Si-phian/詩篇簡介 線上收聽:中文和合本 台語聖經 客語聖經 福州話聖經 希伯來文讀經 下載檔案 關於語音聖經
51 Kî-kiû Sià-bián
（ Ta-bi̍t kah Bat-se-ba tâng-pâng í-āu, Ná-than sian-ti lâi kìⁿ i, i chò chit siú si, kau hō͘ ga̍k-koaⁿ. ）Siōng-tè ah, chiàu Lí ê chû-ài liân-bín góa! Chiàu Lí hong-sēng ê chû-pi chhat-siau góa ê kòe-sit!
2 Kā góa ê chōe-ok choân-pō͘ sé-tû, mā kā góa sé-chheng kàu bô chōe.
3 Góa chai kakī ê kòe-sit; góa ê chōe tiāⁿtiāⁿ tī góa ê bīn-chêng.
4 Góa só͘ hoān-.tio̍h ê chōe to̍h-sī tek-chōe Lí niā-niā, tī Lí ê ba̍k-chiu chêng chò chit khoán pháiⁿ tāichì; tì-sú Lí kóng-ōe ê sî hián-bêng chò gī, phòaⁿ-toàn ê sî hián-bêng kong-tō.
5 Góa sī tī chōe-ok tiong seⁿ ê, tī chōe ê tiong-kan, góa ê lāu-bú hoâi-īn góa.
6 Lí só͘ ì-ài ê sī sim-lāi sêng-si̍t; tī góa ê pak-tó͘ lāi, Lí ē hō͘ góa tit tio̍h tì-hūi.
7 Kiû Lí ēng gû-chhek-chháu sé góa, góa chiū chheng-khì; kiû Lí sé góa, góa chiū pí seh khah pe̍h .
8 Kiû Lí hō͘ góa thiaⁿ tio̍h hoaⁿ-hí khoài-lo̍k ê siaⁿ, hō͘ Lí só͘ at-tn̄g ê kut thang hoaⁿ-hí.
9 Kiû Lí am Lí ê bīn bô khòaⁿ góa ê chōe; chhat-siau góa só͘-ū ê chōe-ok.
10 Siōng-tè ah, kiû Lí kā góa chhòng-chō chheng-khì ê sim, hō͘ góa ê lāi-bīn ū ōaⁿ sin chèng-ti̍t ê sim-sîn.
11 M̄-thang kóaⁿ góa lī-khui Lí ê bīn-chêng; m̄ thang tùi góa siu-hôe Lí ê Sèng Sîn.
12 Kiû Lí hō͘ góa iû-goân hióng-siū Lí kiù-un ê khoài-lo̍k; siúⁿ-sù góa ū chū-iû ê sim-sîn lâi hû-chhî góa.
13 Góa beh kā Lí ê tō-lō͘ chí-sī ū kòe-sit ê lâng, ū chōe ê lâng chiū ē lâi kui-sūn Lí.
14 Kiù góa ê Siōng-tè ah, kiû Lí kiù góa thoat-lī thâi lâng ê chōe; góa ê chi̍h beh tōa-siaⁿ gîm-si oló Lí ê gī.
15 Chú ah, kiû Lí khui góa ê chhùi-tûn, góa beh soan-iông Lí ê hó miâ-siaⁿ.
16 Lí bô ài chè-mi̍h, nā ài, góa chiū beh hiàn; sio-chè Lí mā bô hoaⁿ-hí.
17 Siōng-tè ah, Lí só͘ ì-ài ê chè to̍h-sī iu-siong ê sim; iu-siong thòng-hóe ê sim, Lí bē khòaⁿ-khin.
18 Kiû Lí chiàu Lí ê hó ì-sù lâi hó khoán-thāi Si-óng, khí-chō Ê-lú-sa-lèm ê siâⁿ chhiûⁿ.
19 Hit sî, Lí ē hoaⁿ-hí gī ê chè kah sio-chè, í-ki̍p kui-chiah chengseⁿ ê sio-chè; hit sî, lâng ē kā kang ê gû hiàn tī Lí ê chè-tôaⁿ.
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。