Si-phian/詩篇簡介 線上收聽:中文和合本 台語聖經 客語聖經 福州話聖經 希伯來文讀經 下載檔案 關於語音聖經
119 Siōng-chú ê Lu̍t-hoat
Hêng-ûi oân-choân koh chun-thàn Siōng-chú lu̍t-hoat ê lâng, chit khoán lâng chin ū hok-khì!
2 Chun-siú I kiàn-chèng ê ōe, choan-sim cháu-chhōe I ê lâng, chit khoán lâng chin ū hok-khì!
3 In bô chò put-gī ê tāichì, in chun-thàn I ê tō-lō͘.
4 Lí bat kā Lí kà-sī ê ōe hoan-hù goán, ài goán in-khîn chun-siú.
5 Goān góa ê hong-hiòng tiāⁿ tio̍h, lâi chun-siú Lí ê lu̍t-lē.
6 Góa chun-tiōng Lí só͘-ū ê kài-bēng, chiū bē tì-kàu kiàn-siàu.
7 Góa ha̍k-si̍p Lí kong-gī ê phòaⁿ-toàn, góa beh ēng chèng-ti̍t ê sim kám-siā Lí.
8 Góa beh chun-siú Lí ê lu̍t-lē; kiû Lí m̄ thang kā góa choân-pō͘ pàng-sak!
9 Sūn-ho̍k Siōng-chú ê Lu̍t-hoat
Siàu-liân lâng tio̍h ēng siáⁿ-mi̍h lâi chheng-khì i ê só͘ chò? Sī tio̍h chiàu Lí ê ōe lâi sè-jī kiâⁿ.
10 Góa choan-sim cháu-chhōe Lí; kiû Lí hō͘ góa m̄ thang phian-lī Lí ê kài-bēng.
11 Góa kā Lí ê giân-gí khǹg tī sim-lāi, bián-tit góa tek-chōe Lí.
12 Siōng-chú ah, Lí eng-kai siū oló! Kiû Lí kā Lí ê lu̍t-lē kà-sī góa!
13 Lí só͘ kóng it-chhè ê lu̍t-lē, góa ēng chhùi-tûn lâi soan-iông.
14 Góa ì-ài Lí kà-sī ê tō-lō͘, chhin-chhiūⁿ lâng ì-ài it-chhè ê châi-bu̍t.
15 Góa beh tiām-tiām su-sióng Lí kà-sī ê ōe, mā beh chù-tiōng Lí ê tō-lō͘.
16 Góa beh tī Lí ê lu̍t-lē tiong kakī khoài-lo̍k; góa bô bē kì-tit Lí ê ōe.
17 Chun-siú Siōng-chú lu̍t-hoat ê khoài-lo̍k
Kiû Lí si tōa-un hō͘ Lí ê lô͘-po̍k, hō͘ góa ē-tàng oa̍h-.leh lâi chun-thàn Lí ê ōe.
18 Kiû Lí khui góa ê ba̍k-chiu, Hō͘ góa khòaⁿ-chhut Lí lu̍t-hoat tiong ê kî-biāu.
19 Góa tī tē-chiūⁿ sī chò kià-kha ê chhut-gōa lâng, kiû Lí m̄ thang tùi góa khàm ba̍t Lí ê kài-bēng!
20 Góa sî-siông pek-chhiat him-bō͘ Lí ê kui-lē, tì-sú góa ê sim kiông-beh piak-li̍h.
21 Lí chek-pī kiau-ngō͘ siū chiù-chó͘ ê lâng, to̍h-sī bê-lō͘ lī-khui Lí ê kài-bēng ê lâng.
22 Kiû Lí kā góa tû-khì lâng tùi góa ê lêng-jio̍k kah khòaⁿ-khin, in-ūi góa ū chun-siú Lí ê kà-sī.
23 Kùi-cho̍k chē-.leh lāmsám gī-lūn góa, m̄ koh, Lí ê lô͘-po̍k tiām-tiām su-sióng Lí ê lu̍t-lē.
24 Lí ê kà-sī sī góa só͘ hoaⁿ-hí ê, sī góa ê bô͘-sū.
25 Koat-ì chun-siú Siōng-chú ê Lu̍t-hoat
Góa ê sèⁿ-miā kha̍h-tiâu tī thô͘-soa hún; kiû Lí chiàu Lí ê èng-ín lâi kā góa chín-kiù!
