Í-sài-a su/以賽亞書簡介 線上收聽:中文和合本 台語聖經 客語聖經 福州話聖經 希伯來文讀經 下載檔案 關於語音聖經
24 Siōng-chú beh Chek-hoa̍t Sè-kài
Lí khòaⁿ, Siōng-chú hō͘ tē khang-hi, piàn-chò pha-hng, koh kā tāi-tē hoan liàn-tńg, hō͘ tòa tī hia ê jîn-bîn sì-sòaⁿ.
2 Hit sî, jîn-bîn án-chóaⁿ, chè-si mā ē ánne; lô͘-po̍k án-chóaⁿ, chú-lâng mā ē ánne; lú-pī án-chóaⁿ, chú-bó mā ē ánne; bé mi̍h ê lâng án-chóaⁿ, bē mi̍h ê lâng mā ē ánne; pàng-chè ê lâng án-chóaⁿ, chioh chè ê lâng mā ē ánne; the̍h lī-sek ê lâng án-chóaⁿ, chhut lī-sek ê lâng mā ē ánne.
3 Tē ē chò chi̍t-ē khang-hi, lóng tú tio̍h chhiúⁿ-kiap. In-ūi chit-ê ōe sī Siōng-chú kóng ê.
4 Tē chiūⁿ pi-ai soe-thè, sè-kài hú-pāi soe-thè, tē-chiūⁿ tiàm tī koân ūi ê lâng mā hú-pāi.
5 Tē hō͘ tòa tī hit téng-bīn ê jîn-bîn òe lahsap, in-ūi in hoān tio̍h hiahê lu̍t-hoat, hùi-tû lu̍t-lē, koh ûi-pōe éng-oán ê iok.
6 Só͘-í, tē hō͘ chiù-chó͘ thun-bia̍t, tòa tī hit téng-bīn ê lâng mā siū gí chōe. Tē chiūⁿ ê jîn-bîn siū sio-húi, só͘ chhun lo̍h-.lâi ê lâng chió-chió.
7 Sin chiú pi-ai, phû-tô chhiū húi-hoāi; sim-lāi khoài-lo̍k ê lâng lóng thó͘-khùi.
8 Phah kó͘ ê khoài-lo̍k lóng bô-.khì; iàn-lo̍k ê siaⁿ-im lóng soah, tôaⁿ khîm ê khoài-lo̍k mā lóng siau-sit-.khì.
9 In bē tàng chhiùⁿ koa lim chiú; kāu chiú tùi lim ê lâng ē chiâⁿ-chò khó͘.
10 Pha-hng ê siâⁿ í-keng thiah-húi, ta̍k keng chhù lóng koaiⁿ mn̂g, lâng lóng bē tàng ji̍p-.khì.
11 Tī ke-lō͘ in-ūi bô chiú thang lim, ū pi-ai ê siaⁿ; só͘-ū ê hoaⁿ-hí piàn-chò o͘-àm, tē-chiūⁿ ê khoài-lo̍k lóng siau-sit-.khì.
12 Siâⁿ lāi í-keng pha-hng, siâⁿ mn̂g lóng húi-hoāi.
13 In-ūi tī tē-chiūⁿ, tī bān-bîn ê tiong-kan, ē chhin-chhiūⁿ siū phah-kòe ê kaⁿ-ná chhiū, koh chhin-chhiūⁿ phû-tô bán liáu só͘ chhun lo̍h-.lâi ê.
14 Chiahê lâng ē chhut tōa-siaⁿ, ē hoaⁿ-hí kiò. In ūi tio̍h Siōng-chú ê ui-giâm, tùi hái-.ni̍h lâi tōa-siaⁿ hoah.
15 In-ūi ánne, lín tio̍h tī tang-hong êng-kng Siōng-chú; tī chiahê tó-sū êng-kng Siōng-chú — I-su-la-el Siōng-tè ê miâ.
16 Goán thiaⁿ tio̍h tùi tē-ke̍k ū lâng chhiùⁿ koa, kóng, " Êng-kng kui tī gī ê lâng." Chóng-.sī, góa kóng: Góa siau-bia̍t à! Góa siau-bia̍t à! Góa ū chai-hō! Kúi-chà ê kiâⁿ kúi-chà, kúi-chà ê lâng tōa kiâⁿ kúi-chà.
17 Tē chiūⁿ ê jîn-bîn, kiaⁿ-hiâⁿ, hām-kheⁿ kah oa̍h-tauh lóng ē lîm-kàu lí.
18 Siám-phiah kiaⁿ-hiâⁿ ê siaⁿ ê lâng ē poa̍h-lo̍h hām-kheⁿ; tùi hām-kheⁿ khí-.lâi ê lâng ē hō͘ oa̍h-tauh tauh-.tio̍h; in-ūi thiⁿ-téng ê thang-á lóng khui, tē ê kin-ki mā tín-tāng.
19 Tē chò chi̍t-ē phò-hoāi, tē choân-pō͘ pang-li̍h, tē tōa iô-tāng.
20 Tē ē tian-tian tó-tó, chhin-chhiūⁿ chiú-chùi ê lâng, koh iô lâi iô-khì, chhin-chhiūⁿ tiàu-chhn̂g. Chōe-kò tāng-tāng teh in, tì-sú in it-tēng ē tó lo̍h-.khì, bē tàng koh khí-.lâi.
21 Kàu hit ji̍t, Siōng-chú ē tī thiⁿ-téng chek-hoa̍t thiⁿ-téng ê chèng kun-peng, tī tē-chiūⁿ ē chek-hoa̍t tē-chiūⁿ ê lia̍t ông.
22 In ē siū chū-chi̍p, chhin-chhiūⁿ hoān-lâng siū chū-chi̍p tī hām-kheⁿ, mā ē siū koaiⁿ tī kaⁿ lāi. Chin chē ji̍t liáu-āu, chiū ē ū chhú-hoa̍t lîm-kàu in.
23 Hit sî, goe̍h ē kiàn-siàu, ji̍t ē làu-khùi; in-ūi bān-kun ê Siōng-chú ē tī Si-óng soaⁿ, tī Ê-lú-sa-lèm chò ông, tī I ê tiúⁿ-ló ê bīn-chêng ē ū êng-kng.
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。