Si-phian/詩篇簡介 線上收聽:中文和合本 台語聖經 客語聖經 福州話聖經 希伯來文讀經 下載檔案 關於語音聖經
143:1 Kiû Chú Pang-chō͘
（ Ta-bi̍t ê si. ）Siōng-chú ah, kiû Lí thiaⁿ góa ê kî-tó, àⁿ hīⁿ-khang thiaⁿ góa ê khún-kiû; chiàu Lí ê sìn-si̍t, chiàu Lí ê kong-gī lâi ìn-tap góa.
143:2 Kiû Lí m̄ thang sím-mn̄g Lí ê lô͘-po̍k, in-ūi tī Lí ê bīn-chêng, oa̍h-.leh ê lâng bô chi̍t-ê sī gī lâng.
143:3 Tùi-te̍k pek-hāi góa, kā góa ê chi̍t tiâu miā phah-tó tī thô͘-kha, hō͘ góa tiàm tī o͘-àm ê só͘-chāi, chhin-chhiūⁿ sí-khì chin kú ê lâng.
143:4 Só͘-í, góa ê sîn-hûn tī góa ê lāi-bīn hūn-.khì; góa ê sim-sîn tī góa ê lāi-bīn kiaⁿ kah phi̍h-phi̍h chhoah.
143:5 Góa ē kì-tit kó͘-chá ê ji̍t-chí, góa siàu-liām Lí it-chhè ê chok-ûi, tiām-tiām su-sióng Lí chhiú ê só͘ chò.
143:6 Góa ǹg Lí gia̍h-khí chhiú, góa ê sim him-bō͘ Lí, chhin-chhiūⁿ khòng-ōaⁿ ê tē teh thèng-hāu hō͘-chúi. [Sè-la̍h]
143:7 Siōng-chú ah, kiû Lí kóaⁿ-kín ìn-tap góa! Góa ê sim-sîn hùi liáu-liáu, kiû Lí m̄ thang tùi góa am bīn! Βián-tit góa chhin-chhiūⁿ sí-lâng lo̍h bōng.
143:8 Kiû Lí hō͘ góa chá-khí sî thiaⁿ tio̍h Lí chû-ài ê siaⁿ, in-ūi góa óa-khò Lí; kiû Lí hō͘ góa chai eng-kai kiâⁿ ê lō͘, in-ūi góa ê sim gióng-bōng Lí.
143:9 Siōng-chú ah, kiû Lí kiù góa thoat-lī góa ê tùi-te̍k! Hō͘ góa cháu-khì bih tī Lí hia.
143:10 Lí sī góa ê Siōng-tè, kiû Lí kà-sī góa chun-hêng Lí ê chí-ì; Lí sī hó ê Siōng-tè, kiû Lí chhōa góa kiâⁿ pêⁿ-tháⁿ ê lō͘.
143:11 Siōng-chú ah, kiû Lí ūi tio̍h Lí ê miâ hō͘ góa oa̍h lo̍h-.khì, chiàu Lí ê kong-gī chhōa góa thoat-lī hoān-lān.
143:12 Chiàu Lí ê chû-ài tû-khì góa ê tùi-te̍k, châu-bia̍t só͘-ū khó͘-to̍k góa ê lâng, in-ūi góa sī Lí ê lô͘-po̍k.
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。