Í-sài-a su/以賽亞書簡介 線上收聽:中文和合本 台語聖經 客語聖經 福州話聖經 希伯來文讀經 下載檔案 關於語音聖經
16 Mô͘-ap ê Choa̍t-bāng
Lín tio̍h kā iûⁿ-á hiàn hō͘ tē-hng ê chiáng-koân-chiá, tùi Se-la̍h keng-kòe khòng-iá, sàng kàu Si-óng siâⁿ ê soaⁿ.
2 Tòa tī Mô͘-ap ê jîn-bîn tī Al-nông ê tō͘-thâu, chhin-chhiūⁿ sì-kè poe ê chiáu-á, chhin-chhiūⁿ hông thiah-phòa siū ê chiáu-á.
3 Lí tio̍h siat kè-bô͘, kiâⁿ kong-pêⁿ, hō͘ lí ê iáⁿ tī tiong-tàu ê sî chhin-chhiūⁿ o͘-àm mê, siū kóaⁿ-tio̍k ê lâng thang hō͘ i bih, tô-cháu ê jîn-bîn m̄ thang kā i lō͘-chhut.
4 Lí tio̍h iông-ín góa chiahê siū kóaⁿ-tio̍k ê lâng kah lí chò-hóe tòa. Kóng tio̍h Mô͘-ap, lí tio̍h chò i siám-bih ê só͘-chāi, thoat-lī chân-sat-.ê ê bīn-chêng. In-ūi le̍k-sek lâng ê ē kui tī bô, húi-bia̍t ê tāichì ē soah-.khì, thún-ta̍h lâng ê ē tùi kok tiong siū tû-bia̍t.
5 Ē ū pó-chō in-ūi chû-ài lâi kiàn-siat, ē ū sêng-si̍t ê chē tī hit téng-bīn, tī Ta-bi̍t ê pò͘-pêⁿ lāi teh sím-phòaⁿ, kiû kong-pêⁿ, kín kiâⁿ kong-gī.
6 Iô-tah ê jîn-bîn kóng, " Goán thiaⁿ tio̍h Mô͘-ap lâng ê kiau-ngō͘, i kiau-ngō͘ kàu-ke̍k; i ê chū-ko, i ê kiau-ngō͘, i ê tōa siū-khì; i chū-khoa ê ōe sī khang-khang.
7 Só͘-í, Mô͘-ap ē ūi tio̍h Mô͘-ap thî-khàu, lâng-lâng lóng ē thî-khàu. Lín ē ūi tio̍h Kel-ha-la-siat ê phû-tô piáⁿ lâi thó͘-khùi, pi-siong choa̍t-bāng.
8 In-ūi He-si-bóng ê chhân ta-.khì, Si-bú-mah ê phû-tô chhiū mā sī ánne. Lia̍t kok ê kun-ông at-tn̄g i siōng hó ê ki, chiahê ki bat chhun-kàu Ia-chel, thòaⁿ kàu khòng-iá; i ê ki chhun-chhut, pôaⁿ-kòe hái.
9 Só͘-í, góa beh ūi tio̍h Si-bú-mah ê phû-tô chhiū ai-khàu kah Ia-chel lâng ê ai-khàu sio-siâng. He-si-bóng kah E-lé-a-leh, góa beh ēng ba̍k-sái kā lí koàn-ak, in-ūi lín siu-sêng kóe-chí kah ngó͘-kok ê sî, hoah-hiàm ê siaⁿ hut-jiân kàu.
10 In tùi pûi ê chhân tiong chhiúⁿ-khì hoaⁿ-hí khoài-lo̍k, lín tī phû-tô hn̂g it-tēng bô koh chhiùⁿ koa, mā bô hoaⁿ-hí ê siaⁿ; ta̍h chiú ê lâng tī chiú-khut lāi bô koh ta̍h-chhut chiú; góa hō͘ i hoaⁿ-hí ê siaⁿ soah-khì.
11 In-ūi ánne, góa ê sim-pak ūi tio̍h Mô͘-ap chhin-chhiūⁿ khîm chhut siaⁿ thó͘-khùi, góa ê sim-tn̂g ūi tio̍h Kel-ha-la-siat mā sī ánne.
12 Mô͘-ap lâng tiâu-kìⁿ ê sî, tī koân ê soaⁿ-thâu ià-siān; i koh kàu i ê sèng-só͘ kî-tó, mā bē chiâⁿ.
13 Che sī Siōng-chú chá-chêng koan-hē Mô͘-ap só͘ kóng ê ōe.
14 Chóng-.sī, chitmá Siōng-chú ê ōe kóng, " Saⁿ nî lāi, chiàu tn̂g-kang ê nî-hān, Mô͘-ap ê êng-kng kah i ê jîn-bîn ē tú tio̍h lêng-jio̍k; só͘ chhun lo̍h-.lâi ê lâng chin chió, put kham it kek. "
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。