Má-khó Hok-im/馬可福音簡介 線上收聽:中文和合本 台語聖經 台語聖經(長老會傳播中心授權） 客語聖經 福州話聖經 粵語和合本 希臘文 下載檔案 關於語音聖經
16:1 Khang-bōng
( Mt 28: 1-8; Lk 24: 1-12; Ih 20: 1-10)
An-hioh-ji̍t kòe liáu-āu, Ma̍k-ta-lé ê Mâ-lí-ah, Iâ-kop ê lāu-bú Mâ-lí-ah kah Sa-ló-meh, ū bé phang-liāu beh lâi boah I-é-su ê sin-si.
16:2 Chhit ji̍t ê thâu chi̍t ji̍t thàu-chá, ji̍t tú-á chhut ê sî, in lâi-kàu bōng-tē.
16:3 In iân-lō͘ kiâⁿ iân-lō͘ kóng, " Siáⁿ lâng beh thè lán kā hit tè bōng-kháu ê chio̍h-thâu kō-khui? " In-ūi hit tè chio̍h-thâu hui-siông tōa tè.
16:4 In lâi-kàu-ūi, gia̍h thâu chi̍t khòaⁿ, chiū khòaⁿ tio̍h hit tè chio̍h-thâu í-keng kō-khui.
16:5 In ji̍p-khì bōng lāi, chiū khòaⁿ tio̍h chi̍t-ê siàu-liân lâng chē tī chiàⁿ pêng, sin chhēng pe̍h saⁿ. In chiū tio̍h-kiaⁿ kah gāng-.khì.
16:6 Siàu-liân lâng kā in kóng, " M̄-bián kiaⁿ. Góa chai lín sī teh chhōe hō͘ lâng tèng si̍p-jī-kè ê Na-cha-lia̍t lâng I-é-su. I í-keng koh-oa̍h, bô tī chia. Lí khòaⁿ, chia sī I bâi-chòng ê só͘-chāi.
16:7 Taⁿ lín tio̍h khì kā I ê bûn-tô͘, te̍k-pia̍t tio̍h kā Piat-tò͘ kóng, ' I ē pí lín tāi-seng khì-kàu Ga-lí-la-iah séng. Chiàu I só͘ kā lín kóng ê, lín tī hia ē khòaⁿ tio̍h I. '"
16:8 Hiahê hū-jîn-lâng lī-khui bōng chiū ti̍t-ti̍t cháu, in-ūi in kiaⁿ kah phi̍h-phi̍h chhoah soah gāng-.khì. In mā bô kā lâng kóng siáⁿ-mi̍h, in-ūi in chin kiaⁿ.
16:9 （ Té kiat-bóe ）, （ Chù, Ū ê kò͘-koàn tī 16:8 ê āu-piah hù-ka chit-ê chheng-chò " Té kiat-bóe "ê keng-bûn ）9 In kā it-chhè ê chí-sī kán-iàu tùi Piat-tò͘ chiu-ûi ê lâng kóng. Liáu-āu, I-é-su chiū thong-kòe in, tùi tang kàu sai thoân-sàng hit-ê sîn-sèng, bē húi-hoāi ê, ē éng-oán chín-kiù ê sìn-sit. （ tn̂g kiat-bóe ）, （ Chù, Ū ê kò͘-koàn tī 16:8 ê āu-piah hù-ka chit-ê chheng-chò " Tn̂g kiat-bóe "ê keng-bûn ）I-é-su tùi Ma̍k-ta-lé ê Mâ-lí-ah Hián-hiān
( Mt 28: 9-10; Ih 20: 11-18)
Chhit ji̍t ê thâu chi̍t ji̍t thàu-chá, I-é-su koh-oa̍h liáu-āu, tāi-seng tùi Ma̍k-ta-lé ê Mâ-lí-ah hián-hiān. I-é-su chêng bat kā i kóaⁿ-chhut chhit-ê kúi.
16:10 Mâ-lí-ah-khì kā pêng-sî kin-tòe I-é-su ê lâng pò-kò; hit sî hiahê lâng tng teh iu-būn thî-khàu.
16:11 In thiaⁿ tio̍h I-é-su koh-oa̍h, koh ū hō͘ Mâ-lí-ah khòaⁿ-.tio̍h, kèng-jiân iáu m̄ siong-sìn.
16:12 I-é-su tùi nn̄g-ê bûn-tô͘ Hián-hiān
( Lk 24: 13-35)
Āu-lâi, in tiong-kan nn̄g-ê bûn-tô͘ khì chng-kha, teh kiâⁿ ê sî, I-é-su ēng bô kāng-khoán ê hêng-siōng tùi in hián-hiān.
16:13 In tńg-khì kā kî-tha ê lâng pò-kò; chóng-.sī, in hiahê lâng mā m̄ siong-sìn.
16:14 I-é-su Tùi Cha̍p-it-ê Bûn-tô͘ Hián-hiān
( Mt 28: 16-20; Lk 24: 36-49; Ih 20: 19-23; Ht 1: 6-8)
Āu-lâi, cha̍p-it-ê bûn-tô͘ chē teh chia̍h pn̄g ê sî, I-é-su tùi in hián-hiān, chek-pī in ê m̄-sìn kah sim ngē, in-ūi in m̄ siong-sìn hiahê khòaⁿ tio̍h I-é-su koh-oa̍h ê lâng kā in kóng ê ōe.
16:15 I-é-su koh kā in kóng, " Lín tio̍h khì phó͘-thiⁿ-ē thoân hok-im hō͘ bān-bîn thiaⁿ.
16:16 Ū sìn lâi niá siū sé-lé ê lâng ē tit tio̍h kiù; m̄-sìn ê lâng ē siū tēng chōe.
16:17 Ū sìn ê lâng ē-tàng hōng góa ê miâ kóaⁿ kúi, koh ē kóng sin ê giân-gí.
16:18 In lia̍h chôa á-.sī lim tio̍h siáⁿ-mi̍h to̍k, mā lóng bē siū siong-hāi. In kā pēⁿ-lâng hōaⁿ-chhiú, pēⁿ-lâng ē tit tio̍h i hó. "
16:19 I-é-su chiūⁿ Thiⁿ
( Lk 24: 50-53; Ht 1: 9-11)
Chú I-é-su kā in kóng chiahê ōe liáu-āu, chiū siū chiap chiūⁿ thiⁿ, chē tī Siōng-tè ê chiàⁿ pêng.
16:20 Bûn-tô͘ chhut-.khì, tī ta̍k só͘-chāi thoân hok-im. Chú kah in tâng-kang, ēng in só͘ kiâⁿ ê sîn-jiah lâi chèng-bêng in só͘ thoân ê tō-lí sī chin-si̍t ê.
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。