Si-phian/詩篇簡介 線上收聽:中文和合本 台語聖經 客語聖經 福州話聖經 希伯來文讀經 下載檔案 關於語音聖經
64:1 Kî-kiû Pó-hō͘
（ Ta-bi̍t ê si, kau hō͘ ga̍k-koaⁿ. ）Siōng-tè ah, góa ai-siong ê sî, kiû Lí thiaⁿ góa ê siaⁿ; kiû Lí pó-hō͘ góa ê sèⁿ-miā bián-kiaⁿ tùi-te̍k.
64:2 Kiû Lí kā góa ún-ba̍t, hō͘ góa thoat-lī pháiⁿ lâng ê im-bô͘, thoat-lī put-gī ê lâng ê jiáu-loān.
64:3 In bôa in ê chi̍h chhin-chhiūⁿ teh bôa to, in ēng ok-to̍k ê ōe chò chìⁿ teh biâu-chún.
64:4 In bâi-ho̍k beh siā oân-choân ê lâng; in hut-jiân siā tio̍h i, mā bô teh kiaⁿ.
64:5 In chham-siông pháiⁿ kè-bô͘; in àm-tiong tiuⁿ lô-bāng, kóng, siáⁿ lâng ē khòaⁿ tio̍h lán?
64:6 In tô͘-bô͘ pháiⁿ tāi, kóng, goán chīn-la̍t tô͘-bô͘, í-keng ū tú-hó ê kè-bô͘. In ta̍k lâng ê liām-thâu kah sim-su put-chí kúi-chà.
64:7 Chóng-.sī, Siōng-tè ē ēng chìⁿ kā in siā; in ē hut-jiân tio̍h-siong.
64:8 In ê kha ē that tio̍h, in ê chi̍h ē hāi tio̍h kakī; hoān-nā khòaⁿ-.tio̍h ê lâng lóng ē iô thâu.
64:9 Chèng lâng lóng ē kiaⁿ-hiâⁿ, beh soan-iông Siōng-tè ê só͘ chò, koh siông-sè su-khó I ê só͘ kiâⁿ.
64:10 Gī lâng ē in-ūi Siōng-chú lâi hoaⁿ-hí, mā ē óa-khò I; hoān-nā sim chèng-ti̍t ê lâng lóng ē in-ūi I lâi khoa-kháu.
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。