Iok-hān Hok-im/約翰福音簡介 線上收聽:中文和合本 台語聖經 台語聖經(長老會傳播中心授權） 客語聖經 福州話聖經 粵語和合本 希臘文 下載檔案 關於語音聖經
20:1 Khang-bōng
( Mt 28: 1-10; Mk 16: 1-8; Lk 24: 1-12)
Chhit ji̍t ê thâu chi̍t ji̍t thàu-chá, thiⁿ iáu-bōe kng, Ma̍k-ta-lé ê Mâ-lí-ah lâi-kàu bōng-tē, khòaⁿ tio̍h bōng-kháu ê chio̍h í-keng sóa-khui.
20:2 I chiū cháu-khì chhōe Sí-mòng Piat-tò͘ kah hit-ê I-é-su só͘ thiàⁿ ê bûn-tô͘, kā in kóng, " Ū lâng kā Chú tùi bōng-.ni̍h sóa-cháu, goán m̄-chai in kā I hē tī tó-ūi. "
20:3 Piat-tò͘ kah hit-ê bûn-tô͘ chiū khì bōng-tē.
20:4 Nn̄g lâng chò-hóe cháu, hit-ê bûn-tô͘ cháu khah kín, seng kàu bōng-tē.
20:5 I àⁿ lo̍h-khì khòaⁿ bōng lāi, khòaⁿ tio̍h iù-tē pò͘ hē tī hia, to̍k-to̍k i bô ji̍p-.khì.
20:6 Sí-mòng Piat-tò͘ tòe-āu kàu, ji̍p-khì bōng lāi, khòaⁿ tio̍h iù-tē pò͘ hē tī hia.
20:7 I koh khòaⁿ tio̍h pau I-é-su thâu-khak ê kin, bô kah iù-tē pò͘ hē chò-hóe, kńg teh lēng-gōa hē.
20:8 Hit sî, hit-ê chìn-chêng kàu bōng-tē ê bûn-tô͘ mā ji̍p-.khì, khòaⁿ-liáu chiū siong-sìn.
20:9 In-ūi in iáu-bōe liáu-kái keng-tián ê ōe, kóng I-é-su it-tēng tio̍h tùi sí-lâng tiong koh-oa̍h.
20:10 Jiân-āu, in nn̄g lâng chiū tńg-khì in tau.
20:11 I-é-su Tùi Ma̍k-ta-lé ê Mâ-lí-ah Hián-hiān
( Mk 16: 9-11)
Mâ-lí-ah khiā tī bōng gōa teh thî-khàu, i ná khàu ná àⁿ lo̍h-khì khòaⁿ bōng lāi.
20:12 I khòaⁿ tio̍h nn̄g-ê chhēng pe̍h-saⁿ ê thiⁿ-sài, chē tī goân-lâi hē I-é-su sin-si ê só͘-chāi, chi̍t-ê tī thâu chit pêng, chi̍t-ê tī kha hit pêng.
20:13 Thiⁿ-sài kā i kóng, " Hū-jîn lâng, lí ná ē teh khàu? " I ìn kóng, " Ū lâng kā góa ê Chú sóa-cháu, góa m̄-chai in kā I hē tī siáⁿ-mi̍h só͘-chāi. "
20:14 Chiahê ōe kóng soah, Mâ-lí-ah oa̍t tńg-sin, khòaⁿ tio̍h I-é-su khiā tī hia, mā jīn bē chhut I sī I-é-su.
20:15 I-é-su kā i kóng, " Hū-jîn lâng, lí ná ē teh khàu? Lí teh chhōe siáⁿ lâng? " Mâ-lí-ah siūⁿ kóng I sī kò͘ hn̂g ê lâng, chiū ìn kóng, " Thâu-ke ah, lí nā ū kā I sóa-cháu, chhiáⁿ kā góa kóng lí kā I hē tī siáⁿ-mi̍h só͘-chāi, góa thang lâi-khì kā I siu tńg-.lâi. "
20:16 I-é-su kiò chi̍t-siaⁿ " Mâ-lí-ah ah. " I chiū oa̍t tńg-sin, ēng Hi-bú-lâi ōe kóng, " Lia̍p-pho-nî! " Ì-sù to̍h-sī " Lāu-su ".
