| 章節 | 全民台語聖經全羅經文 | 註釋 |
| 16:1 | Ta-bi̍t Siū Ko-li̍p Chò ÔngSiōng-chú kā Sa-mu-el kóng, " Góa í-keng khì-sak Sàu-lô, bô koh hō͘ i chò I-su-la-el ông, lí ūi tio̍h i iu-būn beh kàu gōa kú? Lí tio̍h ēng kak té iû móa-móa, lí khì, Góa beh chhe lí khì Bia̍t-lé-hèm lâng I-é-sái hia, in-ūi Góa tī i ê kiáⁿ ê tiong-kan chún-pī chi̍t-ê ông. " | 註釋 串珠 盧俊義 盧華 盧導讀台 |
| 16:2 | Sa-mu-el kóng, " Góa án-chóaⁿ thang khì? Sàu-lô nā thiaⁿ-.tio̍h, i ē thâi góa. " Siōng-chú kóng, " Lí thang tòa chi̍t chiah gû-á kah lí khì, tio̍h kóng, ' Góa lâi sī beh chè-hiàn Siōng-chú. ' | 註釋 串珠 盧俊義 盧華 盧導讀台 |
| 16:3 | Lí tio̍h chhiáⁿ I-é-sái lâi hù chit-ê chè-sū, Góa ē chí-sī lí só͘ eng-kai kiâⁿ ê tāichì. Góa só͘ chí-sī lí ê lâng, lí tio̍h thè Góa kā i boah iû. " | 註釋 串珠 盧俊義 盧華 盧導讀台 |
| 16:4 | Sa-mu-el chiū chiàu Siōng-chú ê ōe khì chò. I lâi-kàu Bia̍t-lé-hèm, siâⁿ-.ni̍h hiahê tiúⁿ-ló lóng phi̍h-phi̍h chhoah, chhut-lâi kā i gêng-chiap kóng, " Lí lâi kám sī ūi tio̍h pêng-an? " | 註釋 串珠 盧俊義 盧華 盧導讀台 |
| 16:5 | Sa-mu-el ìn kóng, " Ūi tio̍h pêng-an, góa sī beh chè-hiàn Siōng-chú. Lín tio̍h chheng-khì kakī, lâi kah góa hù chè-sū. " Sa-mu-el chiū hō͘ I-é-sái kah i hiahê kiáⁿ chheng-khì, kiò in lâi hù chè-sū. | 註釋 串珠 盧俊義 盧華 盧導讀台 |
| 16:6 | In lâi liáu-āu, Sa-mu-el khòaⁿ tio̍h E-lí-ap, ì-sù kóng: Siōng-chú só͘ beh boah iû ê, kó-jiân tī i ê bīn-chêng. | 註釋 串珠 盧俊義 盧華 盧導讀台 |
| 16:7 | Chóng-.sī, Siōng-chú kā Sa-mu-el kóng, " M̄-thang khòaⁿ i ê iông-māu kah i seng-khu ê tōa-hàn, chit-ê lâng sī Góa só͘ kī-choa̍t ê. In-ūi Siōng-chú teh khòaⁿ bô chhin-chhiūⁿ lâng teh khòaⁿ, lâng khòaⁿ gōa-māu, Siōng-chú sī khòaⁿ lāi-sim. " | 註釋 串珠 盧俊義 盧華 盧導讀台 |
| 16:8 | I-é-sái kiò A-bi-na-tap lâi, hō͘ i tùi Sa-mu-el ê bīn-chêng keng-kòe, Sa-mu-el kóng, " Siōng-chú mā bô kéng chit-ê lâng. " | 註釋 串珠 盧俊義 盧華 盧導讀台 |
| 16:9 | I-é-sái koh kiò Siaⁿ-mah keng-kòe, i kóng, " Siōng-chú mā bô kéng chit-ê. " | 註釋 串珠 盧俊義 盧華 盧導讀台 |
| 16:10 | I-é-sái hō͘ i hiahê chhit-ê kiáⁿ, lóng tùi Sa-mu-el ê bīn-chêng keng-kòe. Sa-mu-el kā I-é-sái kóng, " Siōng-chú mā bô kéng chiahê. " | 註釋 串珠 盧俊義 盧華 盧導讀台 |
| 16:11 | Sa-mu-el kā I-é-sái kóng, " Lí ê kiáⁿ kám lóng tī chia? " I-é-sái ìn kóng, " Iáu ū chi̍t-ê soah-bóe ê, taⁿ teh chhī iûⁿ. " Sa-mu-el kā I-é-sái kóng, " Lí tio̍h chhe lâng khì chhōa i lâi, in-ūi i iáu-bōe lâi, lán bô beh chē-toh. " | 註釋 串珠 盧俊義 盧華 盧導讀台 |