26 Góa kóng-khí góa só͘ kiâⁿ ê lō͘, Lí ū ìn-tap góa; kiû Lí kā Lí ê lu̍t-lē kà-sī góa!
27 Kiû Lí hō͘ góa bêng-pe̍k Lí kà-sī ê lō͘, góa thang tiām-tiām su-sióng Lí ê kî-sū.
28 Góa ê sim-sîn in-ūi iu-khó͘ lâi siau-iûⁿ; kiû Lí chiàu Lí ê èng-ín hō͘ góa ióng-kiāⁿ.
29 Kiû Lí hō͘ góa lī-khui kan-chà ê lō͘, kā Lí ê lu̍t-hoat un-sù hō͘ góa!
30 Góa ū kéng sìn-si̍t ê lō͘, kā Lí ê lu̍t-lē hē tī góa ê bīn-chêng.
31 Góa loân-bō͘ Lí ê kà-sī; Siōng-chú ah, kiû Lí m̄ thang hō͘ góa kiàn-siàu.
32 Lí khui-khoah góa ê sim ê sî, góa chiū ē kiâⁿ Lí kài-bēng ê lō͘.
33 Kiû Chú sù Tì-hūi
Siōng-chú ah, kiû Lí kā Lí lu̍t-lē ê lō͘ chí-sī góa, góa beh thiat-té chun-siú!
34 Kiû Lí hō͘ góa tì-hūi, góa chiū ē chun-siú Lí ê lu̍t-hoat, mā beh choan-sim lâi chip-siú.
35 Kiû Lí hō͘ góa kiâⁿ Lí kài-bēng ê lō͘, in-ūi chit-ê lō͘ sī góa só͘ ì-ài ê.
36 Kiû Lí hō͘ góa ê sim kui-ǹg Lí ê kà-sī, bô àm put-gī ê chîⁿ-châi.
37 Kiû Lí hō͘ góa ê ba̍k-chiu oa̍t-cháu bô khòaⁿ hi-ké, koh hō͘ góa ē-tàng kiâⁿ Lí ê lō͘ lâi seng-oa̍h.
38 Lí ê lô͘-po̍k kèng-ùi Lí, kiû Lí ūi i kian-siú Lí ê èng-ín!
39 Kiû Lí hō͘ góa só͘ kiaⁿ ê lêng-jio̍k lī-khui góa, in-ūi Lí ê lu̍t-lē sī hó.
40 Góa him-bō͘ Lí kà-sī ê ōe; kiû Lí tī Lí ê kong-gī hō͘ góa lâi oa̍h!
41 Sìn-khò Siōng-chú ê Lu̍t-hoat
Siōng-chú ah, goān Lí chiàu Lí ê èng-ín, hō͘ Lí ê chû-ài, to̍h-sī Lí ê kiù-un lîm-kàu góa,
