Í-sài-a su/以賽亞書簡介 線上收聽:中文和合本 台語聖經 客語聖經 福州話聖經 希伯來文讀經 下載檔案 關於語音聖經
48:1 Siōng-chú Chiáng-koán Bī-lâi
Iâ-kop ê ke, ēng I-su-la-el ê miâ lâi chheng-ho͘ ê, tùi Iô-tah ê chúi-goân chhut-.lâi ê, lín tio̍h thiaⁿ! Lín kí Siōng-chú ê miâ lâi chiùchōa, chheng-ho͘ I-su-la-el ê Siōng-tè, m̄ koh, bô ēng sêng-si̍t, bô ēng kong-gī.
48:2 In-ūi in kakī kiò-chò sèng-siâⁿ ê jîn-bîn, óa-khò I-su-la-el ê Siōng-tè, I ê miâ kiò-chò bān-kun ê I-é-ho-bah.
48:3 Siōng-Chú kóng: Í-chêng ê tāichì, Góa tùi kó͘-chá to̍h kóng bêng, í-keng chhut Góa ê chhùi, mā sī Góa só͘ chí-sī ê; Góa hut-jiân-kan chò, tāichì chiū chiâⁿ.
48:4 In-ūi Góa pêng-sî chai lí sī ngē-sim ê, lí ê ām-kún sī thih chò ê, lí ê thâu-hia̍h sī tâng chò ê.
48:5 Só͘-í, Góa tùi kó͘-chá to̍h kā lí kóng bêng, tī iáu-bōe chiâⁿ ê chìn-chêng to̍h chí-sī lí, bián-tit lí kóng, " Chiahê tāichì sī góa ê ngó͘-siōng só͘ kiâⁿ ê, sī góa tiau-khek ê ngó͘-siōng kah góa chù-chō ê ngó͘-siōng só͘ bēng-lēng ê. "
48:6 Lí í-keng thiaⁿ-.tio̍h, taⁿ koh khòaⁿ tio̍h lóng-chóng; lín kám bô beh soan-iông? Tùi taⁿ í-āu, Góa beh kā sin ê tāichì, to̍h-sī lí só͘ iáu m̄-chai ê ún-ba̍t ê tāichì, kā lí chí-sī.
48:7 Chiahê tāichì sī hiān-kim chhòng-chō ê, m̄-sī tùi chá to̍h ū ê; tī kin-á-ji̍t í-chêng, lí mā m̄ bat thiaⁿ-kòe, bián-tit lí kóng, " Chiahê tāichì góa í-keng chai à."
48:8 Lí si̍t-chāi m̄ bat thiaⁿ-.tio̍h, lí si̍t-chāi m̄-chai; lí ê hīⁿ-khang tùi khí-thâu to̍h si̍t-chāi bô khui; Góa pún-lâi to̍h chai lí chò tāichì hui-siông kúi-chà, lí tùi chhut thai í-lâi to̍h kiò-chò pōe-ge̍k ê.
48:9 Góa ūi tio̍h Góa ê miâ, iân-chhiân Góa ê siū-khì; ūi tio̍h Góa ê miâ-siaⁿ kā lí khoan-iông, bô kā lí chián-tû.
48:10 Lí khòaⁿ, Góa toàn-liān lí mā m̄-sī chhin-chhiūⁿ gîn; lí tī khó͘-lān ê hóe-lô͘ tiong, Góa kéng-soán lí.
48:11 Góa ūi tio̍h kakī ê miâ-siaⁿ, ūi tio̍h kakī ê iân-kò͘ beh chiâⁿ chit-ê tāichì; Góa kám thang hō͘ Góa ê miâ siū lêng-jio̍k? Góa bô beh kā Góa ê êng-kng kui hō͘ pa̍t-ê.
48:12 Ko-le-si Siū Chú Kéng-soán Lâi Chò Léng-siù
Iâ-kop, Góa só͘ tiàu ê I-su-la-el, lín tio̍h thiaⁿ Góa! Góa sī Siōng-chú, Góa sī khí-thâu ê, mā sī lō͘-bóe ê.
48:13 Góa ê chhiú kiàn-li̍p tē ê tē-ki; Góa ê chiàⁿ chhiú thián-khui chiahê thiⁿ; Góa chi̍t-ē kiò, in chiū lóng khiā khí-.lâi.
48:14 Lín lóng tio̍h chū-chi̍p lâi thiaⁿ, in tiong-kan siáⁿ lâng bat kóng chiahê tāichì? Siōng-chú só͘ thiàⁿ ê ē tī Ba-bú-lông kiâⁿ I só͘ hoaⁿ-hí ê, I ê chhiú ē kàu tī Kal-tí-ah lâng.
48:15 To̍k-to̍k Góa, Góa í-keng kóng, Góa mā kéng-tiàu i, chhōa i lâi, i ê lō͘ ē heng-thong.
48:16 Lín tio̍h lâi Góa chia, lâi thiaⁿ che, Góa tùi khí-thâu m̄ bat tī ún-ba̍t ê só͘-chāi kóng; tùi ū chit-ê tāichì khí, Góa to̍h tī hia. Taⁿ chì-koân Siōng-chú chhe góa kah I ê sîn lâi.
48:17 Siōng-chú Tùi Chú-bîn ê Kè-ōe
Kiù-sio̍k lí ê chì-koân Siōng-chú, I-su-la-el ê sèng ê ánne kóng, " Góa sī Siōng-chú — lí ê Siōng-tè, Góa kà-sī lí, hō͘ lí tit tio̍h lī-ek, chhōa lí kiâⁿ tī eng-kai kiâⁿ ê lō͘.
48:18 Hāi ah! Lí m̄ bat thiaⁿ Góa ê bēng-lēng! Nā thiaⁿ, lí ê pêng-an chiū ē chhin-chhiūⁿ hô chúi, lí ê kong-gī ē chhin-chhiūⁿ hái-éng.
48:19 Lí ê kiáⁿ-sun chē kah chhin-chhiūⁿ soa, lí ê pak-tó͘ lāi só͘ seⁿ ê mā chin chē, chhin-chhiūⁿ soa-lia̍p; i ê miâ tī Góa ê bīn-chêng it-tēng bô chián-tû, mā bô bia̍t-bông.
48:20 Lín tio̍h tùi Ba-bú-lông chhut-.lâi, tùi Kal-tí-ah lâng ê tiong-kan cháu chhut-.lâi, ēng hoaⁿ-hí tōa-siaⁿ thoân-pò hō͘ lâng thiaⁿ, kóng, Siōng-chú kiù-sio̍k I ê lô͘-po̍k — Iâ-kop! Lín tio̍h kā chit-ê siau-sit soan-iông kàu tē-ke̍k.
48:21 I ín-chhōa in keng-kòe soa-bô͘, in mā bô chhùi-ta; I ūi tio̍h in hō͘ chúi tùi chio̍h-pôaⁿ lâu chhut; chio̍h-pôaⁿ li̍h-.khui, chúi chiū chhèng chhut-.lâi. Siōng-chú kóng: Pháiⁿ lâng it-tēng bē pêng-an.
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。