Si-phian/詩篇簡介 線上收聽:中文和合本 台語聖經 客語聖經 福州話聖經 希伯來文讀經 下載檔案 關於語音聖經
83:1 Ūi Phah-iâⁿ I-su-la-el Siû-te̍k Kî-tó
（ A-sah ê si-koa. ）Siōng-tè ah, kiû Lí m̄ thang tiām-tiām; Siōng-tè ah, kiû Lí m̄ thang bô khui chhùi, mā m̄ thang bô chhut siaⁿ!
83:2 In-ūi Lí ê tùi-te̍k hōa-hōa jióng, oàn-hūn Lí ê lâng gia̍h-khí thâu-khak.
83:3 In ēng kan-chà ê kè-bô͘ beh hāi Lí ê chú-bîn; in chò-hóe gī-lūn beh hāi Lí só͘ pó-hō͘ ê lâng.
83:4 In kóng: Lâi, lán lâi kā in siau-bia̍t, hō͘ in bông-kok! Hō͘ I-su-la-el ê miâ bô koh hō͘ lâng kì-liām!
83:5 In tâng-sim chò-hóe chham-siông, li̍p-iok kiat-bêng beh tí-te̍k Lí;
83:6 Chiū-sī tòa pò͘-pêⁿ ê E-tóm kah I-si-ma-el lâng, Mô͘-ap kah Ha-gal lâng.
83:7 Ge-bal, Am-móng, A-má-le̍k kah Hui-lī-sū, í-ki̍p Tu-lô ê chū-bîn;
83:8 A-siul mā kah in liân-ha̍p; in chò Ló-toh kiáⁿ-sun ê pang-chhiú. [Sè-la̍h]
83:9 Kiû Lí chhin-chhiūⁿ chá-chêng khoán-thāi Mí-tiân ánne kā in khoán-thāi; chhin-chhiūⁿ tī Ki-sióng hô khoán-thāi Si-se-la̍h kah Ia-bín.
83:10 In tī Ian-tol bia̍t-bông, piàn-sêng tē-chiūⁿ ê pùn-sò.
83:11 Kiû Lí hō͘ in ê léng-siù chhin-chhiūⁿ O͘-liab kah Je-eb, hō͘ in ê kun-tiúⁿ lóng chhin-chhiūⁿ Se-bah kah Chal-mú-nah.
83:12 In kóng: Lán tio̍h kā Siōng-tè teh tòa ê só͘-chāi, chiàm lâi chò lán kakī ê.
83:13 Góa ê Siōng-tè ah, kiû Lí hō͘ in chhin-chhiūⁿ kńg-lê-á hong ê tîn-ai, chhin-chhiūⁿ hō͘ hong chhoe cháu ê tiū-sap.
83:14 Chhin-chhiūⁿ hóe sio chhiū-nâ, chhin-chhiūⁿ hóe-iām sio soaⁿ-thâu.
83:15 Kiû Lí mā chhin-chhiūⁿ ánne ēng Lí ê kông hong kā in jiok, ēng Lí ê tōa hong hō͘ in kiaⁿ-hiâⁿ.
83:16 Siōng-chú ah, kiû Lí hō͘ in móa-bīn kiàn-siàu, thang hō͘ in lâi kî-kiû Lí ê miâ!
83:17 Hō͘ in éng-oán kiàn-siàu, kiaⁿ-hiâⁿ! Hō͘ in làu-khùi, bia̍t-bông!
83:18 Hō͘ in chai chí ū Lí — miâ kiò I-é-ho-bah ê, sī choân tē ê Chì-koân-.ê!
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。