42 Góa chiū thang ìn-tap hiahê lêng-jio̍k góa ê lâng, in-ūi góa óa-khò Lí ê ōe.
43 Kiû Lí hō͘ chin-lí ê ōe bô choân-pō͘ lī-khui góa ê chhùi, in-ūi góa gióng-bōng Lí ê phòaⁿ-toàn.
44 Góa beh tiāⁿtiāⁿ chun-siú Lí ê lu̍t-hoat, ti̍t-kàu éng-oán.
45 Góa beh kiâⁿ tī khui-khoah ê só͘-chāi, in-ūi góa ū káng-kiù Lí kà-sī ê ōe.
46 Góa beh tī kun-ông ê bīn-chêng káng-lūn Lí ê kà-sī, mā bē kám-kak kiàn-siàu.
47 Góa beh tī Lí ê kài-bēng tiong kakī khoài-lo̍k, chiahê kài-bēng sī góa pêng-sî só͘ ì-ài ê.
48 Góa ì-ài Lí ê kài-bēng, góa beh tùi i gia̍h-khí góa ê chhiú; góa mā beh tiām-tiām su-sióng Lí ê lu̍t-lē.
49 Khak-sìn Siōng-chú ê Lu̍t-hoat
Kiû Lí ē kì-tit tùi Lí ê lô͘-po̍k só͘ èng-ín ê ōe, in-ūi Lí bat hō͘ góa ū ǹg-bāng.
50 Lí ê èng-ín hō͘ góa tit tio̍h oa̍h-miā; góa tī hoān-lān tiong tùi che tit tio̍h an-ùi.
51 Kiau-ngō͘ ê lâng it-ti̍t kā góa bú-jio̍k thí-chhiò, chóng-.sī, góa m̄ bat phian-lī Lí ê lu̍t-hoat.
52 Siōng-chú ah, góa kì-liām Lí chū chá í-lâi ê lu̍t-lē, góa chiū tit tio̍h an-ùi.
53 Góa in-ūi hiahê khì-sak Lí ê lu̍t-hoat ê pháiⁿ lâng tōa siū-khì, chhin-chhiūⁿ hóe teh to̍h.
54 Góa tī kià-kha ê só͘-chāi, pêng-sî lóng ēng Lí ê lu̍t-lē chò si-koa.
55 Siōng-chú ah, góa àm-sî kì-liām Lí ê miâ, chun-siú Lí ê lu̍t-hoat.
56 Góa tit tio̍h chit-ê hok-hūn, sī in-ūi góa ū siú Lí ê kà-sī.
57 Ì-ài Siōng-chú ê Lu̍t-hoat
Siōng-chú sī góa ê ki-gia̍p; góa bat kóng, góa beh chun-siú Lí ê kà-sī.
58 Góa bat choan-sim kiû Lí ê un; goān Lí chiàu Lí ê èng-ín liân-bín góa!
59 Góa chhim-chhim su-sióng góa só͘ kiâⁿ ê lō͘, chiū oa̍t tńg-sin kui-ǹg Lí ê lu̍t-lē.
60 Góa chun-siú Lí ê kài-bēng, kóaⁿ-kín bô iân-chhiân.
61 Pháiⁿ lâng ê soh-á kā góa khún-pa̍k, chóng-.sī, góa bô bē kì-tit Lí ê lu̍t-hoat.
62 Góa in-ūi Lí kong-gī ê phòaⁿ-toàn, pòaⁿ-mê khí-lâi kám-siā Lí.
63 Kiàn-nā kèng-ùi Lí koh chun-siú Lí ê kà-sī ê lâng, góa kah in chò pêng-iú.
64 Siōng-chú ah, Lí ê chû-ài phiàn-móa tē-bīn; kiû Lí kā Lí ê lu̍t-lē kà-sī góa!
65 Siōng-chú pó-kùi ê Lu̍t-hoat
Siōng-chú ah, Lí bat hó khoán-thāi Lí ê lô͘-po̍k, sī chiàu Lí ê èng-ín.
66 Kiû Lí kā hó ê tì-hūi kah tì-sek kà-sī góa, in-ūi góa sìn-khò Lí ê kài-bēng.
67 Góa bōe siū khó͘ í-chêng ū kiâⁿ bê-lō͘, chóng-.sī, góa taⁿ chun-siú Lí ê lu̍t-lē.
68 Lí sī hó, Lí ê só͘ chò mā sī hó; kiû Lí kā Lí ê lu̍t-lē kà-sī góa!
69 Kiau-ngō͘ ê lâng chō-chok sǹg bē liáu ê pe̍h-chha̍t ōe lâi kong-kek góa, chóng-.sī, góa beh choan-sim chun-siú Lí ê kà-sī.
