Le̍k-tāi-chì Siōng-koàn/歷代志上簡介 線上收聽:中文和合本 台語聖經 客語聖經 希伯來文讀經 下載檔案 關於語音聖經
29 Ūi tio̍h Khí Sèng-tiān Lâi Hiàn ê Lé-mi̍h
Ta-bi̍t ông tùi hōe-chiòng kóng, " Góa ê kiáⁿ Só͘-lô-móng sī Siōng-chú te̍k-pia̍t kéng-soán ê, iáu koh siàu-liân iù-chíⁿ; chit-ê kang-têng chin tōa, in-ūi chit-ê tiān m̄-sī ūi tio̍h lâng, to̍h-sī ūi tio̍h Siōng-chú — Siōng-tè khí ê.
2 Góa ūi tio̍h góa ê Siōng-tè ê tiān, í-keng chīn khùi-la̍t, chún-pī kim chò kim-khì, chún-pī gîn chò gîn-khì, tâng chò tâng-khì, thih chò thih-khì, chhâ chò chhâ-khì, koh ū âng bé-ló kah thang siuⁿ ê pó-chio̍h, kng-chio̍h, chhái-sek ê chio̍h, í-ki̍p ta̍k chióng ê pó-chio̍h kah tāi-lí-chio̍h ke̍k chē.
3 In-ūi góa him-bō͘ góa ê Siōng-tè ê tiān, chiū tī chún-pī khí sèng-tiān ê châi-liāu í-gōa, koh ēng góa pún-sin só͘ chek-chū ê kim-gîn, hiàn tī góa ê Siōng-tè ê chhù,
4 to̍h-sī O͘-huil ê kim saⁿ chheng tha-lan-t, toàn-liān ê gîn chhit chheng tha-lan-t, lâi an-chng chiahê chhù ê chhiûⁿ.
5 Kim chò kim-khì, gîn chò gîn-khì kah sai-hū ê chhiú só͘ chò chiahê kang. Kin-á-ji̍t ū siáⁿ lâng hoaⁿ-hí kā pún-sin hiàn hō͘ Siōng-chú? "
6 Chiū ánne, chèng cho̍k-tiúⁿ kah I-su-la-el ta̍k chi-cho̍k ê siú-léng, iâⁿ-tiúⁿ, liân-tiúⁿ, í-ki̍p kàm-tok hiahê kā ông chò-kang ê, lóng hoaⁿ-hí lâi hiàn.
7 In ūi tio̍h Siōng-chú tiān ê lō͘-ēng, hiàn-kim gō͘ chheng tha-lan-t kah chi̍t bān ta-lik, gîn chi̍t-bān tha-lan-t, tâng chi̍t-bān peh-chheng tha-lan-t, thih cha̍p-bān tha-lan-t.
8 Kiàn-nā ū pó-chio̍h ê lóng kau-tài Kel-sióng lâng Ia-chi-el ê chhiú, sàng ji̍p-khì Siōng-chú tiān ê kim-khò͘.
9 In-ūi in kam-sim hiàn, jîn-bîn lóng hoaⁿ-hí, in-ūi in chīn-sim hiàn hō͘ Siōng-chú, Ta-bi̍t ông mā tōa hoaⁿ-hí kàu-ke̍k.
10 Ta-bi̍t O-ló Siōng-chú
Só͘-í, Ta-bi̍t tī hōe-chiòng ê bīn-chêng oló Siōng-chú, Ta-bi̍t kóng, " Siōng-chú — goán ê chó͘-sian I-su-la-el ê Siōng-tè, sī eng-kai oló ê, tùi éng-oán kàu éng-oán!
11 Siōng-chú ah, chun-tōa, lêng-le̍k, êng-kng, tek-sèng kah ui-giâm lóng sī Lí ê; só͘-ū tī thiⁿ-téng tē-hā ê lóng sī Lí ê. Siōng-chú ah, kok mā sī Lí ê, Lí sī chì-koân, chò bān-iú ê thâu.
12 Hó-gia̍h kah chun-kùi lóng sī tùi Lí lâi, Lí mā chiáng-koán bān-iú. Tī Lí ê chhiú ū tōa koân-lêng kah tōa khùi-la̍t, hō͘ lâng chun-tōa, hō͘ kûn-chiòng tōa khùi-la̍t, lóng chhut tī Lí ê chhiú.
13 Goán ê Siōng-tè ah, taⁿ goán kám-siā Lí, oló Lí êng-kng ê miâ!
14 " Góa sī siáⁿ-mi̍h, góa ê jîn-bîn sī siáⁿ-mi̍h, goán kèng-jiân ē ánne hoaⁿ-hí hōng-hiàn? In-ūi bān-mi̍h lóng sī tùi Lí lâi, goán ēng Lí ê mi̍h hiàn hō͘ Lí.
