Si-phian/詩篇簡介 線上收聽:中文和合本 台語聖經 客語聖經 福州話聖經 希伯來文讀經 下載檔案 關於語音聖經
58 Kiû Siōng-chú Têng-hoa̍t Pháiⁿ lâng
（ Ta-bi̍t kim ê si, kau hō͘ ga̍k-koaⁿ; tiāu sī ēng " M̄-thang húi-hoāi. "）Sè-kan lâng, lín tiām-tiām, kám ū chin-chiàⁿ kóng kong-gī? Lín kám ū chiàu sêng-si̍t lâi sím-phòaⁿ?
2 Bô, lín chí-sī sim-lāi kè-bô͘ chò pháiⁿ; lín tī tē-chiūⁿ, ēng lín ê chhiú só͘ chò ê kiông-pō chhìn hō͘ lâng.
3 Pháiⁿ lâng chi̍t-ē chhut bó-sin, chiū kah Siōng-tè so͘-oán; chi̍t ē lī-khui lāu-bú ê pak-tó͘ chiū kiâⁿ oai-lō͘, kóng pe̍h-chha̍t.
4 In ê to̍k chhin-chhiūⁿ chôa ê to̍k; in chhin-chhiūⁿ chhàu-hīⁿ-lâng ê to̍k-chôa that-ba̍t kakī ê hīⁿ-khang,
5 M̄-thiaⁿ lāng chôa ê lâng ê siaⁿ, á-.sī gâu ōe hû liām chiù ê lâng ê siaⁿ.
6 Siōng-tè ah, kiû Lí phah-tn̄g in ê chhùi-khí! Siōng-chú ah, kiû Lí phah-tn̄g sai-á-thûn ê tōa ki gê!
7 Goān in chhin-chhiūⁿ chhoah lâu ê chúi siau-sit-khì; in ê chìⁿ teh beh siā ê sî, goān in ê chìⁿ-thâu tn̄g khì.
8 Goān in chhin-chhiūⁿ lō͘-lê sô kòe ê jiah liâmpiⁿ siau-sit-.khì, koh chhin-chhiūⁿ chabó͘ lâng ka-la̍uh bô kìⁿ tio̍h thiⁿ-ji̍t ê thai.
9 Lín ēng chhì-á hiâⁿ hóe, tiáⁿ iáu-bōe jia̍t, I beh ēng kńg-lê-á hong kā seⁿ ê kah teh to̍h ê chhì-á chò chi̍t-ē sàu-khì.
10 Gī lâng khòaⁿ tio̍h pò-èng ê tāichì chiū hoaⁿ-hí, i beh ēng pháiⁿ lâng ê hoeh sé i ê kha.
11 Lâng chiū ē kóng, gī lâng chin-chiàⁿ ū hó pò; tī tē-bīn chiūⁿ kó-jiân ū Siōng-tè teh sím-phòaⁿ.
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。