Chhòng-sè kì/創世記簡介 線上收聽:中文和合本 台語聖經 客語聖經 福州話聖經 希伯來文讀經 下載檔案 關於語音聖經
37:1 Iô-sé-huh kah I ê Hiaⁿ-tī
Iâ-kop tòa Ka-nân tē, to̍h-sī i ê lāu-pē kià-kha ê só͘-chāi.
37:2 Iâ-kop ê sè-hē kì tī ē-té: Iô-sé-huh cha̍p-chhit hòe kah i hiahê a-hiaⁿ chò-hóe kò͘ iûⁿ. I sī chi̍t-ê gín'á kah i ê lāu-pē ê sè-î Bil-ha̍h ê kiáⁿ Jil-pah ê kiáⁿ, tiāⁿtiāⁿ chò-tīn. Iô-sé-huh kā i hiahê a-hiaⁿ ê pháiⁿ phín-hēng kā in lāu-pē kóng.
37:3 Taⁿ I-su-la-el thiàⁿ Iô-sé-huh khah iâⁿ-kòe thiàⁿ i kî-tha ê chèng kiáⁿ, in-ūi Iô-sé-huh sī i nî lāu ê sî seⁿ ê. I kā Iô-sé-huh chò chi̍t-niá chhái-sek ê saⁿ.
37:4 Iô-sé-huh hiahê a-hiaⁿ khòaⁿ tio̍h lāu-pē khah thiàⁿ Iô-sé-huh, chiū oàn-hūn Iô-sé-huh, m̄ kah i kóng hô-bo̍k ê ōe.
37:5 Iô-sé-huh bāng-kìⁿ chi̍t-ê bāng, kā i hiahê a-hiaⁿ kóng, in chiū koh khah oàn-hūn i.
37:6 Iô-sé-huh tùi in kóng, " Chhiáⁿ lín thiaⁿ góa só͘ bāng-kìⁿ ê bāng,
37:7 Lán tī hn̂g-.ni̍h hâ ngó͘-kok, góa só͘ hâ ê ē khiā khí-.lâi, lín só͘ hâ ê chiū ûi óa-lâi pài góa só͘ hâ ê. "
37:8 I ê a-hiaⁿ ìn kóng, " Kám kóng lí chin-chiàⁿ beh chò goán ê ông? Chin-chiàⁿ beh kā goán koán-hat? " In chiū ūi tio̍h i ê bāng kah i ê ōe, koh khah oàn-hūn i.
37:9 Āu-lâi, i koh bāng-kìⁿ chi̍t-ê bāng, mā kā i ê a-hiaⁿ kóng, " Lí khòaⁿ, góa iū-koh bāng-kìⁿ chi̍t-ê bāng, ū ji̍t, goe̍h kah cha̍p-it lia̍p chheⁿ teh pài góa. "
37:10 Iô-sé-huh kā i ê lāu-pē kah i ê a-hiaⁿ kóng, in lāu-pē chiū kā i chek-pī, kóng, " Lí só͘ bāng-kìⁿ chit-ê bāng sī siáⁿ-mi̍h bāng? Kám kóng góa kah lín lāu-bú, lín hiaⁿ-tī, lóng tio̍h phak-teh kā lí pài? "
37:11 Iô-sé-huh ê a-hiaⁿ lóng oàn-tò͘ i, i ê lāu-pē kā chiahê ōe kì tī sim-lāi.
37:12 Iô-sé-huh Hông Bē-khì Ai-gi̍p
Iô-sé-huh ê a-hiaⁿ khì Sī-khiàm, chhī lāu-pē ê iûⁿ.
37:13 I-su-la-el tùi Iô-sé-huh kóng, " Lín a-hiaⁿ kám m̄-sī tī Sī-khiàm teh chhī iûⁿ? Lí lâi, góa beh chhe lí khì in hia. " Iô-sé-huh ìn kóng, " Góa tī chia. "
37:14 I-su-la-el kā i kóng, " Lí khì khòaⁿ lín a-hiaⁿ ū pêng-aná bô, iûⁿ-kûn ū pêng-aná bô, jiân-āu tńg-lâi kā góa kóng. " I-su-la-el chiū chhe i chhut He-bú-lông ê soaⁿ-kok. Iô-sé-huh chiū khì-kàu Sī-khiàm,
37:15 Ū lâng tn̄g tio̍h i tī soaⁿ-.ni̍h bê-lō͘, chiū mn̄g i kóng, " Lí teh chhōe siáⁿ-mi̍h? "
37:16 I kóng, " Góa teh chhōe góa ê a-hiaⁿ, chhiáⁿ kā góa kóng, in tī tó-ūi teh chhī iûⁿ? "
37:17 Hitê lâng kóng, " In í-keng lī-khui chia, in-ūi góa thiaⁿ tio̍h in teh kóng, lán lâi-khì To-than. " Iô-sé-huh chiū khì jiok i ê a-hiaⁿ, tī To-than tú tio̍h in.