70 In ê sim tūn chhin-chhiūⁿ hō͘ iû pau-ba̍t, chóng-.sī, góa ì-ài Lí ê lu̍t-hoat.
71 Góa ê siū khó͘ tùi góa lâi kóng sī ū lī-ek, in-ūi hō͘ góa ē-tàng ha̍k-si̍p Lí ê lu̍t-lē.
72 Lí só͘ kóng ê lu̍t-hoat tùi góa ū lī-ek, iâⁿ-kòe chheng-bān ê kim-gîn.
73 Siōng-chú lu̍t-hoat ê kong-chèng
Lí ê chhiú chhòng-chō góa, sêng-choân góa; kiû Lí hō͘ góa tì-hūi thang lâi ha̍k-si̍p Lí ê kài-bēng!
74 Kèng-ùi Lí ê lâng khòaⁿ tio̍h góa chiū ē hoaⁿ-hí, in-ūi góa ū gióng-bōng Lí ê kà-sī.
75 Siōng-chú ah, góa chai Lí ê phòaⁿ-toàn sī kong-gī; Lí hō͘ góa siū khó͘ sī chiàu Lí ê sìn-si̍t.
76 Kiû Lí ēng Lí ê chû-ài an-ùi góa, sī chiàu Lí tùi Lí ê lô͘-po̍k ê èng-ín.
77 Goān Lí ê chû-pi lîm-kàu góa, hō͘ góa ū oa̍h-miā, in-ūi Lí ê lu̍t-hoat sī góa só͘ ì-ài.
78 Goān kiau-ngō͘ ê lâng tú tio̍h kiàn-siàu, in-ūi in bô lí-iû óng-khut góa; chóng-.sī, góa beh tiām-tiām su-sióng Lí ê kà-sī.
79 Goān kèng-ùi Lí ê lâng kui-ǹg góa, in chiū ē chai Lí ê kà-sī.
80 Goān góa ê sim oân-choân chun-siú Lí ê lu̍t-lē, hō͘ góa bē tì-kàu kiàn-siàu.
81 Kiû Chú kiù-chō͘
Góa ê sim-sîn him-bō͘ Lí ê kiù-un kàu hūn-.khì, chóng-.sī, Lí ê ōe hō͘ góa ū ǹg-bāng.
82 Góa in-ūi gióng-bōng Lí ê ōe tì-kàu ba̍k-chiu hoe, góa kóng, Lí tang-sî beh an-ùi góa?
83 In-ūi góa chhin-chhiūⁿ tī hóe-ian tiong ê phôe-tē, chóng-.sī, góa bô bē kì-tit Lí ê lu̍t-lē.
84 Lí ê lô͘-po̍k ê ji̍t-chí ū gōa chē? Lí tang-sî chiah beh sím-phòaⁿ pek-hāi góa ê lâng?
85 Kiau-ngō͘ bô chun-thàn Lí lu̍t-hoat ê lâng, ku̍t hām-kheⁿ beh hāi góa.
86 Lí ê kài-bēng choân-pō͘ lóng sìn-si̍t; in bô-iân bô-kò͘ pek-hāi góa, kiû Lí pang-chān góa.
87 In hiám-hiám-á kā góa tùi sè-kan tû-bia̍t, chóng-.sī, góa bô pàng-sak Lí ê kà-sī.
88 Kiû Lí chiàu Lí ê chû-ài hō͘ góa oa̍h lo̍h-.khì, góa beh chun-siú Lí ê chhùi kóng-chhut ê kà-sī.
89 Siong-sìn Siōng-chú ê lu̍t-hoat
Siōng-chú ah, Lí ê ōe khak-li̍p tī thiⁿ-.ni̍h, ti̍t-kàu éng-oán.
