Si-phian/詩篇簡介 線上收聽:中文和合本 台語聖經 客語聖經 福州話聖經 希伯來文讀經 下載檔案 關於語音聖經
115:1 To̍k-it Chin-sîn
Siōng-chú ah, êng-kng m̄ thang kui hō͘ goán, m̄ thang kui hō͘ goán; tio̍h in-ūi Lí ê chû-ài kah sêng-si̍t, kui tī Lí ê miâ.
115:2 Bián-tit hō͘ gōa-pang lâng kóng, Taⁿ, in ê Siōng-chú tī tó-ūi?
115:3 Chóng-.sī, goán ê Siōng-tè tī thiⁿ-téng, lóng chiàu I só͘ ài ê chò tāichì.
115:4 In ê ngó͘-siōng sī gîn ê, kim ê, sī lâng ê chhiú só͘ chō ê.
115:5 In ū chhùi mā bē kóng-ōe, ū ba̍k-chiu mā khòaⁿ bē tio̍h.
115:6 In ū hīⁿ-khang mā thiaⁿ bē tio̍h, ū phīⁿ-khang mā phīⁿ bē tio̍h.
115:7 In ū chhiú mā the̍h bē tio̍h mi̍h-kiāⁿ, ū kha mā bē kiâⁿ lō͘, in mā bô ēng in ê nâ-âu chhut siaⁿ.
115:8 Kā in chō ê, óa-khò in ê, lóng ē chhin-chhiūⁿ in.
115:9 I-su-la-el, lí tio̍h óa-khò Siōng-chú! I sī lí ê pang-chān, lí ê tîn-pâi.
115:10 A-lông ê ke, lín tio̍h óa-khò Siōng-chú! I sī lín ê pang-chān, lín ê tîn-pâi.
115:11 Kèng-ùi Siōng-chú ê lâng, lín tio̍h óa-khò Siōng-chú! I sī lín ê pang-chān, lín ê tîn-pâi.
115:12 Siōng-chú pêng-sî siàu-liām lán, I ē sù hok-khì hō͘ lán; ē sù hok-khì hō͘ I-su-la-el ê ke, ē sù hok-khì hō͘ A-lông ê ke.
115:13 Kèng-ùi Siōng-chú ê lâng bô-lūn tōa-sè, I lóng ē sù hok-khì hō͘ in.
115:14 Goān Siōng-chú ke-thiⁿ lín ê jîn-sò͘, ke-thiⁿ lín kah lín ê kiáⁿ-sun.
115:15 Goān chhòng-chō thiⁿ-tē ê Siōng-chú, ē siúⁿ-sù hok-khì hō͘ lín!
115:16 Thiⁿ sī Siōng-chú ê thiⁿ; tē sī I sù hō͘ sè-kan lâng ê.
115:17 Sí-lâng bē tàng oló Siōng-chú; lo̍h kàu tiām-tiām ê só͘-chāi ê lâng mā lóng bē tàng.
115:18 Chóng-.sī, goán beh oló Siōng-chú, tùi chit sî kàu éng-oán. Lín tio̍h oló Siōng-chú!
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。