| 16:12 | I-é-sái chiū chhe lâng khì chhōa i ji̍p-.lâi. I sī chhiah-sek, ba̍k-chiu chheng-siù, seⁿ-chò hó khòaⁿ. Siōng-chú kóng, " Chit-ê lâng to̍h-sī, lí khí-lâi kā i boah iû. " | 註釋 串珠 盧俊義 盧華 盧導讀台 |
| 16:13 | Sa-mu-el chiū ēng kak lāi ê iû, tī i hiahê a-hiaⁿ ê tiong-kan kā i boah iû. Τùi hit ji̍t khí, Siōng-chú ê Sèng Sîn tōa-tōa lîm-kàu Ta-bi̍t. Sa-mu-el chhut-hoat tńg-khì La̍h-má. | 註釋 串珠 盧俊義 盧華 盧導讀台 |
| 16:14 | Ta-bi̍t tī Sàu-lô ê Kiong-tiānSiōng-chú ê Sèng Sîn lī-khui Sàu-lô, ū pháiⁿ sîn tùi Siōng-chú hia lâi, kā i kiáu-jiáu. | 註釋 串珠 盧俊義 盧華 盧導讀台 |
| 16:15 | Sàu-lô ê jîn-sîn tùi i kóng, " Lí khòaⁿ, taⁿ ū chi̍t-ê pháiⁿ sîn tùi Siōng-chú hia lâi kā lí kiáu-jiáu. | 註釋 串珠 盧俊義 盧華 盧導讀台 |
| 16:16 | Goán ê chú tio̍h bēng-lēng kin-tòe lí bīn-chêng ê jîn-sîn, chhōe chi̍t-ê gâu tôaⁿ khîm ê lâi, tùi Siōng-chú hia lâi ê pháiⁿ sîn lîm-kàu lí ê sî, hō͘ i ēng chhiú tôaⁿ khîm, lí chiū ē bô tāichì. " | 註釋 串珠 盧俊義 盧華 盧導讀台 |
| 16:17 | Sàu-lô kā i ê jîn-sîn kóng, " Lín kā góa chhōe chi̍t-ê gâu tôaⁿ khîm ê, chhōa-lâi góa chia. " | 註釋 串珠 盧俊義 盧華 盧導讀台 |
| 16:18 | Siàu-liân lâng tiong-kan ū chi̍t-ê kóng, " Góa bat khòaⁿ tio̍h Bia̍t-lé-hèm lâng I-é-sái chi̍t-ê kiáⁿ gâu tôaⁿ khîm, sī tōa ióng-sū, koh sī chiàn-sū, kóng-ōe ū tì-hūi, bīn-māu hó khòaⁿ, Siōng-chú mā kah i tông-chāi. " | 註釋 串珠 盧俊義 盧華 盧導讀台 |
| 16:19 | Sàu-lô chhe sù-chiá khì kìⁿ I-é-sái, kóng, " Chhe lí ê kiáⁿ Ta-bi̍t, to̍h-sī hit-ê chhī iûⁿ ê, lâi góa chia. " | 註釋 串珠 盧俊義 盧華 盧導讀台 |
| 16:20 | I-é-sái chiū ēng lî-á chài piáⁿ kah chi̍t phôe-tē ê chiú, kah chi̍t chiah soaⁿ-iûⁿ-á, kau i ê kiáⁿ Ta-bi̍t, khì sàng hō͘ Sàu-lô. | 註釋 串珠 盧俊義 盧華 盧導讀台 |
| 16:21 | Ta-bi̍t lâi-kàu Sàu-lô hia, kin-tòe tī i ê bīn-chêng. Sàu-lô chin thiàⁿ i, Ta-bi̍t chiū chò Sàu-lô gia̍h kun-khì ê lâng. | 註釋 串珠 盧俊義 盧華 盧導讀台 |
| 16:22 | Sàu-lô chhe lâng khì kìⁿ I-é-sái kóng, " Kiû lí iông-ín Ta-bi̍t kin-tòe tī góa bīn-chêng, in-ūi i tī góa ê ba̍k-chiu chêng ē tit tio̍h un-tián. " | 註釋 串珠 盧俊義 盧華 盧導讀台 |
| 16:23 | Tùi Siōng-chú hia lâi ê pháiⁿ sîn lîm-kàu Sàu-lô ê sî, Ta-bi̍t chiū the̍h khîm ēng chhiú lâi tôaⁿ. Sàu-lô chiū khoan-sim, tit tio̍h hó, pháiⁿ sîn chiū lī-khui i. | 註釋 串珠 盧俊義 盧華 盧導讀台 |