90 Lí ê sìn-si̍t chûn kàu bān tāi; Lí kiàn-li̍p tē, tē chiū kú-tn̂g chûn-chāi.
91 Thiⁿ-tē chiàu Lí ê tēng-lē kàu taⁿ iáu chûn-chāi, in-ūi bān-mi̍h lóng sī Lí ê chhe-ēng.
92 Góa nā m̄-sī ì-ài Lí ê lu̍t-hoat, chá to̍h tī góa ê khó͘-lān tiong bia̍t-bông à!
93 Góa éng-oán bô bē kì-tit Lí ê kà-sī, in-ūi Lí ēng che hō͘ góa oa̍h lo̍h-.khì.
94 Góa sī Lí ê, kiû Lí kiù góa, in-ūi góa ū teh cháu-chhōe Lí ê kà-sī.
95 Pháiⁿ lâng teh tng-tán góa, beh kā góa tû-bia̍t, chóng-.sī, góa beh káng-kiù Lí ê kà-sī.
96 Góa khòaⁿ só͘-ū oân-choân ê lóng sī iú-hān, chí ū Lí ê kài-bēng hui-siông khui-khoah.
97 Ài-bō͘ Siōng-chú ê Lu̍t-hoat
Góa ì-ài Lí ê lu̍t-hoat kàu án-chóaⁿ! Góa kui ji̍t tiām-tiām teh su-sióng.
98 Lí ê kài-bēng tiāⁿtiāⁿ kah góa tông-chāi, hō͘ góa pí góa ê tùi-te̍k khah ū tì-hūi.
99 Góa pí só͘-ū ê lāu-su khah thong-ta̍t, in-ūi góa tiām-tiām teh su-sióng Lí ê lu̍t-lē.
100 Góa pí lāu lâng khah bêng-pe̍k, in-ūi góa ū teh chun-siú Lí ê kà-sī.
101 Góa kìm góa ê kha, bô kiâⁿ it-chhè ê pháiⁿ lō͘, hō͘ góa thang chun-siú Lí ê kà-sī.
102 Góa bô phian-lī Lí ê phòaⁿ-toàn, in-ūi Lí ū kà-sī góa.
103 Lí ê ōe tī góa ê chhùi lāi ū gōa tiⁿ, tī góa ê chhùi lāi pí bi̍t khah tiⁿ!
104 Góa tùi Lí ê kà-sī tit tio̍h bêng-pe̍k, só͘-í, góa oàn-hūn só͘-ū ê siâ-lō͘.
105 Siōng-chú lu̍t-hoat ê Kng
Lí ê ōe chò góa kha-chêng ê teng, chò góa lō͘-chiūⁿ ê kng.
106 Lí kong-gī ê phòaⁿ-toàn, góa bat chiùchōa beh chun-siú, góa it-tēng beh ánne kiâⁿ.
107 Góa siū khó͘ kàu-ke̍k; Siōng-chú ah, kiû Lí chiàu Lí ê èng-ín hō͘ góa oa̍h lo̍h-.khì!
108 Siōng-chú ah, kiû Lí kàm-la̍p góa ê chhùi só͘ hoaⁿ-hí hiàn ê oló, koh kā Lí ê lu̍t-lē kà-sī góa.
109 Góa ê sèⁿ-miā tiāⁿtiāⁿ tú tio̍h gûi-hiám, góa iáu koh bô bē kì-tit Lí ê lu̍t-hoat.
110 Pháiⁿ lâng siat lô-bāng beh hāi góa, chóng-.sī, góa bô phian-lī Lí ê kà-sī.
111 Góa ēng Lí ê kà-sī chò éng-oán ê ki-gia̍p, in-ūi che sī góa sim só͘ ì-ài ê.
112 Góa choan-sim kui-ǹg Lí ê lu̍t-lē, éng-oán chun-thàn, ti̍t-kàu lâng seⁿ ê lō͘-bóe.
113 Siōng-chú lu̍t-hoat ê an-choân
Nn̄g-iūⁿ sim ê lâng sī góa só͘ thòng-hūn; chí ū Lí ê lu̍t-hoat sī góa só͘ ì-ài.
