Má-khó Hok-im/馬可福音簡介 線上收聽:中文和合本 台語聖經 台語聖經(長老會傳播中心授權） 客語聖經 福州話聖經 粵語和合本 希臘文 下載檔案 關於語音聖經
13:1 I-é-su Ī-giân Sèng-tiān Siū Húi-hoāi
( Mt 24: 1-2; Lk 21: 5-6)
I-é-su tùi sèng-tiān chhut-.lâi ê sî, ū chi̍t-ê bûn-tô͘ kā I kóng, " Lāu-su, Lí khòaⁿ leh, chio̍h hiahni̍h tōa tè, kiàn-tio̍k-bu̍t hiahni̍h tông-hông! "
13:2 I-é-su kā i kóng, " Lí teh khòaⁿ chiahê tōa kiàn-tio̍k-bu̍t ò͘? Chiong-lâi tī chia bô chi̍t tè chio̍h ē sio-tha̍h, lóng ē hō͘ lâng thiah-kah pêⁿ-pêⁿ-pêⁿ. "
13:3 Chai-hō ê Khai-Sí
( Mt 24: 3-14; Lk 21: 7-19)
I-é-su tī Kaⁿ-ná soaⁿ ǹg sèng-tiān teh chē ê sî, Piat-tò͘, Iâ-kop, Iô-há-neh kah An-to-le̍h thau-thau-á mn̄g I-é-su kóng,
13:4 " Chhiáⁿ kā goán kóng, tang-sî ē hoat-seng chit-ê tāichì? Á chiahê tāichì beh hoat-seng ê sî, ū siáⁿ-mi̍h tiāu-thâu? "
13:5 I-é-su ìn kóng, " Lín tio̍h kín-sīn, m̄ thang hō͘ lâng kā lín bê-he̍k.
13:6 Ū chin chē lâng ē lī-iōng góa ê miâ, kóng, ' Góa sī Ki-tok', lâi bê-he̍k chin chē lâng.
13:7 Lín thiaⁿ tio̍h chiàn-cheng kah chiàn-cheng ê hong-siaⁿ ê sî, m̄-bián kiaⁿ, in-ūi chiahê tāichì it-tēng ē hoat-seng, chóng-.sī, boa̍t-ji̍t iáu-bōe kàu.
13:8 In-ūi bîn-cho̍k ē khí-lâi kong-kek bîn-cho̍k, kok-ka mā ē kong-kek kok-ka. Ta̍k só͘-chāi ē ū tē-tāng, koh ū ki-hng. Chiahê tāichì to̍h-sī sán-hū chhui-chūn thòng-khó͘ ê khai-sí.
13:9 Lín kakī tio̍h kín-sīn, in-ūi lâng ē kā lín kau hō͘ gī-hōe, lín ē tī hōe-tn̂g lāi siū piⁿ-phah. Lín mā ē ūi tio̍h góa ê iân-kò͘ khiā tī koaⁿ-hú kah kun-ông ê bīn-chêng, lâi tùi in ūi góa chò kiàn-chèng.
13:10 Chóng-.sī, hok-im it-tēng tio̍h tāi-seng thoân hō͘ bān-pang.
13:11 Lâng kā lín lia̍h-khì kau hō͘ hoat-têng ê sî, m̄-bián seng hoân-ló beh án-chóaⁿ kóng. Hit sî, lín tio̍h chiàu lín só͘ tit tio̍h Sèng Sîn ê chí-sī lâi kóng, in-ūi m̄-sī lín kakī teh kóng, sī Sèng Sîn teh kóng.
13:12 Hiaⁿ-tī-hōe chhut-bē hiaⁿ-tī hō͘ i sí, lāu-pē mā ē ánne khoán-thāi kiáⁿ-jî; kiáⁿ-jî ē khí-lâi kong-kek pē-bú, kā in hāi-sí.
13:13 Lín koh ē in-ūi góa ê miâ lâi hō͘ chèng lâng oàn-hūn, to̍k-to̍k jím-nāi kàu lō͘-bóe ê lâng ē tit tio̍h kiù. "
13:14 Tōa-Chai-lān
( Mt 24: 15-28; Lk 21: 20-24)
" Tng lín khòaⁿ tio̍h hit-ê ' Khó-ò͘ⁿ ê húi-bia̍t chiá'khiā tī bô eng-kai khiā ê só͘-chāi ( tha̍k ê lâng tio̍h bêng-pe̍k ), hit sî tī Iô-tá-iah tē-khu ê lâng tio̍h cháu-khì soaⁿ-.ni̍h bih.
13:15 Tī chhù téng ê lâng m̄ thang ji̍p-khì chhù lāi the̍h mi̍h-kiāⁿ.
