Si-phian/詩篇簡介 線上收聽:中文和合本 台語聖經 客語聖經 福州話聖經 希伯來文讀經 下載檔案 關於語音聖經
91:1 Siōng-tè sī lán ê Pó-hō͘-chiá
Tòa tī Chì-koân-.ê ê ún-ba̍t só͘-chāi ê lâng, Hitê lâng ē tòa tī choân-lêng Siōng-tè ê ìm-ńg ē.
91:2 Koan-hē Siōng-chú góa beh kóng, I sī góa tô-siám ê só͘-chāi, sī góa ê soaⁿ-chē; sī góa ê Siōng-tè, sī góa só͘ óa-khò ê.
91:3 In-ūi I ē kiù lí thoat-lī tng chiáu-á ê lô-bāng kah to̍k-hāi ê un-e̍k.
91:4 I ē ēng I ê si̍t-kó͘ áⁿ lí; lí ē bih tī I ê si̍t-ē; I ê sìn-si̍t sī tōa-tōa sè-sè ê tîn-pâi.
91:5 Lí m̄-bián kiaⁿ àm-sî ê khióng-pò͘, á-.sī ji̍t-sî teh poe ê chìⁿ.
91:6 Mā bián-kiaⁿ o͘-àm tiong liû-hêng ê un-e̍k, á-.sī thàu tiong-tàu ē húi-bia̍t lâng ê to̍k-chèng.
91:7 Ū chheng lâng tī lí ê sin piⁿ bô la̍t hūn-tó lo̍h-.khì, ū bān lâng tī lí ê chiàⁿ pêng bô la̍t hūn-tó lo̍h-.khì, chiahê chai-lān mā bē lîm-kàu lí.
91:8 M̄ koh, lí ē chhin-ba̍k khòaⁿ-.tio̍h, ē khòaⁿ tio̍h pháiⁿ lâng siū pò-èng.
91:9 In-ūi lí ū Siōng-chú chò tô-siám ê só͘-chāi; lí ū ēng Chì-koân-.ê chò lí tòa ê só͘-chāi,
91:10 Chai-hāi bē lîm-kàu lí, un-e̍k mā bē óa-kīn lí ê pò͘-pêⁿ.
91:11 In-ūi Siōng-tè ē ūi tio̍h lí lâi hoan-hù I ê sù-chiá, tī lí só͘-ū ê lō͘-tô͘ tiong kā lí pó-hō͘.
91:12 In ē ēng chhiú hû lí, bián-tit lí ê kha tak tio̍h chio̍h-thâu.
91:13 Lí ē ēng kha chàm sai kah to̍k-chôa, lap sai-á-thûn kah tōa-bóe chôa.
91:14 Siōng-tè kóng, " In-ūi i chin thiàⁿ góa, góa chiū beh kā i kiù; in-ūi i bat Góa ê miâ, Góa beh kā i an-tì tī koân ê só͘-chāi.
91:15 I kiû-kiò Góa, Góa chiū ē kā i ìn; i tī gûi-kip ê sî, Góa ē kah i tông-chāi; Góa beh chín-kiù i, hō͘ i chun-kùi.
91:16 Góa beh siúⁿ-sù tn̂g hòe-siū hō͘ i boán-chiok, hō͘ i khòaⁿ tio̍h Góa ê kiù-un.
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。