114 Lí sī góa siám-bih ê só͘-chāi, koh sī góa ê tîn-pâi; góa gióng-bōng Lí ê èng-ín.
115 Chò pháiⁿ ê lâng, lín tio̍h lī-khui góa! Hō͘ góa thang chun-siú góa ê Siōng-chú ê kài-bēng.
116 Kiû Lí chiàu Lí ê èng-ín hû-chhî góa, hō͘ góa oa̍h lo̍h-.khì, mā bô hō͘ góa in-ūi só͘ gióng-bōng ê lâi kiàn-siàu.
117 Kiû Lí hû-chhî góa, góa chiū tit-kiù, góa beh tiāⁿtiāⁿ chun-tiōng Lí ê lu̍t-lē.
118 Kiàn-nā kiâⁿ chhe-lō͘ lī-khui Lí ê lu̍t-lē ê lâng, Lí khòaⁿ-khin in; in-ūi in ê kúi-chà sī hi-ké.
119 Sè-kan ê pháiⁿ lâng, Lí lóng chhin-chhiūⁿ pùn-sò kā in tû-.khì; in-ūi ánne, góa ì-ài Lí ê kà-sī.
120 Góa in-ūi kiaⁿ-ùi Lí, kui seng-khu phi̍h-phi̍h chhoah; Lí ê sím-phòaⁿ mā hō͘ góa kiaⁿ-hiâⁿ.
121 Chun-siú Siōng-chú ê Lu̍t-hoat
Góa péng-kong kiâⁿ-gī, kiû Lí m̄ thang kā góa pàng hō͘ ap-chè góa ê lâng!
122 Kiû Lí pó-chèng Lí ê lô͘-po̍k thang tit tio̍h hó kéng-gū, m̄ thang hō͘ kiau-ngō͘ ê lâng kā góa ap-chè!
123 Góa in-ūi gióng-bōng Lí ê kiù-un kah Lí kong-gī ê èng-ín, tì-kàu ba̍k-chiu hoe.
124 Kiû Lí chiàu Lí ê chû-ài khoán-thāi Lí ê lô͘-po̍k, kā Lí ê lu̍t-lē kà-sī góa.
125 Góa sī Lí ê lô͘-po̍k, kiû Lí sù hō͘ góa tì-hūi, hō͘ góa ē bat Lí ê kà-sī.
126 Chit-má sī Siōng-chú teh chò tāichì ê sî, in-ūi ū lâng beh hùi-tû Lí ê lu̍t-hoat.
127 Só͘-í, góa ì-ài Lí ê kài-bēng iâⁿ-kòe kim, mā iâⁿ-kòe sûn-kim.
128 Só͘-í, Lí só͘-ū ê kà-sī góa lóng lia̍h-chò sī chèng-ti̍t; jî-chhiáⁿ góa oàn-hūn it-chhè ê siâ-lō͘.
129 Khat-bōng chun-siú Siōng-chú ê Lu̍t-hoat
Lí ê kà-sī chin kî-biāu, só͘-í, góa ê sim kín-sīn teh chip-siú.
130 Lí ê ōe chi̍t-ē khui-thiah chiū hoat-chhut kng, hō͘ gōng lâng thong-ta̍t.
131 Góa khui chhùi ti̍t-ti̍t chhoán, in-ūi góa pek-chhiat him-bō͘ Lí ê kài-bēng.
132 Kiû Lí oa̍t tńg-lâi khòaⁿ góa, liân-bín góa, chhin-chhiūⁿ Lí pêng-siông teh khoán-thāi hiahê kèng-ùi Lí ê miâ ê lâng.
