Le̍k-tāi-chì Siōng-koàn/歷代志上簡介 線上收聽:中文和合本 台語聖經 客語聖經 福州話聖經 希伯來文讀經 下載檔案 關於語音聖經
13 Iok-kūi Chhian-chhut Ki-lia̍t-iâ-lîm
( SMH 6: 1-11)
Ta-bi̍t kah chiahê iâⁿ-tiúⁿ, liân-tiúⁿ, kah chiahê thâu-lâng chham-siông.
2 Ta-bi̍t tùi I-su-la-el choân hōe-chiòng kóng, " Lín nā lia̍h-chò hó, koh sī chhut tī Siōng-chú — lán ê Siōng-tè ê ì-sù, taⁿ lán chiū chhe lâng piàn kiâⁿ I-su-la-el choân tē, kiàn-nā lán hiahê iáu chhun lo̍h-.lâi ê hiaⁿ-tī kah tòa tī ū kau-iá ê siâⁿ ê chè-si Lē-bī lâng, hō͘ in lóng chū-chi̍p lâi lán chia.
3 Lán chiū thang tòa lán ê Siōng-chú ê iok-kūi lâi-kàu lán chia, in-ūi Sàu-lô ê sî-chūn, lán bô ēng hit-ê iok-kūi lâi mn̄g Siōng-tè. "
4 Choân hōe-chiòng lóng kóng, thang ánne kiâⁿ, chèng lâng lóng kā chit-ê tāichì khòaⁿ-chò sī hó.
5 Chiū ánne, Ta-bi̍t tiàu I-su-la-el lâng, tùi Ai-gi̍p Si-ho͘l ê khe, it-ti̍t kàu Ha-mat chhut-ji̍p ê só͘-chāi, beh tùi Ki-lia̍t-iâ-lîm tòa Siōng-chú ê iok-kūi lâi.
6 Ta-bi̍t kah I-su-la-el jîn-bîn chiū lâi-kàu Ba-la̍h, to̍h-sī sio̍k Iô-tah ê Ki-lia̍t-iâ-lîm, ài beh tùi hia tòa hit-ê Siōng-chú — Siōng-tè ê iok-kūi, to̍h-sī ēng tiàm tī ki-lō͘-peng tiong-kan ê Siōng-chú ê miâ lâi chheng-ho͘ ê.
7 In ēng sin ê chhia chài Siōng-tè ê iok-kūi, tùi A-bi-na-tap ê chhù-chhut-.lâi, U-chà kah A-hi-oh kóaⁿ chhia.
8 Ta-bi̍t kah I-su-la-el jîn-bîn tī Siōng-chú ê bīn-chêng chīn-la̍t chhiùⁿ koa, ēng khîm, sek, lô, kó͘ kah kó͘-chhoe, chàu ga̍k thiàu-bú.
9 Kàu Ki-tóng ê tiūⁿ-tiâⁿ, in-ūi gû kha that tio̍h, U-chà chhun chhiú-hōaⁿ hit-ê kūi.
10 Siōng-chú tùi U-chà siū-khì, in-ūi i chhun chhiú hōaⁿ iok-kūi chiū kā i phah, i chiū tī Siōng-chú ê bīn-chêng sí tī hia.
11 Ta-bi̍t in-ūi Siōng-chú phah U-chà, chiū bô hoaⁿ-hí, hō hit-ê só͘-chāi kiò-chò Pe-le-chuh-u-chà（ chù, Hi-bú-lâi bûn ê im-tha̍k, ì-sù sī"chhú-hoa̍t U-sah"）, it-ti̍t kàu kin-á-ji̍t.
12 Hit ji̍t, Ta-bi̍t kiaⁿ Siōng-tè, chiū kóng, " Góa ná thang tòa Siōng-chú ê iok-kūi lâi-kàu góa ê só͘-chāi? "
13 Chiū ánne, Ta-bi̍t bô tòa iok-kūi lâi-kàu Ta-bi̍t ê siâⁿ, kakī ê só͘-chāi, chiū choán kàu Gat lâng O-biat-e-tóm ê ke.
14 Siōng-tè ê iok-kūi tī O-biat-e-tóm ê ke, tī i ê chhù saⁿ goe̍h-ji̍t, Siōng-chú sù-hok tī O-biat-e-tóm ê ke kah i it-chhè só͘-ū ê.
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。