20:17 I-é-su kā i kóng, " M̄-thang bong góa, in-ūi góa iáu-bōe chiūⁿ thiⁿ khì Thiⁿ-pē hia. Lí tio̍h khì chhōe góa ê hiaⁿ-tī, kā in kóng, góa chiūⁿ thiⁿ khì góa ê Thiⁿ-pē hia, mā sī lín ê Thiⁿ-pē hia; khì góa ê Siōng-tè hia, mā sī lín ê Siōng-tè hia. "
20:18 Ma̍k-ta-lé ê Mâ-lí-ah chiū khì kā bûn-tô͘ kóng, " Góa í-keng khòaⁿ tio̍h Chú à. ", koh kā in kóng Chú ū kā i kóng ê hiahê ōe.
20:19 I-é-su Tùi Bûn-tô͘ Hián-hiān
( Mt 28: 16-20; Mk 16: 14-18; Lk 24, 36-49)
Kāng hit ji̍t, to̍h-sī chhit ji̍t ê thâu chi̍t ji̍t ê àm-sî, bûn-tô͘ in-ūi kiaⁿ Iô-tá-iah lâng, chiū tī in tòa ê só͘-chāi kā mn̂g koaiⁿ-.leh. I-é-su lâi-kàu in tiong-kan, kā in kóng, " Goān lín pêng-an! "
20:20 Chiahê ōe kóng liáu, I-é-su chiū pí chhiú kah heng-khám-piⁿ hō͘ in khòaⁿ. Bûn-tô͘ khòaⁿ tio̍h Chú, chin hoaⁿ-hí.
20:21 I-é-su koh kā in kóng, " Goān lín pêng-an! Chhin-chhiūⁿ Thiⁿ-pē ū chhe-phài góa, góa mā beh chhe-phài lín. "
20:22 I-é-su kóng soah, chiū tùi in pûn-khùi, kóng, " Lín niá-siū Sèng Sîn.
20:23 Lín sià-bián siáⁿ lâng ê chōe, in chiū tit tio̍h sià-bián; lín nā bô sià-bián lâng ê chōe, hiahê lâng ê chōe chiū bē tàng sià-bián. "
20:24 I-é-su Tùi Tho-má-suh Hián-hiān
Tho-má-suh, mā kiò-chò Ti-tu-mô͘( siang-seⁿ-á ê ì-sù ), sī cha̍p-jī bûn-tô͘ ê chi̍t-ê, I-é-su kàu ê sî, i bô chò-hóe tī hia.
20:25 Kî-tha ê bûn-tô͘ chiū kā i kóng, " Goán í-keng ū khòaⁿ tio̍h Chú à. " M̄ koh, Tho-má-suh kā in kóng, " Góa nā bô khòaⁿ tio̍h I chhiú tiong ê teng-jiah, bô ēng chéng-thâu-á bong hit-ê teng-jiah, bô ēng chhiú bong I ê heng-khám-piⁿ, góa choa̍t-tùi m̄ siong-sìn. "
20:26 Kòe-liáu chhit kang, bûn-tô͘ koh-chài chū-chi̍p tī chhù lāi, Tho-má-suh mā chò-hóe tī hia. Mn̂g koaiⁿ khí-.lâi, I-é-su chiū kàu, khiā tī in tiong-ng, kóng, " Goān lín pêng-an! "
20:27 I-é-su kā Tho-má-suh kóng, " Chhun chéng-thâu-á lâi bong góa ê chhiú, chhun chhiú lâi bong góa ê heng-khám-piⁿ. M̄-thang giâu-gî, tio̍h siong-sìn. "
20:28 Tho-má-suh ìn kóng, " Góa ê Chú ah, góa ê Siōng-tè ah. "
20:29 I-é-su kā i kóng, " Lí khòaⁿ tio̍h góa chiah siong-sìn, hiahê bô khòaⁿ tio̍h to lâi sìn ê lâng, chin ū hok-khì. "
20:30 Chit pún Chheh ê Bo̍k-tek
I-é-su tī bûn-tô͘ ê bīn-chêng ū koh kiâⁿ chin chē sîn-jiah, bô kì tī chit pún chheh.
20:31 Kì-chài chiahê tāichì, sī beh hō͘ lín sìn I-é-su sī Ki-tok, sī Siōng-tè ê Kiáⁿ, koh hō͘ lín thong-kòe sìn, khò I ê miâ lâi tit tio̍h oa̍h-miā.
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。