Bîn-sò͘ kì/民數記簡介 線上收聽:中文和合本 台語聖經 客語聖經 福州話聖經 希伯來文讀經 下載檔案 關於語音聖經
13 Thàm-á Khì Thàm Ka-nân Tē
( SBK 1: 19-33)
Siōng-chú hoan-hù Mô͘-se kóng,
2 " Lí tio̍h chhe lâng khì thàm-khòaⁿ Góa só͘ sù hō͘ I-su-la-el lâng ê Ka-nân tē, tio̍h tùi in chó͘-sian ta̍k chi-cho̍k tiong-kan kok chhe chi̍t-ê lâng, lóng sī tī in tiong-kan chò siú-léng ê. "
3 Mô͘-se chiū chiàu Siōng-chú ê bēng-lēng, tùi Pa-lân ê khòng-iá chhe in khì, in lóng sī I-su-la-el lâng ê cho̍k-tiúⁿ.
4 In ê miâ kì tī ē-té: sio̍k Lū-biān ê chi-cho̍k, Cha̍k-khul ê kiáⁿ Siam-mu-ah.
5 Sio̍k Si-miān ê chi-cho̍k, Hô-lī ê kiáⁿ Sia-hoat.
6 Sio̍k Iô-tah ê chi-cho̍k, E-hun-neh ê kiáⁿ Ka-le̍p.
7 Sio̍k It-sa-kal ê chi-cho̍k, Iô-sé-huh ê kiáⁿ Í-ka.
8 Sio̍k E-hu-laim ê chi-cho̍k, Nùn ê kiáⁿ Hô-se-a.
9 Sio̍k Biān-iá-mín ê chi-cho̍k, La̍h-hu ê kiáⁿ Phàⁿ-thê.
10 Sio̍k Che-bú-lông ê chi-cho̍k, So-tí ê kiáⁿ Ka-tia̍p.
11 Sio̍k Má-ná-se ê chi-cho̍k, Chu-ji ê kiáⁿ Ga̍t-tí.
12 Sio̍k Tàn ê chi-cho̍k, Ga-má-lī ê kiáⁿ Am-mí-el.
13 Sio̍k A-sel ê chi-cho̍k, Mî-khá-el ê kiáⁿ Se-thiap.
14 Sio̍k Ná-hu-tha-lím ê chi-cho̍k, Po̍k-se ê kiáⁿ Ná-pí.
15 Sio̍k Ga̍t ê chi-cho̍k, Má-ki ê kiáⁿ Kiū-lī.
16 Chiahê to̍h-sī Mô͘-se só͘ chhe khì thàm-khòaⁿ hit-ê tē ê lâng ê miâ. Mô͘-se chiū chheng Nùn ê kiáⁿ Hô-se-a chò Io-siú-ah.
17 Mô͘-se chhe in khì thàm-khòaⁿ Ka-nân tē, tùi in kóng, " Lín tùi chit-ê lâm-hong chiūⁿ-.khì, sòa peh-chiūⁿ in ê soaⁿ,
18 khòaⁿ hit-ê tē án-chóaⁿ, kî-tiong só͘ tòa ê jîn-bîn sī kiông á-.sī jio̍k, sī chió á-.sī chē.
19 Só͘ tòa ê tē sī siáⁿ-mi̍h khoán, sī hó á-.sī pháiⁿ; só͘ tòa ê só͘-chāi siáⁿ-mi̍h khoán, sī iâⁿ-pâng á-.sī kian-kò͘ ê siâⁿ.
20 Koh khòaⁿ hit-ê thó͘-tē án-chóaⁿ, sī pûi á-.sī sán, hit tiong-kan ū chhiū-ba̍k á-bô. Lín tio̍h hó-táⁿ, kā hit só͘-chāi ê kóe-chí tòa kóa-á tńg-.lâi. "（Hit sî, tú-á sī phû-tô khí-thâu se̍k ê sî. ）
21 In chiū khì thàm-khòaⁿ hit-ê tē, tùi Chîn ê khòng-iá kàu Le-hap, kàu ji̍p Ha-mat ê lō͘-kháu.
22 In tùi lâm-hong chiūⁿ-.khì, kàu He-bú-lông; tī hia ū A-lap cho̍k ê lâng A-hi-mān, Sī-su, That-mái. ( He-bú-lông siâⁿ khí-chō pí Ai-gi̍p ê Chó-an siâⁿ khah chá chhit nî. )
23 In lâi-kàu E-si-kol ê soaⁿ-kok, tùi hia chhò phû-tô chhiū chi̍t ki, téng-bīn ū chi̍t pha phû-tô, nn̄g lâng ēng kǹg-á lâi kng, koh tòa kóa-á sia̍h-liû kah bû-hoa-kó lâi.
24 In-ūi I-su-la-el lâng tùi hia chhò chi̍t pha phû-tô, hit só͘-chāi chiah hō-chò E-si-kol ê soaⁿ-kok.
25 In thàm-khòaⁿ hit-ê tē-sì-cha̍p kang chiah tńg-.lâi.
26 Kàu Pa-lân ê khòng-iá ê Ka-té-si, kìⁿ tio̍h Mô͘-se, A-lông kah I-su-la-el ê hōe-chiòng, hôe-hok in kah choân hōe-chiòng, koh ēng hit só͘-chāi ê kóe-chí hō͘ in khòaⁿ.
27 Koh kā i kóng, " Goán kàu lí só͘ chhe goán khì ê tē, kó-jiân sī lâu leng kah bi̍t ê tē, che to̍h-sī hit-ê tē ê kóe-chí.
28 Chóng-.sī, hit só͘-chāi ê jîn-bîn ióng-chòng, siâⁿ mā kian-kò͘ koh khoah-tōa, goán tī hia mā khòaⁿ tio̍h A-lap cho̍k.
29 A-má-le̍k lâng tòa tī lâm-hong, Hiat lâng, I-é-bú-suh lâng kah A-mô͘-lī lâng, tòa tī soaⁿ-tē, Ka-nân lâng tòa tī hái piⁿ kah Iol-tàn hô piⁿ. "
30 Ka-le̍p tī Mô͘-se ê bīn-chêng an-ùi jîn-bîn, kóng, " Lán tio̍h chek-sî khì, thang lâi tit tio̍h hit só͘-chāi, lán ū kàu-gia̍h ê la̍t, ē khah iâⁿ in. "
31 To̍k-to̍k hiahê kah i chiūⁿ-khì ê lâng kóng, " Lán bē tàng chiūⁿ-khì kong-kek hiahê jîn-bîn, in-ūi in pí lán khah ióng-chòng. "
32 In hiahê lâng lūn só͘ thàm-khòaⁿ ê tē, tùi I-su-la-el lâng pò pháiⁿ siau-sit, kóng, " Goán só͘ keng-kòe thàm-khòaⁿ ê tē, sī thun-chia̍h hiahê tòa tī hia ê jîn-bîn ê tē, goán tī hia só͘ khòaⁿ-.tio̍h ê jîn-bîn lóng chin tōa-hàn.
33 Goán tī hia khòaⁿ tio̍h A-lap cho̍k lâng, to̍h-sī tōa-hàn lâng, in sī tōa-hàn lâng ê kiáⁿ-sun. Chiàu goán khòaⁿ kakī ná chhin-chhiūⁿ chháu-meh, chiàu in khòaⁿ goán mā sī ánne. "
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。