Thoân-tō su/傳道書簡介 線上收聽:中文和合本 台語聖經 客語聖經 福州話聖經 希伯來文讀經 下載檔案 關於語音聖經
10:1 Sí ê hô͘-sîn ē hō͘ chò phang-liāu ê iû hoat-chhut chhàu-bī; ánne, chi̍t-tiám-á ê gû-gōng mā ē pāi-hoāi tōa tì-hūi kah chun-kùi.
10:2 Tì-hūi ê lâng ê sim sī tī i ê chiàⁿ chhiú pêng, gû-gōng ê lâng ê sim sī tī i ê tò chhiú pêng.
10:3 Jî-chhiáⁿ gōng lâng kiâⁿ tī lō͘-.ni̍h, khiàm-khoeh tì-hūi, tùi chèng lâng kóng i sī gōng lâng.
10:4 Nā-sī chiáng-koân-.ê ê sim-sîn siūⁿ beh kong-kek lí, m̄ thang lī-khui lí ê pún ūi, in-ūi un-hô ē bián-tit tōa ê kòe-sit.
10:5 Góa khòaⁿ tio̍h ji̍t-kng ê ē-bīn ū chi̍t hāng m̄-hó, chhin-chhiūⁿ sī chhut tī chiáng-koân-.ê ê chhò-gō͘;
10:6 to̍h-sī an-tì gōng lâng tī koân ūi, hó-gia̍h lâng chē tī kē ūi.
10:7 Góa khòaⁿ tio̍h lô͘-po̍k khiâ bé, kùi-cho̍k chhin-chhiūⁿ lô͘-po̍k kiâⁿ tī tē-.ni̍h.
10:8 Ku̍t hām-kheⁿ ê lâng ē kakī poa̍h lo̍h-khì hit lāi-bīn; thiah chhiûⁿ ê lâng ē hō͘ chôa kā-.tio̍h.
10:9 Phah chio̍h ê lâng ē hō͘ chio̍h-thâu siong-.tio̍h, phòa chhâ ê lâng ē tú tio̍h gûi-hiám.
10:10 Thih-khì í-keng tūn, nā bô bôa lāi i ê chhùi, chiū tio̍h ke chhut chin chē la̍t; to̍k-to̍k tit tio̍h tì-hūi ê kà-sī chiū ū lī-ek.
10:11 Iáu-bōe liām chiù ê sî, chôa nā kā tio̍h lâng, liām-chiù ê lâng chiū bô lī-ek.
10:12 Tì-hūi ê lâng só͘ kóng ê sī un-hūi ê ōe; gû-gōng ê chhùi thun-bia̍t kakī.
10:13 I ê chhùi só͘ kóng ê ōe khí-thâu sī gû-gōng; i ê ōe ê lō͘-bóe sī hāi lâng ê tian-kông.
10:14 Gōng lâng chin kāu-ōe, to̍k-to̍k lâng m̄-chai chiong-lâi ē án-chóaⁿ; i sin-āu só͘ ē hoat-seng ê tāichì, siáⁿ lâng ē kā i kóng?
10:15 Gōng lâng ê lô-lo̍k tì-sú hō͘ in ià-siān, in-ūi liân ji̍p siâⁿ ê lō͘ i mā m̄-chai.
10:16 Pang-kok, lí ê ông nā-sī gín'á, lí ê kùi-cho̍k chá-khí sî iàn-lo̍k, lí chiū ū chai-hō.
10:17 Pang-kok, lí ê ông nā-sī chun-kùi ê lâng ê kiáⁿ, lí ê kùi-cho̍k chiàu-sî lim-chia̍h, ūi tio̍h beh pó͘ in ê thé-la̍t, m̄-sī in-ūi hò͘ⁿ lim, lí chiū ū hok-khì.
10:18 In-ūi pîntōaⁿ ê lâng, chhù kòa ē lap lo̍h-.khì; ūi tio̍h chhiú pîntōaⁿ ê lâng, in ê chhù chiū ē lāu hō͘.
10:19 Iàn-se̍k sī ūi tio̍h hoaⁿ-hí lâi siat, chiú sī beh hō͘ lâng khùiⁿ-oa̍h; chîⁿ-gîn sī beh chò bān-hāng sū ê lō͘-ēng.
10:20 Lí m̄ thang chiù-chó͘ kun-ông, sim mā m̄ thang ánne siūⁿ; tī lí ê khùn-pâng mā m̄ thang chiù-chó͘ hó-gia̍h lâng, in-ūi khong-tiong ê poe-chiáu ē thoân-pò͘ chit-ê siaⁿ, ū si̍t-kó͘ ê mā ē kóng-khí chit-ê tāichì.
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。