Í-su-thiap kì/以斯帖記簡介 線上收聽:中文和合本 台語聖經 客語聖經 福州話聖經 希伯來文讀經 下載檔案 關於語音聖經
7 Ha-mán Hông Tiàu-Sí
Ông kah Ha-mán lâi hù ông-hō͘ Ê-su-tel ê iàn-se̍k.
2 Chit-ê tē-jī ji̍t, ông tī chiú-iàn ê tiong-kan koh mn̄g Ê-su-tel kóng, " Ông-hō͘ Ê-su-tel, lí só͘ chhéng ê sī siáⁿ-mi̍h? Góa beh hō͘ lí; lí só͘ kiû sī siáⁿ-mi̍h? Chiū-sī kok ê chi̍t-pòaⁿ mā ē chò-.tit. "
3 Ông-hō͘ Ê-su-tel ìn kóng, " Ông, góa nā tī lí ê ba̍k-chiu chêng tit tio̍h un-tián, ông nā lia̍h-chò sī hó, chiū goān lí ín-chún góa só͘ chhéng, ēng góa ê sèⁿ-miā hō͘ góa, ín-chún góa ê só͘ kiû, ēng góa ê chong-cho̍k hō͘ góa.
4 In-ūi góa kah góa ê chong-cho̍k siū chhut-bē, ē siū châu-bia̍t, kā goán thâi-sí, hō͘ goán sí-bông. Siat-sú bē goán chò lô͘-po̍k, chò lú-pī, sûi-jiân tùi-te̍k bē tàng pó͘ ông ê sún-sit, góa mā ē tiām-tiām. "
5 A-ha-sui-ló͘ ông ìn ông-hō͘ Ê-su-tel kóng, " Siáⁿ lâng káⁿ chûn-sim chò chit-ê tāichì? Hitê lâng tī tó-ūi? "
6 Ê-su-tel kóng, " Tùi-te̍k to̍h-sī chit-ê pháiⁿ lâng Ha-mán. " Ha-mán tī ông kah ông-hō͘ ê bīn-chêng chiū chin kiaⁿ.
7 Ông tōa siū-khì, tùi chiú-iàn khí-.lâi, ji̍p-khì ông-kiong ê hoe-hn̂g. Ha-mán mā khí-lâi tùi ông-hō͘ Ê-su-tel kiû sèⁿ-miā, in-ūi khòaⁿ tio̍h ông koat-ì beh kā i hêng-hoa̍t.
8 Ông tùi ông-kiong ê hoe-hn̂g tò tńg-lâi chiú-iàn ê só͘-chāi, hit sî, Ha-mán í-keng phak-lo̍h tī Ê-su-tel só͘ teh tó ê chhn̂g. Ông kóng, " I koh tī kiong lāi, tī góa ê bīn-chêng, beh lêng-jio̍k ông-hō͘? " Ōe tùi ông ê chhùi kóng-chhut, lâng chiū khàm Ha-mán ê bīn.
9 Sū-hāu ông ê thài-kàm ū chi̍t-ê miâ kiò-chò Ha-bó͘-ná, i kóng, " Lí khòaⁿ, Ha-mán ūi tio̍h Mol-té-kái khiā chi̍t-ê gō͘-cha̍p tiú koân ê chhâ-kè, Mol-té-kái to̍h-sī chêng-ji̍t ēng chīn-tiong ê ōe pò-kò ông ê. Taⁿ hit-ê chhâ-kè khiā tī Ha-mán ê ke. " Ông kóng, " Kā i tiàu tī hit téng-bīn. "
10 Lâng chiū kā Ha-mán tiàu tī i kā Mol-té-kái só͘ chún-pī ê chhâ-kè téng bīn. Ông ê siū-khì chiah soah.
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。