Iok-hān Hok-im/約翰福音簡介 線上收聽:中文和合本 台語聖經 台語聖經(長老會傳播中心授權） 客語聖經 福州話聖經 粵語和合本 希臘文 下載檔案 關於語音聖經
17 I-é-su ê Kî-tó
I-é-su kóng chiahê ōe liáu-āu, gia̍h thâu ǹg thiⁿ, kóng, " Thiⁿ-pē ah, sî í-keng kàu à. Goān Lí êng-iāu Lí ê Kiáⁿ, thang hō͘ Kiáⁿ mā ē-tàng êng-iāu Lí.
2 Lí ū kā thóng-tī bān-bîn ê koân-pèng siúⁿ-sù hō͘ Kiáⁿ, hō͘ I ē-tàng kā éng-oán ê oa̍h-miā siúⁿ-sù hō͘ só͘-ū Lí kau-tài I ê lâng.
3 Éng-oán ê oa̍h-miā to̍h-sī, jīn-bat Lí sī to̍k-it chin ê Siōng-tè, koh jīn-bat Lí só͘ chhe-phài lâi ê I-é-su Ki-tok.
4 Góa í-keng tī tē-chiūⁿ oân-sêng Lí kau-tài góa chò ê kang-chok lâi êng-iāu Lí à.
5 Thiⁿ-pē ah, taⁿ kiû Lí hō͘ góa tī Lí ê bīn-chêng tit tio̍h êng-iāu, to̍h-sī chhòng-chō sè-kan í-chêng góa kah Lí chò-hóe ū ê êng-iāu.
6 " Lí tùi sè-kan kéng-soán chhut-lâi hō͘ góa ê lâng, góa í-keng ū kā Lí ê miâ tùi in hián-bêng. In goân-pún sī Lí ê, Lí kā in siúⁿ-sù hō͘ góa, in mā í-keng ū chun-siú Lí ê tō-lí.
7 Taⁿ in chai Lí hō͘ góa ê ta̍k hāng lóng sī tùi Lí lâi ê.
8 In-ūi góa ū kā Lí hō͘ góa ê sìn-sit thoân hō͘ in. In ū chiap-siū hiahê sìn-sit, mā khak-si̍t chai góa sī tùi Lí hia lâi, koh siong-sìn sī Lí chhe-phài góa lâi. "
9 " Góa ūi tio̍h in tùi Lí kî-kiû, m̄-sī ūi tio̍h sè-kan kiû, sī ūi tio̍h Lí hō͘ góa ê lâng lâi kiû, in-ūi in sī Lí ê.
10 Góa ê it-chhè lóng sī Lí ê, Lí ê it-chhè mā lóng sī góa ê. Góa koh ū thong-kòe in tit tio̍h êng-iāu.
11 Taⁿ góa bô koh tiàm tī sè-kan, in iáu tī sè-kan. sèng ê Thiⁿ-pē ah, goān Lí ēng Lí ê miâ, to̍h-sī Lí hō͘ góa ê, lâi pó-siú in, thang hō͘ in chiâⁿ-chò chi̍t thé, chhin-chhiūⁿ lán sī chi̍t thé.
12 Góa kah in chò-hóe ê sî, bat hōng Lí ê miâ, to̍h-sī Lí hō͘ góa ê, lâi pó-siú in. Tû-liáu hit-ê chù-tiāⁿ tîm-lûn ê lâng í-gōa, góa mā ū chiàu-kò͘ in, hō͘ in lóng bô tîm-lûn, ánne sī beh hō͘ keng-tián ê ōe tit tio̍h èng-giām.
13 Taⁿ góa beh khì Lí hia; góa iáu tiàm sè-kan ê sî kóng ê chiahê ōe, sī beh hō͘ in sim-lāi chhiong-móa góa ê hoaⁿ-hí.
14 Góa ū kā Lí ê tō-lí thoân hō͘ in; sè-kan oàn-hūn in, in-ūi in bô koh sio̍k chit sè-kan, chhin-chhiūⁿ góa bô sio̍k chit sè-kan.
15 Góa m̄-sī kiû Lí chhōa in lī-khui chit sè-kan, sī kiû Lí pó-siú in thoat-lī hit-ê siâ-ok.
16 In bô koh sio̍k chit sè-kan, chhin-chhiūⁿ góa bô sio̍k chit sè-kan.
17 Kiû Lí ēng chin-lí kā in sèng-hòa; Lí ê ōe to̍h-sī chin-lí.
18 Chhin-chhiūⁿ Lí ū chhe-phài góa ji̍p sè-kan, góa mā ū chhe-phài in ji̍p sè-kan.
19 Taⁿ góa ūi tio̍h in lâi sèng-hòa góa kakī hō͘ Lí ēng, thang hō͘ in mā ē-tàng thong-kòe chin-lí lâi sèng-hòa in kakī hō͘ Lí ēng.
20 " Góa m̄ nā ūi tio̍h chiahê lâng kî-kiû, mā ūi tio̍h tùi chiahê lâng só͘ thoân ê tō-lí lâi sìn góa ê lâng kî-kiû,
21 Thang hō͘ in lóng chiâⁿ-chò chi̍t thé. Thiⁿ-pē ah, chhin-chhiūⁿ Lí tiàm tī góa lāi-bīn, góa tiàm tī Lí lāi-bīn, kiû Lí hō͘ in mā ánne tiàm tī lán lāi-bīn, thang hō͘ sè-kan siong-sìn sī Lí chhe-phài góa lâi ê.
22 Lí hō͘ góa ê êng-iāu, góa mā ū hō͘ in, thang hō͘ in chiâⁿ-chò chi̍t thé, chhin-chhiūⁿ lán sī chi̍t thé.
23 Góa tī in lāi-bīn, Lí tī góa lāi-bīn, sī beh hō͘ in ē-tàng oân-choân chiâⁿ-chò chi̍t thé, thang hō͘ sè-kan chai sī Lí chhe-phài góa, mā chai Lí ū thiàⁿ in chhin-chhiūⁿ Lí ū thiàⁿ góa.
24 " Thiⁿ-pē ah, Lí kau-tài góa hiahê lâng, góa bô-lūn tī tó-ūi lóng ài in kah góa chò-hóe, thang hō͘ in khòaⁿ tio̍h Lí siúⁿ-sù góa ê êng-iāu, in-ūi Lí tī chhòng-chō sè-kan í-chêng to̍h í-keng thiàⁿ góa.
25 Kong-gī ê Thiⁿ-pē ah, sè-kan m̄ bat Lí, to̍k-to̍k góa bat Lí. Chiahê lâng mā chai Lí ū chhe-phài góa.
26 Góa í-keng ū hō͘ in bat Lí ê miâ, mā beh kè-sio̍k chí-sī in, thang hō͘ Lí tùi góa ê thiàⁿ tī in lāi-bīn, góa mā tī in lāi-bīn. "
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。