Si-phian/詩篇簡介 線上收聽:中文和合本 台語聖經 客語聖經 福州話聖經 希伯來文讀經 下載檔案 關於語音聖經
116:1 Tit-kiù O-ló Siōng-chú
Góa thiàⁿ Siōng-chú, in-ūi I thiaⁿ góa ê ōe, thiaⁿ góa ê khún-kiû.
116:2 I í-keng àⁿ hīⁿ-khang thiaⁿ góa, só͘-í, góa chi̍t-sì-lâng lóng beh kiû-kiò I.
116:3 Sí-bông ê soh-á tîⁿ tio̍h góa, im-hú ê thòng-khó͘ khîⁿ tio̍h góa; góa ū tú tio̍h hoān-lān iu-khó͘.
116:4 Góa chiū kiû-kiò Siōng-chú ê miâ, kóng, Siōng-chú ah, taⁿ kiû Lí kiù góa ê sèⁿ-miā!
116:5 Siōng-chú ū un-hūi, ū kong-gī; goán ê Siōng-tè ū chû-pi.
116:6 Siōng-chú pó-hō͘ gōng-ti̍t ê lâng; góa kàu tī pi-bî ê tē-ūi, I chiū kiù góa.
116:7 Góa ê sim-sîn, tio̍h kui tī lí an-hioh ê só͘-chāi, in-ūi Siōng-chú ēng tōa in khoán-thāi lí.
116:8 In-ūi Lí kiù góa ê sèⁿ-miā bián-tit sí-bông, kiù góa ê ba̍k-chiu bián lâu ba̍k-sái, kiù góa ê kha bián poa̍h-tó.
116:9 Góa beh tī Siōng-chú ê bīn-chêng, kiâⁿ tī oa̍h-lâng ê tē.
116:10 Góa sûi-jiân siū ke̍k tōa ê khùn-khó͘, góa iû-goân sìn-khò Siōng-chú
116:11 Góa bat tio̍h-kip kóng: Lâng lóng sī hi-ké.
116:12 Siōng-chú siúⁿ-sù góa it-chhè ê tōa in, góa beh ēng siáⁿ-mi̍h pò-tap I?
116:13 Góa beh phâng khí kiù-un ê poe, kiû-kiò Siōng-chú ê miâ.
116:14 Góa beh tī I chèng chú-bîn ê bīn-chêng, tùi Siōng-chú siā góa ê goān.
116:15 Siōng-chú khòaⁿ I sèng ê chú-bîn sí-.khì, hui-siông m̄-kam.
116:16 Siōng-chú ah, góa si̍t-chāi sī Lí ê lô͘-po̍k; góa sī Lí ê lô͘-po̍k, sī Lí lú-pī ê kiáⁿ. Lí í-keng kā khún-pa̍k góa ê soh-á tháu-khui.
116:17 Góa beh ēng kám-siā ê chè hiàn hō͘ Lí, Koh beh kiû-kiò Siōng-chú ê miâ.
116:18 Góa beh tī chèng lâng ê bīn-chêng, tùi Siōng-chú siā góa ê goān.
116:19 Tī Siōng-chú sèng-tiān ê īⁿ lāi, tī Ê-lú-sa-lèm ê tiong-kan. Lín tio̍h oló Siōng-chú!
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。