàn chè, chun-thàn sī iâⁿ-kòe iûⁿ-káng ê iû. | 註釋 串珠 盧俊義 盧華 盧導讀台 |
| 15:23 | In-ūi pōe-poān sī chhin-chhiūⁿ kiâⁿ siâ-su̍t ê chōe, ngē-sim sī chhin-chhiūⁿ ho̍k-sāi hi-ké, chhin-chhiūⁿ pài ngó͘-siōng. Ūi tio̍h lí khì-sak Siōng-chú ê ōe, I mā ē khì-sak lí, bô koh hō͘ lí chò ông. " | 註釋 串珠 盧俊義 盧華 盧導讀台 |
| 15:24 | Sàu-lô tùi Sa-mu-el kóng, " Góa ū chōe, in-ūi góa ū hoān tio̍h Siōng-chú ê bēng-lēng kah lí ê ōe, sī tùi góa kiaⁿ jîn-bîn, thiaⁿ in ê ōe. | 註釋 串珠 盧俊義 盧華 盧導讀台 |
| 15:25 | Taⁿ kiû lí sià-bián góa ê chōe, kah góa tńg-.khì, hō͘ góa thang kèng-pài Siōng-chú. " | 註釋 串珠 盧俊義 盧華 盧導讀台 |
| 15:26 | Sa-mu-el kā Sàu-lô kóng, " Góa m̄ kah lí tńg-.khì, in-ūi lí khì-sak Siōng-chú ê bēng-lēng, Siōng-chú mā khì-sak lí, bô koh hō͘ lí chò I-su-la-el ê ông. " | 註釋 串珠 盧俊義 盧華 盧導讀台 |
| 15:27 | Sa-mu-el oa̍t tńg-sin beh lī-khui, Sàu-lô khiú i ê saⁿ-á-ki, saⁿ chiū li̍h tn̄g. | 註釋 串珠 盧俊義 盧華 盧導讀台 |
| 15:28 | Sa-mu-el kā i kóng, " Kin-á-ji̍t Siōng-chú hō͘ I-su-la-el kok kah lí choa̍t-tn̄g, mā sī ánne, beh kā kok siúⁿ-sù hō͘ lí ê chhù-piⁿ ê chi̍t-ê pí lí khah hó ê. | 註釋 串珠 盧俊義 盧華 盧導讀台 |
| 15:29 | I-su-la-el ê Tōa-lêng-.ê bô kóng pe̍h-chha̍t, mā bô hō͘-hóe, in-ūi I m̄-sī sè-kan lâng, ē ū hō͘-hóe. " | 註釋 串珠 盧俊義 盧華 盧導讀台 |
| 15:30 | Sàu-lô kóng, " Góa ū chōe, sûi-jiân ánne, kiû lí chun-tiōng góa tī góa ê jîn-bîn ê tiúⁿ-ló kah I-su-la-el lâng ê bīn-chêng kah góa tńg-.khì, hō͘ góa kèng-pài Siōng-chú — lí ê Siōng-tè. " | 註釋 串珠 盧俊義 盧華 盧導讀台 |
| 15:31 | Sa-mu-el chiū oa̍t tńg-sin tòe Sàu-lô khì, Sàu-lô chiū kèng-pài Siōng-chú. | 註釋 串珠 盧俊義 盧華 盧導讀台 |
| 15:32 | Sa-mu-el kóng, " Lín tio̍h tòa A-má-le̍k ông A-gak lâi góa chia. " A-gak chiū an-sim lâi-kàu i ê bīn-chêng, A-gak kóng, " Sí-bông ê kan-khó͘ it-tēng kòe-khì à. " | 註釋 串珠 盧俊義 盧華 盧導讀台 |
| 15:33 | Sa-mu-el kóng, " Lí ê to bat hō͘ chabó͘ lâng bô kiáⁿ, ánne lí ê lāu-bú tī chabó͘ lâng tiong-kan mā ē bô kiáⁿ. " Chiū ánne, Sa-mu-el tī Gil-gal, Siōng-chú ê bīn-chêng, kā A-gak phòa-chò kui tè. | 註釋 串珠 盧俊義 盧華 盧導讀台 |
| 15:34 | Sa-mu-el khì La̍h-má, Sàu-lô chiūⁿ-khì i ê chhù, kàu Sàu-lô ê Gi-be-at. | 註釋 串珠 盧俊義 盧華 盧導讀台 |
| 15:35 | Sa-mu-el kàu i sí ê ji̍t, bô koh lâi kìⁿ Sàu-lô, in-ūi Sa-mu-el ūi tio̍h Sàu-lô iu-būn. Siōng-chú in-ūi siat-li̍p Sàu-lô chò I-su-la-el ông, mā ū hō͘-hóe. | 註釋 串珠 盧俊義 盧華 盧導讀台 |