Si-phian/詩篇簡介 線上收聽:中文和合本 台語聖經 客語聖經 福州話聖經 希伯來文讀經 下載檔案 關於語音聖經
41 Pēⁿ-lâng ê Kî-tó
（ Ta-bi̍t ê si, kau hō͘ ga̍k-koaⁿ. ）Chiàu-kò͘ sànchhiah lâng ê lâng ū hok-khì! Tng hoān-lān ê ji̍t, Siōng-chú ē kiù i.
2 Siōng-chú ē pó-siú i sèⁿ-miā, hō͘ i oa̍h-.leh tī tē-chiūⁿ hióng-hok; kiû Lí m̄ thang chiàu tùi-te̍k só͘ ài lâi kā i kau hō͘ in.
3 I tó tī pēⁿ chhn̂g, Siōng-chú ē kā i hû-chhî; i phòa-pēⁿ ê sî, Lí ē liāu-lí i ê chhn̂g-pho͘.
4 Góa bat kóng, Siōng-chú ah, kiû Lí liân-bín góa, i hó góa ê sim-sîn! In-ūi góa ū tek-chōe Lí.
5 Góa ê tùi-te̍k ēng pháiⁿ ōe húi-pòng góa, kóng, i tang-sî ē sí, i ê miâ tang-sî ē bia̍t-bông?
6 I nā lâi khòaⁿ góa chiū kóng pe̍h-chha̍t ōe; i ê sim chek-chū kan-chà, chhut-khì gōa-kháu chiū sì-kè kóng.
7 Só͘-ū oàn-hūn góa ê lâng chi-bú chi-chū teh gī-lūn góa; in kè-bô͘ beh hāi góa.
8 In kóng, i ê seng-khu tì tio̍h koài-pēⁿ; i í-keng tó tī bîn-chhn̂g, bē tàng koh peh khí-.lâi.
9 Liân góa ti-kí ê pêng-iú, góa só͘ óa-khò, chia̍h góa ê pn̄g ê, mā gia̍h-khí kha lâi that góa.
10 Siōng-chú ah, kiû Lí liân-bín góa, hō͘ góa koh ióng-kiāⁿ khí-.lâi, thang kā in pò-ho̍k!
11 In-ūi góa ê tùi-te̍k bē tàng tùi góa khoa-kháu khah iâⁿ, góa chiū chai Lí kah-ì góa.
12 Lí in-ūi góa ê sûn-choân chiū hû-chhî góa, hō͘ góa éng-oán khiā tī Lí ê bīn-chêng.
13 Tio̍h oló Siōng-chú — I-su-la-el ê Siōng-tè, tùi éng-oán kàu éng-oán. A-men! Koh A-men!
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。