37:18 In hn̄g-hn̄g khòaⁿ tio̍h Iô-sé-huh. I iáu-bōe kiâⁿ kàu in hia, in chiū chò-hóe kè-bô͘ beh kā i hāi-sí.
37:19 In tāi-ke chò-hóe kóng, " Lí khòaⁿ, chò-bāng ê lâi à.
37:20 Lâi, taⁿ lán lâi kā i thâi-sí, hiat tī chi̍t kháu ta-chéⁿ, jiân-āu chiah lâi kóng i sī hō͘ iá-siù chia̍h-.khì. Lán chiah lâi khòaⁿ i ê bāng chiong-lâi ē piàn án-chóaⁿ? "
37:21 Lū-biān thiaⁿ-.tio̍h, chiū siūⁿ beh kiù i thoat-lī in ê chhiú, kóng, " Lán m̄ thang hāi-sí i ê sèⁿ-miā. "
37:22 Lū-biān koh tùi in kóng, " M̄-thang hō͘ i lâu hoeh. Kā i hiat lo̍h-khì chit-ê khòng-iá ê ta-chéⁿ, m̄ thang hē chhiú kā i hāi-sí. " I ê ì-sù sī beh kiù Iô-sé-huh thoat-lī in ê chhiú, hō͘ i ē-tàng tńg-khì i ê lāu-pē hia.
37:23 Iô-sé-huh lâi-kàu i ê a-hiaⁿ hia, hit sî in chiū thǹg Iô-sé-huh ê gōa-saⁿ, to̍h-sī i seng-khu hit niá chhái-sek ê saⁿ.
37:24 In chiū kā i lia̍h khí-.lâi, hiat lo̍h-khì chéⁿ ni̍h; hit kháu chéⁿ sī ta ê, lāi-bīn bô chúi.
37:25 In chē teh chia̍h piáⁿ, gia̍h thâu khòaⁿ, khòaⁿ tio̍h chi̍t tīn I-si-ma-el lâng tùi Gi-lia̍t lâi, ēng lo̍k-tô chài phang-liāu, jú-hiuⁿ, bu̍t-io̍h, beh tòa lo̍h-khì Ai-gi̍p.
37:26 Iô-tah tùi chiahê hiaⁿ-tī kóng, " Lán thâi-sí lán ê sió-tī, ún-ba̍t i ê hoeh, ū siáⁿ-mi̍h lī-ek?
37:27 Lán lâi kā i bē hō͘ I-si-ma-el lâng, m̄ thang hē chhiú kā i hāi-sí, in-ūi i sī lán ê sió-tī, lán ê kut-jio̍k. " Hiaⁿ-tī thiaⁿ Iô-tah ê ōe.
37:28 Ū chi̍t-kóa Mí-tiân ê senglí lâng tùi hia kòe, i ê a-hiaⁿ chiū kā Iô-sé-huh tùi chéⁿ lāi giú khí-.lâi, kā i bē hō͘ I-si-ma-el lâng, tit tio̍h jī-cha̍p-ê gîn-á. Hiahê lâng chiū tòa Iô-sé-huh khì Ai-gi̍p.
37:29 Lū-biān tò tńg-lâi chéⁿ piⁿ, khòaⁿ tio̍h Iô-sé-huh bô tī chéⁿ lāi, chiū thiah-li̍h kakī ê saⁿ, hui-siông pi-siong.
37:30 I tò tńg-khì i ê hiaⁿ-tī hia, kóng, " Gín-á bô-.khì à, taⁿ góa beh tó-ūi khì? "
37:31 In chiū thâi chi̍t chiah soaⁿ-iûⁿ-káng, kā Iô-sé-huh hit niá saⁿ ùn hoeh,
37:32 Chiū chhe lâng the̍h hit niá chhái-sek ê saⁿ khì in lāu-pē hia, kóng, " Goán chhōe tio̍h chit niá saⁿ, chhiáⁿ lí jīn khòaⁿ sī lí ê kiáⁿ ê gōa-saⁿ-á m̄-sī? "
37:33 I ē jīn-tit, chiū kóng, " Che sī góa ê kiáⁿ ê gōa-saⁿ, ū iá-siù kā i thun-chia̍h, Iô-sé-huh it-tēng sī hō͘ i thiah-chhùi à. "
37:34 Iâ-kop chiū thiah-li̍h saⁿ, io hâ môa-pò͘, ūi i ê kiáⁿ ai-siong chin chē kang.
37:35 I ê kiáⁿ kah i ê chabó͘ kiáⁿ lóng khí-lâi kā i an-ùi. I m̄-khéng siū an-ùi, kóng, " Góa it-tēng beh ai-siong lo̍h im-hú, kàu góa ê kiáⁿ hia. " Iô-sé-huh ê lāu-pē ūi tio̍h i thî-khàu.
37:36 Mí-tiân lâng tòa Iô-sé-huh lâi-kàu Ai-gi̍p, kā i bē hō͘ Hôa-láu ê jîn-sîn, to̍h-sī sī-ōe-tiúⁿ Pho-thê-hoal.
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。