15 Goán tī Lí ê bīn-chêng sī chhut-gōa lâng, kah goán ê chó͘-sian kāng-khoán sī kià-kha ê. Goán tī sè-kan ê ji̍t-chí chhin-chhiūⁿ iáⁿ, bô thang ǹg-bāng kú-tn̂g tī-.leh.
16 Siōng-chú — goán ê Siōng-tè ah, goán chún-pī chiahê chin chē châi-liāu, beh ūi tio̍h Lí ê sèng-miâ khí Lí ê tiān, lóng sī tùi Lí lâi ê, mā lóng sī Lí ê.
17 Góa ê Siōng-tè ah, góa chai Lí kàm-chhat lâng ê sim, hoaⁿ-hí chèng-ti̍t; kóng tio̍h góa, góa ēng chèng-ti̍t ê sim hoaⁿ-hí hiàn che it-chhè ê mi̍h. Taⁿ góa khòaⁿ tio̍h Lí ê chú-bîn tī chia, lóng hoaⁿ-hí hiàn hō͘ Lí, góa chiū hoaⁿ-hí.
18 Siōng-chú — goán chó͘-sian A-bu-la-hàm, Í-sak, I-su-la-el ê Siōng-tè ah, kiû Lí hō͘ Lí ê chú-bîn tiāⁿtiāⁿ chûn chit khoán ê sim-su liām-thâu, chún-pī in ê sim lâi kui-ǹg Lí,
19 koh kiû Lí siúⁿ-sù góa ê kiáⁿ Só͘-lô-móng ū sêng-si̍t ê sim, lâi siú Lí ê bēng-lēng, hoat-tō͘ kah lu̍t-lē, chò-chiâⁿ chiahê só͘-ū ê tāichì, ēng góa só͘ chún-pī ê lâi khí tiān. "
20 Ta-bi̍t tùi chiahê hōe-chiòng kóng, " Lín tio̍h oló Siōng-chú — lín ê Siōng-tè. " Chiū ánne, hōe-chiòng oló Siōng-chú — in chó͘-sian ê Siōng-tè, àⁿ thâu pài Siōng-chú kah ông.
21 Keh tńg kang, in hiàn chè hō͘ Siōng-chú, koh hiàn sio-chè hō͘ Siōng-chú, to̍h-sī hiàn kang ê gû chi̍t chheng chiah, kang ê mî-iûⁿ chi̍t chheng chiah, iûⁿ-á chi̍t chheng chiah kah i ê koàn-tiān, koh ūi I-su-la-el ê kûn-chiòng hiàn chin chē chè-mi̍h. Hit ji̍t, in tī Siōng-chú ê bīn-chêng lim-chia̍h tōa-tōa hoaⁿ-hí.
22 In tē-jī pái siat-li̍p Ta-bi̍t ê kiáⁿ Só͘-lô-móng chò ông, ūi Siōng-chú ēng iû kā i boah, hō͘ i chò kun-ông, mā ēng iû boah Cha-tok chò chè-si.
23 Chiū ánne, Só͘-lô-móng chē tī Siōng-chú só͘ siúⁿ-sù ê ūi, sòa-chiap i ê lāu-pē Ta-bi̍t chò ông, ta̍k hāng tāichì lóng heng-thong, I-su-la-el jîn-bîn mā lóng chun-thàn i.
24 Chèng siú-léng, ióng-sū kah Ta-bi̍t ông ê chèng kiáⁿ, lóng sūn-ho̍k Só͘-lô-móng ông.
25 Siōng-chú hō͘ Só͘-lô-móng tī I-su-la-el jîn-bîn ê bīn-chêng, hui-siông chun-tōa, hō͘ i chò kok-ông ê ui-hong, iâⁿ-kòe I-su-la-el í-chêng ê ông.
26 Ta-bi̍t Thóng-tī ê Kì-chài
I-é-sái ê kiáⁿ Ta-bi̍t chò I-su-la-el jîn-bîn ê ông,
27 I chò I-su-la-el ông, keng-kòe sì-cha̍p nî, to̍h-sī tī He-bú-lông chò ông chhit nî, tī Ê-lú-sa-lèm chò ông saⁿ-cha̍p saⁿ nî.
28 I chia̍h tn̂g hòe-siū, nî-hòe, hó-gia̍h kah êng-kng lóng boán-chiok chiū kòe-sin. I ê kiáⁿ Só͘-lô-móng sòa-chiap i chò ông.
29 Ta-bi̍t ông tùi-thâu kàu-bóe ê tāichì, lóng kì tī sian-kiàn Sa-mu-el kah Ná-than sian-ti ê chheh, í-ki̍p sian-kiàn Ga̍t ê chheh.
30 Hiahê chheh mā kì-chài i tī-lí kok-chèng ê tāichì kah i ê tōa koân-lêng, í-ki̍p i kah I-su-la-el, kah sì-kho͘-ûi ê lia̍t kok, só͘ keng-kòe ê sî-sū.
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。