133 Kiû Lí ēng Lí ê kà-sī hō͘ góa ê kha-pō͘ ún-tàng, bô iông-ín siáⁿ-mi̍h chōe-ok lâi koán-hat góa.
134 Kiû Lí kiù-sio̍k góa thoat-lī lâng ê ap-chè, góa chiū ē-tàng chun-siú Lí ê kà-sī.
135 Goān Lí hō͘ Lí bīn ê kng chiò Lí ê lô͘-po̍k, koh kā Lí ê lu̍t-lē kà-sī góa.
136 Góa ê ba̍k-sái chhin-chhiūⁿ khe chúi teh lâu, in-ūi lâng bô chun-siú Lí ê lu̍t-hoat.
137 Siōng-chú lu̍t-hoat ê kong-chèng
Siōng-chú, Lí sī kong-gī; Lí ê phòaⁿ-toàn mā sī kong-chèng.
138 Lí só͘ bēng-lēng ê kà-sī sī chiàu kong-gī, hui-siông sìn-si̍t.
139 Góa ê sim tio̍h-kip chhin-chhiūⁿ hóe teh kā góa sio sí, in-ūi góa ê tùi-te̍k bē kì-tit Lí ê ōe.
140 Lí ê ōe toàn-liān kàu chin cheng, só͘-í, Lí ê lô͘-po̍k chin ì-ài.
141 Góa pi-bî soah hō͘ lâng khòaⁿ-khin, chóng-.sī, góa bô bē kì-tit Lí ê kà-sī.
142 Lí ê kong-gī ti̍t-kàu éng-oán; Lí ê lu̍t-hoat chin-si̍t.
143 Góa tú tio̍h hoān-lān iu-khó͘, chóng-.sī, Lí ê kài-bēng sī góa só͘ ì-ài.
144 Lí ê kà-sī éng-oán sī kong-gī; kiû Lí sù hō͘ góa tì-hūi, góa chiū ē-tàng oa̍h lo̍h-.khì.
145 Kiû Chú kái-kiù
Siōng-chú ah, góa choan-sim kiû-kiò Lí, kiû Lí ìn-tap góa; góa beh kín-sīn chun-siú Lí ê lu̍t-lē.
146 Góa tùi Lí kiû-kiò, kiû Lí kiù góa! Góa beh chun-siú Lí ê kà-sī.
147 Góa thàn thiⁿ iáu-bōe kng kiû-kiò Lí; góa gióng-bōng Lí ê ōe.
148 Àm-sî keⁿ iáu-bōe chhim, góa ê ba̍k-chiu í-keng nih-khui, in-ūi góa beh tiām-tiām su-sióng Lí ê ōe.
149 Kiû Lí chiàu Lí ê chû-ài thiaⁿ góa ê siaⁿ; Siōng-chú ah, kiû Lí ēng Lí ê phòaⁿ-toàn lâi hō͘ góa ē oa̍h lo̍h-.khì!
150 Koàn-liān kiâⁿ pháiⁿ ê lâng pek óa-.lâi; in lī-khui Lí ê lu̍t-hoat hn̄g-hn̄g.
151 Siōng-chú ah, Lí kah góa tông-chāi; Lí ê kài-bēng lóng sī chin-si̍t!
152 Góa chá to̍h káng-kiù Lí ê kà-sī, Lí khak-li̍p hiahê kà-sī kàu éng-oán.
153 Kiû Chú Pang-chō͘
Kiû Lí khòaⁿ-kò͘ góa ê khó͘-lān lâi khan kiù góa, in-ūi góa bô bē kì-tit Lí ê lu̍t-hoat.
