Si-phian/詩篇簡介 線上收聽:中文和合本 台語聖經 客語聖經 福州話聖經 希伯來文讀經 下載檔案 關於語音聖經
33:1 Siōng-chàn Chi Koa
Lín gī lâng tio̍h in-ūi Siōng-chú lâi hoaⁿ-hí; chèng-ti̍t ê lâng ê mā tio̍h oló Siōng-chú.
33:2 Lín tio̍h tôaⁿ khîm lâi kám-siā Siōng-chú, ēng cha̍p tiâu hiân ê sek oló I.
33:3 Tio̍h tùi I chhiùⁿ sin ê koa, tôaⁿ kah chin hó, siaⁿ-im hiáng-liāng.
33:4 In-ūi Siōng-chú ê giân-gí chèng-ti̍t; I ê só͘ chò choân-pō͘ lóng sī sìn-si̍t.
33:5 I ì-ài gī-lí kah kong-pêⁿ; Siōng-chú ê chû-ài phó͘-ki̍p choân tē.
33:6 Kiong-chhong tùi Siōng-chú ê ōe lâi chhòng-chō, thiⁿ-.ni̍h ê chheⁿ-sîn tùi I ê chhùi ê khùi lâi chō-sêng.
33:7 I kā hái chúi chū-chi̍p kui tui, kā chhim-ian siu-chông tī khò͘-pâng.
33:8 Choân tē tio̍h kèng-ùi Siōng-chú; sè-kan lâng lóng tio̍h kiaⁿ-ùi I.
33:9 In-ūi I chi̍t ē kóng-chhut, chiū chhut-hiān ú-tiū; I chi̍t ē bēng-lēng, chiū hêng-sêng bān-mi̍h.
33:10 Siōng-chú hō͘ lia̍t pang ê kè-ōe kui tī khang-khang, hō͘ bān-bîn ê kè-bô͘ lóng bô kong-hāu.
33:11 Siōng-chú ê kè-ōe éng-oán khiā chāi, I ê sim-ì sòa-kàu bān-sè-tāi.
33:12 Jīn Siōng-chú chò Siōng-tè ê kok chin ū hok-khì! Siū kéng-soán chò I ê sán-gia̍p ê chú-bîn chin ū hok-khì!
33:13 Siōng-chú tùi thiⁿ teh khòaⁿ, I kàm-chhat só͘-ū ê sè-kan lâng.
33:14 I tùi I ê pó-chō khòaⁿ lo̍h-.lâi, khòaⁿ I tē-chiūⁿ só͘-ū ê chú-bîn.
33:15 I sī chō chèng lâng ê sim ê, I chù-ì in it-chhè ê chok-ûi.
33:16 Kun-ông bē tàng in-ūi peng chē chiū tit tio̍h kiù; ióng-sū bē tàng in-ūi khùi-la̍t tōa chiū tit tio̍h kiù.
33:17 Óa-khò bé, bô it-tēng ē tit tio̍h kiù; khò tōa khùi-la̍t mā bô it-tēng ē-tàng kiù lâng.
33:18 Siōng-chú ê ba̍k-chiu khòaⁿ-kò͘ kèng-ùi I ê lâng, chiàu-kò͘ gióng-bōng I ê chû-ài ê lâng.
33:19 I ē kiù in ê sèⁿ-miā thoat-lī sí-bông, pó-chûn in ê oa̍h-miā tō͘-kòe ki-hng.
33:20 Goán ê sim-sîn sî-sî teh thèng-hāu Siōng-chú; I sī chò goán ê pang-chān, chò goán ê tîn-pâi.
33:21 Goán ê sim ē in-ūi óa-khò I lâi hoaⁿ-hí, in-ūi goán sî-sî óa-khò I ê sèng-miâ.
33:22 Siōng-chú ah, goān Lí chiàu goán só͘ gióng-bōng Lí ê, si-lo̍h Lí ê chû-ài hō͘ goán.
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。