13:16 Tī hn̂g-.ni̍h ê lâng m̄ thang tńg-lâi hiaⁿh gōa-saⁿ.
13:17 Tī hiahê ji̍t-chí, ū sin-īn kah hō͘ eⁿ-á chia̍h leng ê hū-jîn-lâng si̍t-chāi chin put-hēng!
13:18 Lín tio̍h kî-tó, kiû Siōng-tè mài tī kôaⁿ-thiⁿ sî hoat-seng chiahê tāichì.
13:19 In-ūi hiahê ji̍t-chí teh beh ū tōa chai-lān, sī tùi Siōng-tè chhòng-chō sè-kan í-lâi m̄ bat ū ê, chiong-lâi mā bē koh ū.
13:20 Nā m̄-sī Siōng-tè kiám-chió hiahê ji̍t-chí, bô lâng ē tit-kiù; chóng-.sī, ūi tio̍h I kéng-soán ê chú-bîn, I í-keng ū kiám-chió hiahê ji̍t-chí.
13:21 Hit sî, nā ū lâng kā lín kóng, ' Ki-tok tī chia' á-.sī kóng, ' Tī hia', lín m̄ thang siong-sìn.
13:22 In-ūi beh ū ké Ki-tok kah ké sian-ti ē chhut-hiān, kiâⁿ sîn-jiah kah kî-sū, chīn-liōng beh lâi bê-he̍k Siōng-tè ê soán-bîn.
13:23 Lín tio̍h kín-sīn! Góa í-keng sū-sian lóng kā lín kóng à. "
13:24 Jîn-chú ê Kàng-lîm
( Mt 24: 29-31; Lk 21: 25-28)
" Tng hiahê chai-lān kòe-liáu ê ji̍t-chí, ji̍t ē piàn o͘-àm, goe̍h bē hoat kng,
13:25 Chheⁿ ē tùi thiⁿ-téng lak lo̍h-.lâi, thiⁿ-téng ê bān-siōng ē iô-tāng.
13:26 Hit sî, lâng ē khòaⁿ tio̍h Jîn-chú chhiong-móa tōa koân-lêng kah êng-kng, chē hûn kàng-lîm.
13:27 Hit sî, Siōng-tè ē chhe thiⁿ-sài tùi sì-hng, tùi tē-ke̍k kàu thiⁿ-piⁿ, chū-chi̍p I ê soán-bîn. "
13:28 Bû-hoa-kó Chhiū ê Kà-sī
( Mt 24: 32-35; Lk 21: 29-33)
" Lín tio̍h tùi bû-hoa-kó chhiū chit-ê phì-jū lâi ha̍k-si̍p. Tng chhiū-ki puh-íⁿ hoat-hio̍h ê sî, lín to̍h chai joa̍h-thiⁿ teh beh kàu à.
13:29 Án-ne, lín khòaⁿ tio̍h chiahê tiāu-thâu, to̍h chai Jîn-chú teh beh chài-lîm, í-keng lâi-kàu mn̂g-kháu à.
13:30 Góa si̍t-chāi kā lín kóng, chit sè-tāi iáu-bōe kòe-khì í-chêng, chiahê só͘-ū ê tāichì lóng ē hoat-seng.
13:31 Thiⁿ kah tē ē siau-sit, góa ê ōe bē siau-sit. "
13:32 Bô Lâng Chai Hitê Ji̍t, Hitê Sî
( Mt 24: 36-44)
" Koan-hē hit-ê ji̍t kah hit-ê sî, bô lâng chai, tī thiⁿ-téng ê thiⁿ-sài mā m̄-chai, Kiáⁿ mā m̄-chai, kantaⁿ Thiⁿ-pē chai.
13:33 Tio̍h kín-sīn! Tio̍h kéng-séng lâi kî-tó, in-ūi lín m̄-chai hit-ê sî-khek tang-sî ē kàu.
13:34 Che tú chhin-chhiūⁿ chi̍t-ê lâng chhut-gōa, kā koân kau-tài i ê lô͘-po̍k, ū hun-phòe kang-chok hō͘ ta̍k lâng chò, koh hoan-hù kò͘-mn̂g ê tio̍h tiuⁿ-tî.
13:35 Só͘-í, lín tio̍h tiuⁿ-tî, in-ūi lín m̄-chai lín ê chú-lâng tang-sî ē tńg-.lâi, á-.sī beh àm-á, á-.sī pòaⁿ-mê, á-.sī ke thî ê sî, á-.sī thiⁿ-kng ji̍t chhut ê sî.
13:36 Khióng-kiaⁿ chú-lâng hut-jiân tńg-.lâi ê sî, khòaⁿ tio̍h lín teh khùn.
13:37 Góa só͘ kā lín kóng ê, mā ū kā kûn-chiòng kóng, Tio̍h tiuⁿ-tî! "
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。