154 Kiû Lí thè góa sin-oan, kiù-sio̍k góa, chiàu Lí ê èng-ín hō͘ góa oa̍h lo̍h-.khì.
155 Kiù-un lī-khui pháiⁿ lâng hn̄g-hn̄g, in-ūi in bô cháu-chhōe Lí ê lu̍t-lē.
156 Siōng-chú ah, Lí ū tōa chû-pi; kiû Lí chiàu Lí ê phòaⁿ-toàn hō͘ góa oa̍h lo̍h-.khì.
157 Pek-hāi góa ê, tí-te̍k góa ê lâng chin chē, chóng-.sī, góa bô phian-lī Lí ê kà-sī.
158 Góa khòaⁿ tio̍h kan-ok ê lâng chiū chin thó-ià, in-ūi in bô chun-siú Lí ê kà-sī.
159 Lí khòaⁿ góa án-chóaⁿ ì-ài Lí ê kà-sī! Siōng-chú ah, kiû Lí chiàu Lí ê chû-ài hō͘ góa oa̍h lo̍h-.khì!
160 Lí ê ōe ê chóng-kin-thâu sī chin-si̍t; Lí it-chhè kong-gī ê phòaⁿ-toàn sī éng-oán chûn-chāi.
161 Ì-ài Siōng-chú ê Lu̍t-hoat
Kùi-cho̍k bô-iân bô-kò͘ pek-hāi góa, chóng-.sī, góa ê sim kiaⁿ-ùi Lí ê kà-sī.
162 Góa ì-ài Lí ê ōe, chhin-chhiūⁿ lâng tit tio̍h chin chē thâi-iâⁿ ê mi̍h.
163 Pe̍h-chha̍t-ōe sī góa só͘ thòng-hūn, só͘ thó-ià ê; Lí ê lu̍t-hoat sī góa só͘ ì-ài ê.
164 Góa in-ūi Lí kong-gī ê phòaⁿ-toàn, ta̍k ji̍t chhit pái oló Lí.
165 Thiàⁿ-sioh Lí ê lu̍t-hoat ê lâng ū tōa pêng-an, bô chi̍t hāng ē tîⁿ-pòaⁿ in ê kha.
166 Siōng-chú ah, góa ū teh gióng-bōng Lí ê kiù-un, ū chun-hêng Lí ê kài-bēng.
167 Góa ê sim ū chun-siú Lí ê kà-sī; chiahê ōe, góa hui-siông ì-ài.
168 Góa ū chun-siú Lí ê kà-sī kah Lí ê lu̍t-lē, in-ūi góa it-chhè ê só͘ kiâⁿ lóng tī Lí ê bīn-chêng.
169 Kiû Chō͘ ê Kî-tó
Siōng-chú ah, goān góa kiû-kiò ê siaⁿ thàu kàu Lí ê bīn-chêng, kiû Lí chiàu Lí ê èng-ín siúⁿ-sù góa tì-hūi.
170 Goān góa khún-kiû ê ōe ta̍t-kàu Lí ê bīn-chêng, kiû Lí chiàu Lí ê èng-ín khan kiù góa.
171 Goān góa ê chhùi-tûn hoat-chhut oló ê ōe, in-ūi Lí ū kā Lí ê lu̍t-lē kà-sī góa.
172 Goān góa ê chi̍h chhiùⁿ koa oló Lí ê èng-ín, in-ūi Lí só͘-ū ê kài-bēng lóng sī kong-gī.
173 Goān Lí chhun chhiú pang-chān góa, in-ūi góa ū soán-te̍k Lí ê kà-sī.
174 Siōng-chú ah, góa pek-chhiat him-bō͘ Lí ê kiù-un! Lí ê lu̍t-hoat mā sī góa só͘ ì-ài.
175 Goān góa oa̍h-.leh thang hō͘ góa ê sim-sîn oló Lí! Goān Lí ê phòaⁿ-toàn pang-chān góa!
176 Góa bê-lō͘ chhin-chhiūⁿ phah-m̄-kiàn ê iûⁿ, kiû Lí kā Lí ê lô͘-po̍k chhōe tò tńg-.lâi, in-ūi góa bô bē kì-tit Lí ê kài-bēng.
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。